Read Kishambala Mateyo 4 Bible Online

Mateyo 4 - Kishambala bible

Mateyo 4

¹Vikibinda Yesu azaiγalwa ni mpehongwa na nyika, akaγezwe ni ṅwenye leba.

²Akifunga mfungo mishi milongo mine na vilo milongo mine kubindiliza azaluṅwa ni sala.

³Ne mtakuγeza ahomwizila angwe: Ati u ṅwana Mulungu, longa, aya mawe yaγaluke nkande!

⁴Miya yuja azalandula angwe: Kuigondiγwe: Siyo nkande ike yemleka muntu aikale ugima, miya ni kila mbuli yelawa mwe kanwa cha Mulungu.

⁵Vikibinda yuja ṅwenye leba azamγuwa, azamwiγala mwe muzi mṅazi, azamγolosha mwe vikilongwa ulanga he heta,

⁶azamuti: Ati u ṅwana Mulungu, lumbila na shi! Hambu kuigondiγwe: Atakulaγiliziza walau wakwe, wakuambate na mikono, kangwe mulundi wako usheukwile he iwe!

⁷Yesu azamuti: Vituhu kuigondiγwe: Ushezamγeza Zumbe, Mulungu ywako!

⁸Vituhu yuja ṅwenye leba azamγuwa, azamwiγala mwe mulima mule muno, azamwonyesha uzumbe woshe wa kunu shi na uzuli wakwe,

⁹azamuti: Ivi vyoshe nitavikunka, ati wanikinila na kunivika.

¹⁰Ne Yesu ahomlonga: Uka aha, Satani! Hambu kuigondiγwe: Umvike Zumbe, Mulungu ywako, na kumtumikila yuja ike!

¹¹Ne ṅwenye leba ahomleka; akiolela, walau wazamwizila, wazamγoshwela ndima.

¹²Yesu akiiva, kuti Yohana azagelwa mwe chumba, azahita Galileya.

¹³Azauka kuja Nazaleti, azahita, azaikala Kapelinaumu, ni muzi we hehi na bahali mwe shi ya Sebuluni na ya Nafutali,

¹⁴kangwe kubontoke ija mbuli ilongiγweyo ni mteγanyi Yesaya akiγamba:

¹⁵Mwe shi ya Sebuluni na ya Nafutali ye hehi na bahali sheja ja Yolodani, yeitangwa Galileya ya wamzimu,

¹⁶uko wantu weikala mwe lwiza waona langaila kulu, weikala mwe kizuli cha kifa langaila jawalawila.

¹⁷Haja ne Yesu aandiileho kubilikila akiγamba: Hitulai ntongonyezi zenyu! Hambu uzumbe wa lwingu u hehi.

¹⁸Akianga nkandankanda he bahali ya Galileya azaona wanduγu waili, Simoni mweitangwa Petelo na nduγuye Andeleya, wagela lwavu mwe bahali, hambu ni walowi.

¹⁹Awati: Nitonge lai, nimiγalushe walowa wantu!

²⁰Waja wazafikaasha nyavu zawe, wazamtongela.

²¹Akihita na mazu hadodo azaona wanduγu waili watuhu, Yakobo, ṅwana Zebedeyo, na nduγuye Yohana, wa mwe chombo haṅwe na ishe ywawe Zebedeyo, wachunta nyavu zawe. Ne ahowaitanga.

²²Waja wazafikaasha chombo chawe, hata ishe ywawe, wazamtongela.

²³Azaanga mwe shi ngima ya Galileya akifuza mwe vikilo na kubilikila ulau wedi wa uzumbengwa na kuhonya mahisho na manyonge yoshe yena wantu.

²⁴Nguma yakwe izaγendesha, izagisa hata shi ngima ya Siliya. Wazamwiγaila Yesu woshe wehuma, wetoziγwa ni mahisho na manyonge mangi, wehuma mpepo, wena luzwili, hata wena pengene, azawahonya woshe.

²⁵Wantu wangi wazamtongela, weanduka Galileya na mwe iyo mizi kumi na Yelusalemu na Yudeya na mwe shi ye sheja ja Yolodani.