Read Kishambala Mateyo 28 Bible Online

Mateyo 28 - Kishambala bible

Mateyo 28

¹Mushi wa sabato ukizinka, mhitu wakwe wa bosi kuke mazenganyizi Maliya Magadalene na yuja Maliya mtuhu wazahita kwa kaula ija mbila.

²Wakiolela, kuzazinka mdidimo mkulu, mlau ywa Zumbe azalawa mwe lwingu, azasheela, azabuia, azashindika jiya iwe, akibinda azajiikaila.

³Muntu akimwolela, afanana, viya ni lumuli, shuke zakwe zizaṅalisha sa kau.

⁴Waja waluγojo wazaingilwa ni woγa naye, wazaukwa ni vizingizo, wazahituka viya watefa.

⁵Yuja mlau azalonga waja wavyele angwe: Msheogohe inywi! Hambu nataila kuti: Mumlonda Yesu akontelweye mwe muti.

⁶Nkaho aha, hambu azafufuka, sa alongilevyo; izai, mwolele aha hantu, ndiho ailele!

⁷Hitai nguzu mγambile wahina wakwe kuti: azafufuka kwa wafilewo! Neamilongwele na Galileya, ne ndiko mumwone!

⁸Shivyo, nizavimiγambila. Wazafikauka haja he mbila na woγa ungi, kangi na nyemi nkulu; wazaγuluka, waviukwile wahina wakwe.

⁹Haja silai wazakintana na Yesu, azawaluγusha angwe: Mpeho na inywi! Waja wazaniubasha, wazadowa milundi yakwe, wazamkinila.

¹⁰Ne Yesu ahowati: Msheogohe! Hitai, muvibilikile wanduγu wangu, kangwe wahite Galileya! Ne ndiko wamone.

¹¹Wakihita, waluγojo kuṅwe wazahita na kaya, wazashimwela wavikizi wakulu vyoshe vionekevyo.

¹²Waja wazaunganana haṅwe na watawa, wazalonga njama, wazaivana kuγuwa feza nyingi, wazaziwainka waja washilikali,

¹³wazawaγamba: Longai kuti: Wahina wakwe wazaiza na kilo, wazabawa kimba chakwe, ishwi tiisisile.

¹⁴Ati ulongo wa inu mbuli wahita kwa bula kwa mtoza shi, ishwi netimdahe, inywi nkezemwone mbuli.

¹⁵Waja wazaγuwa ziya feza, wazaγoshola, sa watunyiγwevyo. Miya inu mbuli yashimwelwa kwa Wayuda mpaka lelo.

¹⁶Waja wahina kumi na muṅwe wazahita Galileya kwe uja mulima, Yesu awalaγilizewo;

¹⁷wakimwona, wazamkinila, miya kuṅwe wazakalakasha.

¹⁸Yesu azawaizila, azawalonga angwe: Nizainkwa ufuṅwa woshe uko mwe lwingu na kunu shi.

¹⁹Hitai, mkaγalushe mbali zoshe wahina wangu mkiwabatiza mwe zina ja Tate na ja Ṅwana na ja Mpeho mṅazi,

²⁰mkiwafuza kutozesha vyoshe, nimilaγilizevyo! Kaungi imi ni haṅwe na inywi mishi yoshe, mpaka inu shi ndiho ibindilizike.