Read Kishambala Mateyo 21 Bible Online

Mateyo 21 - Kishambala bible

Mateyo 21

¹Wakibula hehi na Yelusalemu, wazaingila Betifage he mulima wa miziyaγembe; haja Yesu azatuma wahina waili, azawati:

²Hitai mwe kaja kazizi haja sheja, nemfikeona mumo nine ja mpunda, jiikantiγwe, jina ṅwanae haho; jidoholei, mujiniletele!

³Ati muntu amiuza, mtamuti: Zumbe aagiziγwa ndizo.

⁴Ne atafikazishungula. Ivi vizaγosholwa, kangwe vibontoke viya vilongiγwevyo ni mteγanyingwa kuγamba:

⁵Mγambilei mndele Siyoni: Shuyu zumbe ywako akulawila! Ni mkuwi; aipandile ṅwana njowe mweanga na nine.

⁶Waja wahina wazahita, wazaγoshola sa viyaho, Yesu awalaγilizevyo;

⁷wazaleta jiya nine ja mpunda na ṅwanae, wazamtandikila shuke zawe, vikibinda wazamkweza na mumo.

⁸Wantu wangi muno wazatandika shuke zawe silai, watuhu wazashenga masala, wazayatandika silai.

⁹Miya wantu walongolewo, hata waja wetongela wazakema angwe: Hoziyana, ṅwana Dawidi! Atogolwe mweiza mwe zina ja Zumbe! Hoziyana ulanga!

¹⁰Akiingila Yelusalemu, ipuzi woshe uzavuwanika, wakiuzanya: Kumbe uyu ni ndai?

¹¹Miya wantu wazalonga: Uyu ni mteγanyi Yesu mweanduka Nazaleti ya Galileya.

¹²Yesu azaingila mwe vikilongwa, azaγulusha woshe weγuzanya na wetaγizanya muja mwe vikilongwa, azafununkula meza za waja wetaγa senti, hata viti vya waja wetaγa visuwa manga.

¹³Azawati: Kuigondiγwe: Nyumba yangu iitangwe nyumba ya vikila, miya inywi mzaiγalusha mpanga ya wampoko.

¹⁴Muja vikiloi muzamwizila washionawo na washiγendawo, azawahonya.

¹⁵Wavikizi wakulu na watabaluwangwa wazaihilwa wakiona ivi vimaka, avyoγoshola, kangi wakiiva, wana wavyokema muja vikiloi kuγamba: Hoziyana, ṅwana Dawidi!

¹⁶Wazamuti: Waiva, awa wavyolonga? Yesu azawati: Ehe! Miya nkamfyomile kuγamba: Mwe vyanwa vya wana na vya wankebe uzaonela ntogolo?

¹⁷Azawaasha, azalawa muja kaya, azahita Betaniya, azagona γuko.

¹⁸Makelo akiuya na kuja kaya, azaluṅwa ni sala.

¹⁹Akiona mkuyu haja silai azaubasha, miya nkaene nkuyu mumo, ni mahungo du, azaulana angwe: Ukashetavyala ntunda kale na kale!

²⁰Viya du lushe uja mkuyu uzanyuluka. Wahina wakwe wakiviona wazamaka angwe: Unu mkuyu ufikilenyuluka zeze?

²¹Yesu azawahitwila angwe: Kweli namiti: Ati mwatozesha na kushekalakasha, nkemγoshole sa ivi vya unu mkuyu du, miya hata mkilaγiliza unu mulima kuti: Inuka, ukine mwe bahali!, vitabontoka.

²²Vyoshe, ndivyo mulombeze mkivika, aii mwatozesha, nemuviinkwe.

²³Akiingila vikiloi akifuza mumo, wavikizi wakulu na watawa wa mbalingwa wazamwizila angwe: Ivi uviγoshola kwa nguvu ani?

²⁴Akunkileye unu ufuṅwa ni ndai? Yesu azawalandula, azawati: Nami nimiuze mbuli ṅwenga! Mkiiniγambila, nami nitamiγambila, ati niviγoshola kwa nguvu ani.

²⁵Ubatizi wa Yohana uanduke nahi? Mwe lwingu, hambu kwa wantu? Waja wazafanyanya mwe myoyo yawe kuγamba: Ati tamuti: Mwe lwingu, atatiti: Nini mkishemtozesha?

²⁶Ati tamuti: Kwa wantu, tina woγa na wantu, hambu woshe wazafanyanya kuti: Yohana ni mteγanyingwa.

²⁷Wazamlandula Yesu angwe: Nkatitaila. Ne yohe ahowati: Lushe nami simiγambila, ati niviγoshola kwa nguvu ani.

²⁸Miya muγambai? Kuna mγoshi, ana wana waili Azamlawila yuja mkulu, azamuti: Ṅwanangu, hita lelo, ulime he chalo!

²⁹Yuja azalandula: Sikunda, miya uko nyuma azaγuwa moyo mtuhu, azahita.

³⁰Ne ahohita kwa nduγuye, azamlonga sa viyaho. Yuja azaitikila: Shimi, tate! Miya nkahitile.

³¹Lushe awa waili aγosholeye, ishe avyokunda, ni yuhi? Wazamuti: Ni yuja mkulu; miya Yesu azawati: Kweli namiti: Wangelu na watesi watamilongwela kuingila mwe uzumbe wa lwingu.

³²Hambu Yohana azaiza kwenyu, azatongela sila ya utanda, kangi nkamumtozeshe, miya wangelu na watesi wazamtozesha. Inywi mzaviona, miya hata vivyo nkamuhitule ntongonyezi zenyu uko nyuma mkitozesha.

³³Teγelezai lushimo lutuhu: Kuna mγoshi ywa chengo, azahanda mizabibu, azaidenganyiza na bibili, azafuka shimo ja minyiza mazabihu, azazenga dungu, azaiinkila kwa walimi, vikibinda azahita mwe shi ntuhu.

³⁴Yaja mazabibu yakibuza kuizwa, azatuma wabwanga wakwe kwa waja walimi, waγuwe mazabibu yakwe.

³⁵Waja walimi wazagwila wabwanga wakwe, kuṅwe wazawaluta, kuṅwe wazawakoma, kuṅwe wazawahomela mawe.

³⁶Vituhu azatuma wabwanga weγelemuka kuzinka waja wa bosi, miya waja wazawaγoshwela sa viyaho.

³⁷Kushilikiza azamtuma ṅwanae na kwawe, angwe: Ṅwanangu newaingilwe ni shoni naye.

³⁸Miya waja walimi wakimwona ṅwanangwa wazafanyanya mwe myoyo yawe kuγamba: Uyu ni mupazi; ndokoi, timkome, kangwe tiγuwe ufa wakwe!

³⁹Wazamγuwa, wazamlavya muja mwe mizabibu, wazamkoma.

⁴⁰Lushe ṅwenye mizabibu akizaiza waja walimi atazawatenda zeze?

⁴¹Wamuti: Kwa kuti ni wawiwi, alawakoma viwiwi, ainkile ija mizabibu kwa walimi watuhu, ndiwo nezewamunke mazabibu yakwe yahokaizwila.

⁴²Angwe ni Yesu: Nkamfyomile mwe baluwangwa kuti: Iwe, wazengo wabentilejo, jizaγaluka shikizi ja heta. Ivi vizaanduka kwa Zumbe; tikiviolela, ni kimaka.

⁴³Ne vyeleka, nikimiti: Inywi nezemuhokwe uzumbe wa Mulungu, uinkilwe kwe mbali ntuhu yelavya kuwo jakwe.

⁴⁴Ṅdiye akine mwe iji iwe, atazabanika, kangi iji iwe ndiye jimkinile, jitazamtiγinta.

⁴⁵Wavikizi wakulu na Mafaliseyo wakiiva shimo zakwe, wazataila, kuti awalonga wawo.

⁴⁶Wazalonda, ndivyo wamgwile, miya wazaogoha wantu, kwa kuti wazamtozesha, kuti ni mteγanyingwa.