Read Kishambala Mateyo 23 Bible Online

Mateyo 23 - Kishambala bible

Mateyo 23

¹Haja Yesu azalonga wantu haṅwe na wahina wakwe angwe:

²Mwe kiti cha Mose kuikala watabaluwangwa na Mafaliseyo.

³Vyoshe, ndivyo wamiγambile, viγosholei na kuviγolokela! Miya miγoshwele yawe msheitongele! Hambu walonga, kangi nkawaviγoshola.

⁴Washunganya miziγo mikulu, waibadika mwe maeγa ya wantu, miya wenye nkawakunda kuidowa na chala kiṅwe du.

⁵Ndima zawe zoshe waziγoshola, waolelwe ni wantu. Hambu wakuza matalatasi ya vikila, walefya mataiaza ya shuke zawe,

⁶wakundisha kuikala ha wafuṅwa wakilalikwa kwe nkande, hata mwe mavikilo wakaikala mwe viti vya wazumbe;

⁷watamilwa ni kuluγushiγwa he ndumi, wakiitangwa wakulu ni wantu.

⁸Miya inywi msheitangwe wafuzi! Hambu mfuzi ywenyu ni muṅwe, inywi nyoshe mu wanduγu.

⁹Mushemwitange muntu kunu shi kuti: Tate! Hambu ishe ywenyu ni muṅwe, ni yuja ywa kilwingu.

¹⁰Kangi msheitangwe vilongolezi! Hambu kilongolezi chenyu ni muṅwe, ni Kilisito.

¹¹Mkulu ywenyu shuti amilumikile!

¹²Ndiye akikuze ṅwenye, atazapunguziγwa, ndiye akipunguze ṅwenye, atazakuziγwa.

¹³We ukiwa ni nywiyo watabaluwangwa na Mafaliseyo! Mwahemba inywi, kwa kuti mwazuγaila wantu uzumbe wa lwingu! Wenye nkamwingila, kangi wekunda kuingila nkamuwakundiza kuingiia.

¹⁴We ukiwa ni nywiyo watabaluwangwa na Mafaliseyo! Mwahemba inywi, kwa kuti mwaja nyumba za wavyelengwa wafilwewo ni waγoshi, kangi mwakionyaonya, viya mtaisiiza kuwahembelezeza! Kwa ivyoho mtazalahwa masa yezinka ya wenyu.

¹⁵We ukiwa ni nywiyo watabaluwangwa na Mafaliseyo! Mwahemba inywi, kwa kuti mwaanga na kuomboka bahali na shi, kangwe mγalushe muntu muṅwe mhina; kangi akioneka, mwamγalusha ṅwana ywa kuzimu mwemizinka kaili!

¹⁶We ukiwa ni nywiyo vilongolezi vifilevyo mesho! Kwa kuti mwaγamba: Muntu akikilisha na vikilongwa, nkavina mbuli; miya akikilisha na zahabu ya vikilongwa atakola masa.

¹⁷Mu wababashi, kangi mu matuntu! Hambu vikulu ni vihi? Zahabu hambu vikilo jeinka zahabu utana?

¹⁸Vituhu mwaγamba: Muntu akikilisha na okelo ja ṅombe za mviko, nkavina mbuli; miya akikilisha na ṅombe ya mviko yekomelwa mumo atakola masa.

¹⁹Mu wababashi, kangi mu matuntu! Hambu vikulu ni vihi? Ṅombe ya mviko ao okelo jeinka ṅombe ya mviko utana?

²⁰Mwekilisha na okelo ja ṅombe za mviko akilisha najo ṅwenye haṅwe na vyoshe vye mumo.

²¹Mwekilisha na vikilonngwa akilisha najo ṅwenye haṅwe na yuja mweikala mumo.

²²Mwekilisha na lwingu akilisha na kitingwa cha Mulungu haṅwe na yuja mwechiikaila.

²³We ukiwa ni nywiyo watabaluwangwa na Mafaliseyo! Mwahemba inywi, kwa kuti ngoγwe na ntunduja na mpilipili mwazilavya fungu ja kumi, miya viya vye ntoγo vya mulomongwa mwavileka du, milahile ya masa na mifile ya mbazi na mitozesheze yeagiza. Inu anga mwaibasha haṅwe na kusheleka viya.

²⁴Mu vilongolezi vifilevyo mesho! Mbu mwaishwa, miya ngameya mwaimeza!

²⁵We ukiwa ni nywiyo watabaluwangwa na Mafaliseyo! Mwahemba inywi, kwa kuti vinywelo na vijiilo muvichunta se, miya uko ndai viigisize mumpa na usaba!

²⁶Iwe Faliseyo u tuntu! Bosi anachunta kinywelo uko ndai, vikibinda chidahechuntiγwa hata se!

²⁷We ukiwa ni nywiyo watabaluwangwa na Mafaliseyo! Mwahemba inywi, kwa kuti mwafanana na mbila zihambiγwezo, zikiolelwa vye se ziyatama, miya uko ndai ziimemile mavuha ya wafilewo na usaba woshe!

²⁸Vivyoho hata inywi, wantu wakimiolela, muvyooniγwa, mwafanana, viya mu watanda, miya uko ndai mwe myoyo yenyu mwigisize mihembo na ubezi wa mulomongwa.

²⁹We ukiwa ni nywiyo watabaluwangwa na Mafaliseyo! Mwahemba inywi, kwa kuti mwazenga mbila za wateγanyingwa, kangi mwahamba mazikilo ya watanda,

³⁰mwaγamba: Ati ishwi ne tii haho mishi ija ya wababa zetu, anga nkativangane nawo mwe iyo mbuli ya kukoma wateγanyingwa.

³¹Ivyoho mwakilongela uwona, kuti mu wana wa waja wakomilewo wateγanyingwa.

³²Lushe memezai kihimo cha waishe zenyu!

³³Mu nyoka, mu wana moma! Nemnyilike zeze masa ya kushindikwa na kuzimu?

³⁴Ne vyelongwa kuti: Imi natuma kwenyu wateγanyi na watalizi na walabaluwangwa, kuṅwe nemuwakome na kuwaamba mwe miti, kuṅwe mlawatowa mwe mavikilo yenyu, vikibinda mtawaγulusha mwe kila muzi,

³⁵ndimo waingile, kangwe mwingile mwe masa yoshe ya mpome ya watanda iitilweyo kunu shi, kuandiila kwe mpome ya Abeli, hambu ne ai mtanda, mpaka kwe mpome ya Zakaliya, ṅwana Balakiyo, mumkomileye haja he vikilo na he okelo ja ṅombe za mviko gati.

³⁶Kweli namiti: Inu mbali yenyu neilahwe aya masa yoshe.

³⁷Yelusalemu! Yelusalemu! Wakoma wateγanyingwa watumiγwewo na kwako, wawahomela mawe! Ni kangahi, nikikunda kuunganyanya wanawo, sa viyaho nguku ivyounganyanya visiyo mwe mawawa yakwe? Miya inywi mzalemela!

³⁸Shivyo, nyumba zenyu neziashiγwe mahuzu!

³⁹Kweli namiti: Nkezemkeniona kuandiila ivi lushe, mpaka ndiho mulonge: Atogolwe mweiza mwe zina ja Zumbe!