Read Kishambala Mateyo 13 Bible Online

Mateyo 13 - Kishambala bible

Mateyo 13

¹Mushi uja Yesu azalawa mwe ija nyumba, azahita kwa ikala nkandai he bahali.

²Mabumba mangi ya wantu yazaunganana haja, aliho; ne vyeleka, akiingila mwe chombo, aikale mumo, miya wantu woshe wazaγoloka nkandankanda ya bahali.

³Azawalonga mbuli nyingi kishimo, azawaγamba: Kuna mhasi, azalawa kwa myaγa mbeyu.

⁴Akimyaγa mbeyu, kuṅwe zizagwa silai, videγe vizaiza, vizazija.

⁵Kuṅwe zizagwa he mawe hashinaho shanga nyingi, zizafaalika nguzu kwa kushowa shanga yeingila na ndai;

⁶miya zuwa jikiandiila kuaka, zizanyuluka, zizakalaγala, kwa kuti nkazina sindo.

⁷Kuṅwe zizagwa he miwa; miwa izakwela, izazifuwa.

⁸Kuṅwe zizagwa mwe shanga ntana, zizavyala, kuṅwe gana, kuṅwe milongo mtandatu, kuṅwe milongo mitatu.

⁹Mwena mashikilo yeiva neaive!

¹⁰Wahina wazamwizila, wazamuli: Nini ukiwalonga kishimo?

¹¹Yuja azawalanduia angwe: Inywi mzafilwa mbazi, mtaile vihili vya uzumbe wa lwingu, miya waja nkawafilwe mbazi ivyoho.

¹²Hambu mwena kitende atainkwa vivyoho, aisiize kuγenyeza; miya ashinaye, hata viya, avyona navyo, atavihokwa.

¹³Ne vyeleka, waja nikiwalonga kishimo, hambu waiene kangi nkawaona, waiivile kangi nkawaiva, nkawataila.

¹⁴Ne uvyowabontokela uteγanyi wa Yesaya, uja wa kuγamba: Kuiva nezemwive vivyoho, miya nkezemuvifumbule! Kuolela nezemwolele vivyoho, miya nkezemuvitaile.

¹⁵Hambu myoyo ya inu mbali ni mibada, mashikilo yawe yana ntoγo za kuiva, mesho yawe waiyasisize, kangwe washezaona na mesho yawe, kangwe washezaiva na mashikilo yawe, washezataila mwe myoyo yawe wakihituka na kwangu, nikiwahonya.

¹⁶Miya mesho yenyu yana nyemi, kuti yaona, hata mashikilo yenyu, kuti yaiva.

¹⁷Kweli namiti: Wateγanyi na watanda wangi wazakundisha kuona viya, muvyoona, miya nkawaviene, hata kuiva viya, muvyoiva, miya nkawaviivile.

¹⁸Lushe inywi ivai luja lushimo lwa yuja mhasi:

¹⁹Kila muntu akiiva mbuli ya Mulungu, akisheitaila, yuja mubada aiza, amhoka viya vimyaγiγwevyo mwe moyo wakwe.

²⁰Ne mbeyu zimyaγiγwezo silai. Ziya zimyaγiγwezo he mawe ni waja weiva mbulingwa na kufikaihokela na nyemi;

²¹miya nkawana sindo mwe myoyo yawe, watozesha mishi miγeke, miya wakiona ukiwa ao nkondo kwa iyo mbuli wafikaihilwa.

²²Ziya zimyaγiγwezo he miwa ni waja weiva mbulingwa, miya sungu za inu shi na lwufyo lwa mali ziyafuwa mbulingwa, ishevyale.

²³Ziya zimyaγiγwezo mwe shanga ntana ni waja weiva mbulingwa na kuitaila, ne wevyaia kuṅwe gana, kuṅwe milongo mtandatu, kuṅwe milongo mitatu.

²⁴Azawazisa lushimo lutuhu angwe: Uzumbe wa lwingu wafanana na muntu mwehanda mbevu ntana mwe lubuwa lwakwe.

²⁵Miya wantu wakisisila, kuzaiza munkulu ywakwe, azamyaγa mbeyu za fovo kwe ngano gati, akibinda azahita.

²⁶Nkande zikikula, zikivyala, hata ziya fovo zizaoneka.

²⁷Wapuna wa yuja zumbe wazamwizila, wazamuti: Zumbe, nkuhandile mbeyu ntana mwe lubuwa lwako? Lushe ziya fovo zianduka na hi?

²⁸Azawati: Ni munkulu aviγosholeye. Waja wapuna wazamuti: Wakunda, tihite, tiṅofule na kuunganyanya fovo?

²⁹Azawati: Do, kangwe mkiunganyanya fovo mshezaṅofula ngano haṅwe nazo.

³⁰Lekai, vikuzanye haṅwe, mpaka ngano zikizashengwa! Mishi ija ya kushenga ngano nenilonge waja weshenga: Bosi unganyanyai ziya fovo, muzikante makisa, zikaokwe, miya ziya ngano muziiγale he ikilo jangu ja nkande!

³¹Azawazisa lushimo lutuhu angwe: Uzumbe wa lwingu wafanana na kahuluzi ka ntunda ya mvumo, muntu akikaγuwa azakahanda mwe lubuwa lwakwe.

³²Ni kahuluzi kadodo kuzinka mbeyu zoshe, miya kakikula kavota miti yoshe yehandwa, kaγaluka muti mgima, hata madeγe yeanga ulanga yaiza, yazenga mwe matambi yakwe.

³³Azawaγambila lushimo lutuhu angwe: Uzumbe wa lwingu wafanana na shimbi, mvyele akijiγuwa, azajigela, ati ni mwe ngahu ntatu za mushu wa ngano, kangi uja mushu woshe wajikolela.

³⁴Izi mbuli zoshe Yesu azazilonga waja wantu kishimo;

³⁵nkakuna mbuli, awalongileyo kishilushimo, kangwe vibontoke viya vilongiγwevyo ni mteγanyingwa kuγamba: Neniinule kanwa changu, nilonge kishimo, nenilavilize viya vifishiγwevyo, vivyo inu shi yatulwavyo.

³⁶Ne ahoshungula waja wantu, vikibinda azahita na kaya. Wahina wakwe wazamwizila, angwe: Tibontwele luja lushimo lwa fovo ihandiγweyo mwe lubuwa!

³⁷Azawaitikila angwe: Yuja mwehanda mbeyu ntana ni ṅwanangwa ywa muntu.

³⁸Lubuwa ni ngulu ngima; ija mbeyu ntana ni wenye uzumbengwa, ziya fovo ni wana wa yuja mubada.

³⁹Yuja munkulu mwezihanda ni yuja ṅwenye leba; mishi ya kushenga ngano ni bindilizo ja inu shi, waja weshenga ni walau.

⁴⁰Sa viyaho fovo zivyounganyanyiγwa, zikaokwe na moto, ne ndivyo mbuli iγende, inu shi ihozabindilizikila.

⁴¹Ṅwanangwa ywa muntu atatuma walau wakwe, watalavya mwe uzumbe wakwe na kuwaunganyanya woshe wena lwihizo,

⁴²waγosholewo vishiγosholwavyo, wawashindike na mwe ziko jeaka moto, ne kwena kulila na kukemeza meno.

⁴³Ne ndiho watanda waake mwe uzumbe wa ishe ywawe, viya ni zuwa. Mwena mashikilo yeiva neaive!

⁴⁴Uzumbe wa lwingu wafanana na feza zifishiγwezo mwe lubuwa; muntu akiziona atahita na nyemi, ataγe vyoshe, avyona navyo, aγule luja lubuwa.

⁴⁵Vituhu uzumbe wa lwingu wafanana na mchuluzi mwelonda makalata matana.

⁴⁶Akiona kalata iṅwe jena kima kikulu, atahita, ataγe vyakwe vyoshe, avyona navyo, ajiγule.

⁴⁷Vituhu uzumbe wa lwingu wafanana na lwavu; lukigelwa mwe bahali lwagwila nyama za kila mbali.

⁴⁸Lukimema, wantu waluiγala na mpwai, waikala, washaγwila ziya ntana na mwe viγa, miya ziya mbada wataziasha.

⁴⁹Ne ndivyo mbuli iγende, inu shi ihozabindilizikila. Walau watalawa, waahule wabada na watanda, washindike wabada na mwe ziko jeaka moto;

⁵⁰ne kwena kulila na kukemeza meno.

⁵¹Mzaiva izi mbuli zoshe? Wazamwitikila: Ehe.

⁵²Azawati: Kwa ivyoho kila mtabaluwangwa mwefuziγwa uzumbe wa lwingu afanana na mγoshi ywa chengo mwekalavya mwe kitende chakwe vihya na vishakazu.

⁵³Yesu akibinda kulonga izi shimo azahauka.

⁵⁴Azahita na kuja, akulileko, azafuza mwe vikilo jawe, woshe wazashentuka angwe: Ivi viyuγo na izi nguvu zakwe zianduka na hi?

⁵⁵Uyu so ṅwana fundi? Nine nkaitangwa Maliya? Wanduγuze so Yakobo na Yose na Simoni na Yuda?

⁵⁶Hata walumbuze woshe nkatina nawo? Lushe uyu ivi vyoshe vimwandukila hi?

⁵⁷Wazaihilwa ndiye. Yesu azawati: Mteγanyingwa nkabelwa kutuhu, kushima kaya kwakwe na nyumbai mwakwe.

⁵⁸Uko nkaγoshole vilozo vingi kwa mbuli ya kushetozesha kwawe.