Read Kishambala Mateyo 25 Bible Online

Mateyo 25 - Kishambala bible

Mateyo 25

¹Haja uzumbe wa lwingu utazafanana na wandele kumi weγuwa vijali vyawe, wamγendele ṅwenye nteγuzi singili.

²Weyae wawe washano ni wadashi, washano ni wanyanyi.

³Hambu waja wadashi wazaγuwa vijali vyawe, miya nkawainule mavuta;

⁴waja wanyanyi wazainula mavuta mwe vichupa haṅwe na vijali vyawe.

⁵Yuja ṅwenye nteγuzi akikawa, woshe wazatibuka, wazasisila.

⁶Kilo kikulu kuzaiviγwa vuzo kuγamba: Shuyu ṅwenye nteγuzi! Lawilai, mumγendele singili!

⁷Waja wandele woshe wazainuka, wazaliγanya vijali vyawe.

⁸Waja wadashi wazawalonga waja wanyanyi: Tipangilei mavuta yenyu!

⁹Hambu vijali vyetu vizazima. Waja wanyanyi wazawalandula angwe: Do, kangwe tishezakosa toshe, ishwi haṅwe na inywi! Miya hitai kwa wachuluzi, mkakiγulile!

¹⁰Waja wakihita kwa γula, ṅwenye nteγuzi azaiza; waja wabindilewo kukiteγa wazaingila haṅwe naye mwe nteγuzi, vikibinda luvi luzazuγalwa.

¹¹Uko nyuma kuzaiza waja wandele watuhu wohena angwe: Zumbe! Zumbe! Tizuγwile!

¹²Yuja azawalandula angwe: Kweli namiti: Simitaila.

¹³Kwa ivyoho gonai mesho! Hambu nkamtaila mushi ao saa, ṅwanangwa ywa muntu ahozaiziia.

¹⁴Sa vivyoho vya muntu mwetamba, akiitanga wapuna wakwe, awapangile viya, avyona navyo.

¹⁵Muṅwe azamunka miziγo mishano ya feza, muṅwe miziγo mili ya feza, muṅwe mziγo muṅwe wa feza, kila sa midahile yakwe ilivyo; vikibinda azahita.

¹⁶Viya du lushe yuja ainkiγweye miziγo mishano ya feza azaiγuwa, azalungiliza nayo, azaonela nayo mituhu mishano.

¹⁷Vivyoho yuja ainkiγweye mili, azamota mituhu mili.

¹⁸Miya yuja aγwileye muṅwe azahita, azaufukila, akifishiza fezangwa za zumbe ywakwe.

¹⁹Mishi mingi ikizinka, baba ywa waja wapuna azaγotoka, azatala nawo.

²⁰Yuja ainkiγweye miziγo mishano ya feza azamletela miziγo mituhu mishano ya feza angwe: Zumbe, uzaninka miziγo mishano ya feza, shinu miziγo mituhu mishano, nimotileyo!

²¹Baba yakwe azamuti: U mupuna mtana mkoolezi, uzaγolokela viya viγeke, nenikugimbike, uγolokele vingi. Ingila kwe nyemi ya baba yako!

²²Vikibinda kuzaiza yuja ainkiγweye miziγo mili ya feza, azalonga: Zumbe, uzaninka miziγo mili ya feza, shinu mituhu mili, nimotileyo!

²³Baba yakwe azamuti: Iwe u mupuna mtana mkoolezi, uzaγolokela viya viγeke, nenikugimbike, uγolokele vingi! Ingila kwe nyemi ya baba yako!

²⁴Vikibinda kuzaiza yuja ainkiγweye mziγo muṅwe wa feza, azalonga: Zumbe, nizakutaila kuti: U muntu mwena ntoγo, uhaγobola ushihandileho, uhaγuwa ushimyaγileho.

²⁵Ne vinigwizizevyo woγa, nizahita, nizafukila feza yako mwe shanga, shinu mali yako!

²⁶Baba yakwe azamlandula angwe: U mupuna mubada mwena chevu; ati uzataila kuti:

²⁷Nihaγobola nishihandileho, kuti: Nihaγuwa nishimyaγileho, anga uzahita, ukainkila feza zangu kwa wachuluzi, nanga imi nikiiza nizaγuwa vyangu na kuwo.

²⁸Mumhokei mziγo wa feza, mumunke yuja mwena miziγo kumi!

²⁹Hambu kila mwena kitende atainkwa vivyoho, aisiize kuγenyeza, miya ashinaye, hata viya, avyona navyo, atavihokwa.

³⁰Miya uyu mupuna mchevu mshindikei na kwe lwiza ludala uko se! Ne ndiko kuivike kulila na kukemeza meno.

³¹Aho ndiho ṅwanangwa ywa muntu nezeaizile na utana wakwe haṅwe na walau wosheni, ne ndiho aikale mwe kiti cha utana wakwe.

³²Vikibinda mbali zoshe zitaunganyanyiγwa na haja, aliho, aziahule, sa mulishi avyoahula ngoto na mbuzi.

³³Ngoto ataziika kulume kwakwe, mbuzi kumosho.

³⁴Vikibinda Zumbe atalonga waja we kulume kwakwe kuγamba: Izai, inywi waṅazi wa Tate, mupale uzumbe mwikilwewo inywi aho, shi ikiumbiγwa!

³⁵Hambu ne niina sala, mzaninka vya ja; ne niina nkilu, mzaninka vya nywa;

³⁶ne nii mγeni, mzanifikiza; ne niishina vya zwika, mzanivutila; ne nii mtamu, mzanikaula; ne nii mwe chumba, mzaiza kwa niluγusha.

³⁷Ne ndiho waja watanda wamwitikile kuγamba: Zumbe, ni lini tikikuona, wina sala, tikikunka vya ja, ao du wina nkilu, tikikunka vya nywa?

³⁸Ni lini tikikuona, ui mγeni, tikikufikiza, ao uishina shuke, tikikuvutila?

³⁹Ni lini tikikuona, ui mtamu ao ui mwe chumba, tikikukaula?

⁴⁰Zumbe atawahitwila, atawati: Kweli namiti: Awa wanduγu wangu wadodo, vyoshe mumγoshwelevyo ṅwiyae ywawe muṅwe, mzaviniγoshwela imi.

⁴¹Vikibinda atalonga waja we kumosho kuti: Ukai kwangu, inywi mulaniγwewo! Hitai kwe moto ushizimawo, waashiziγwawo yuja ṅwenye leba na walau wakwe!

⁴²Hambu ne niina sala, nkamuninkile vya ja; ne niina nkilu nkamuninkile vya nywa;

⁴³ne nii mγeni, nkamunifikize; ne niishina vya zwika, nkamunivulile; ne nii mtamu, ao ne nii mwe chumba, nkamunikaule.

⁴⁴Ne ndiho waja wohe wamhitwile kuγamba: Zumbe, ni lini tikikuona, uina sala ao nkilu, ui mγeni, uishinavya zwika, ui mtamu, ui mwe chumba, tikishekutumikila?

⁴⁵Ne ndiho awalandule kuti: Kweli namiti: Awa wadodo, vyoshe mwashamγoshwelavyo ṅwiyae ywawe muṅwe, hata imi nkamuviniγoshwele.

⁴⁶Awa watahita kwe mlaho wa kale na kale, miya waja watanda watahita kwe nkalamo ya kale na kale.