Read Kishambala Mateyo 2 Bible Online

Mateyo 2 - Kishambala bible

Mateyo 2

¹Yesu akibinda kuvyalwa Betelehemu mwe shi ya Yudeya mishi ya zumbe Helode, ne Yelusalemu kuhoiza watalizi wa ntondwe walawilewo mwe shi ya lwazu lwelawa zuwa.

²Wazauza angwe: Zumbe ywa Wayuda avyelweye mishi inu a kuhi? Hambu tizaona ntondwe yakwe luja lwazu lwelawa zuwa; tizaiza, timgintile mazwi.

³Zumbe Helode akiviiva azashentuka haṅwe na muzi woshe wa Yelusalemu.

⁴Azaunganyanya wavikizi wakulu na watabaluwangwa woshe wa ija mbalingwa, azawauza, ati ni muhi, ndimo Kilisito avyalwe.

⁵Wazamγamba: Ni Betelehemu mwe shi ya Yudeya; hambu ne vyegondwa ni mteγanyingwa kuγamba:

⁶Iwe Betelehemu mwe shi ya Yuda nku mdodo mwe wazumbe wa Yuda, hambu mwako mtazalawila zumbe, ndiye nezealishe mbali yangu ya Isilayeli.

⁷Ne Helode ahoitanga waja watalizi wa ntondwe he njama, azawauzisha, ati ni mishi ihi, ija ntondwe ilawileho,

⁸azawatuma Betelehemu angwe: Hitai, mdose mbuli za ako kazana na utanda! Mkikaona uyai, muniγambile, kangwe nami nihite, nimgintile mazwi!

⁹Wakibinda kuiva mbuli za zumbe wazahita. Wakiolela, iyo ntondwe, waeneyo luja lwazu lwelawa zuwa, izawalongwela, mpaka ikibula sawasawa na muja, kaja kazana kalimo, ne ihoγoloka.

¹⁰Wakiona ija ntondwe wazaona nyemi nkulu muno kabisa.

¹¹Wakiingila na muja nyumbai wazaona kaja kazana haṅwe na nine Maliya, wazakina na shi wazakagintila mazwi; vikibinda wazashungula miziγo yawe, wazakaiγaila matulo, zahabu na uvumba na mafutilo ya mluziluzi.

¹²Wazalaγiliziγwa mwe sozi, washeuye kwa Helode, ne wahoγotoka na sila ntuhu mwe shi yawe.

¹³Wakibinda kuhita, mlau ywa Zumbe azamlawila Yosefu mwe sozi, azamuti: Inuka, uγuwe ako kazana na nine, unyilike na Egiputa, uhumule γuko, mpaka ndiho nezenikuγambile! Hambu Helode agomba kulonda aka kazana, akakome.

¹⁴Yuja azainuka, azaγuwa kaja kazana na nine,

¹⁵kuke kilo, azahita Egiputa, azahumula γuko, mpaka Helode akifa, kangwe ibontoke ija mbuli ilongiγweyo ni Zumbe na kanwa cha mteγanyi kuγamba: Egiputa ne nimwitangileko ṅwanangu.

¹⁶Helode akiona, kuti azaufiγwa ni waja watalizi wa ntondwe azakwelwa ni maya mangi, azatuma, azakoma wana woshe we muja Betelehemu na kwe mizi yoshe ye tanga, wabindilewo mavuli maili na waja washiyabindilewo, sa viyaho auzizevyo waja watalizi wa ntondwe mishi ya ija ntondwe.

¹⁷Haja hazabontoka iyo mbuli ilongiγweyo ni mteγanyi Yelemiya akiγamba:

¹⁸Uko Lama kuzaivika vuzo, kulila na kukema, kangi Laheli alilila wanae, nkakunda kuhembuliziγwa, hambu wazabindiγwa.

¹⁹Helode akibinda kufa, mlau ywa Zumbe azamlawila Yosefu mwe sozi uko Egiputa,

²⁰azamuti: Inuka, uγuwe ako kazana na nine uhite mwe shi ya Isilayeli, hambu ndiwo wakilonda kukoma ako kazana wazabinda kufa.

²¹Yuja azainuka, azaγuwa ako kazana na nine, azahita mwe shi ya Isilayeli.

²²Miya akiiva, kuti Alikelawo azamhokela ishe Helode uzumbe wa Yudeya, azaogoha kuhita na kuja; azalaγiliziγwa mwe sozi, azahita lwazu lwa Galileya.

²³Akikubula azaikala mwe muzi weitangwa Nazaleti, kangwe ibontoke iyo mbuli ilongiγweyo ni wateγanyingwa kuti: Atazaitangwa Mnazaleti.