Read Kishambala Mateyo 17 Bible Online

Mateyo 17 - Kishambala bible

Mateyo 17

¹Mishi mtandatu ikizinka, Yesu azamγuwa Petelo na Yakobo na nduγuye Yohana, azawakweza mwe ntuli nde, wai wenye du.

²Wakimwolela, azaγalamuka, cheni chakwe chizaaka, viya ni zuwa, hata shuke zakwe zizanamanika, viya ni langaila.

³Vikibinda Mose na Eliya wazawalawila, wazalonga naye.

⁴Petelo azamlonga Yesu angwe: Zumbe, vyatama, tikiikala kunu. Ati wakunda, nitazenga makumbi matatu aha, iṅwe jako, iṅwe ja Mose, iṅwe ja Eliya.

⁵Akelonga, kuzaiza zunde, jina langaila, jizawagwishiliza mpungo, kangi muja mwe zunde muzalawa kanwa angwe: Uyu ni ṅwanangu, niyemkundisha, niyemtamilwa, mwivei!

⁶Waja wakiviiva wazakina funi, wazaingilwa ni woγa ukulu.

⁷Yesu azawabasha, azawadowa angwe: Inukai, nisheogohe!

⁸Wakiinula mesho yawe nkawaene muntu, ni Yesu ike du.

⁹Wakisheela mwe uja mulima, Yesu azawalaγiliza angwe: Mshezavimγambila muntu viya, mwenevyo, mpaka ṅwanangwa ywa muntu akizafufulwa kwa wafilewo.

¹⁰Waja wahina wazamwuza angwe: Nini watabaluwangwa wakilonga kuti: Shuti kuneiza Eliya?

¹¹Azawahitwila angwe: Eliya aiza kweli, aγoshole vyoshe vibanikevyo.

¹²Miya namiti: Eliya azabinda kuiza, miya nkawamtaile, wazamγoshwela wakundilevyo. Vivyoho hata ṅwanangwa ywa muntu aunga kulumiziγwa ndiwo.

¹³Ne wahoiva waja wahina, kuti atewalonga mbuli ya Yohana Mubatizi.

¹⁴Wakibula kwa wantu, mγoshi azamwizila, azamgintila mazwi angwe Zumbe, umfile ṅwanangu mbazi!

¹⁵Hambu ana luzwili, ahuma vibada. Hambu aakakina mwe moto, vivyoho kangi muno aakakina mwe mazi.

¹⁶Nizamwiγala kwa wahina wako, miya nkawadahile kumhonya.

¹⁷Yesu azahitula angwe: Inywi mu mbali ishiyotozesha, muzabinda kuaγilwa, Niange na inywi mpaka lini? Nimizizimizize mpaka hi? Muletei na kwangu!

¹⁸Yesu azamvaila, ne mpepo iholawa mwakwe, yuja ṅwana ne kuhona ija minga.

¹⁹Haja wahina wakwe wazamlawila Yesu he njama angwe: Nini ishwi tikishedaha kuingata ija mpepo?

²⁰Azawati: Kwa mitozesheze yenyu kuti ni miγeke. Kweli namiti: Ati kitozesheze chenyu ni kidashi du sa kahuluzi kadashi, mwangalonga unu mulima: Uka aha, uhite na kuja!, utahita, kangi nkakuna, ndivyo vimileme.

²¹Miya inu mbali nkailawa, ati so kwa kuvika na kufunga.

²²Wakiangilana haṅwe ivyoho mwe shi ya Galileya, Yesu azawati: Ṅwanangwa ywa muntu aunga kuinkilwa mwe mikono ya wantu, wamkome;

²³miya mushi wa ntatu atafufulwa. Kwa ivyoho wazaona ukiwa ukulu.

²⁴Wakiingila Kapelinaumu, washanguza kodi ya Mulungu wazamlawila Petelo angwe: Kumbe mfuzi ywenyu nkagwila kodi?

²⁵Angwe: Agwila. Akiingila na nyumbai Yesu azanawauza angwe: Simoni, umγamba ze? Wazumbe wa inu shi, wawoshanga kodi na ngelu, ni wahi? Ni wana wawe, hambu ni washi?

²⁶Akiγamba: Ni washi, Yesu azamγamba: Shivyo, wana wawe nkawashangwa.

²⁷Miya kangwe tishewaihize, hita ukagele kilowa mwe bahali! Kapala, ndijo uandiile kukweza, jiγuwe, uashamye kanwa chakwe! Neuone shilingi mumo, iγuwe uiinkile, tikikombole nayo imi na iwe!