Read Kishambala Mateyo 5 Bible Online

Mateyo 5 - Kishambala bible

Mateyo 5

¹Akiona mabumba azakwela mwe ntuli; akiikala, wahina wakwe wazaiza na kwakwe.

²Azainula kanwa chakwe, azawafuza angwe:

³We nyemi ni wakiwa wa kimpeho, hambu uzumbe wa lwingu ni wawe.

⁴We nyemi ni waja weduma ukiwa, hambu watazahembuliziγwa.

⁵We nyemi ni wahozu, hambu watazapala inu shi.

⁶We nyemi ni waja wena sala na nkilu ya utanda, hambu watazaiγushiγwa.

⁷We nyemi ni waja wena mbazi, hambu watazaonelwa mbazi.

⁸We nyemi ni waja wena myoyo yeṅala, hambu watazamwona Mulungu.

⁹We nyemi ni waja weivanya weyae wawe, hambu watazaitangwa wana Mulungu.

¹⁰We nyemi ni waja weingatwa kwa mbuli ya utanda, hambu uzumbe wa lwingu ni wawe.

¹¹Muna nyemi inywi, wantu wakimikanka, wakimiingata, wakimishinga mbuli mbada zoshe za mambeza kwa mbuli ya imi.

¹²Tamilwai na kutowa mazumo! Hambu upokezi wenyu mwe lwingu ni ungi; hambu vivyoho wazaγulusha hata waja wateγanyi wamilongwelewo.

¹³Inywi mu munyu wa inu shi. Ati munyu wabanika, utakola zeze vituhu? Nkauna ndima lushe, utaashiγwa du, ujatwe ni wantu.

¹⁴Inywi mu langaila ja ngulu ngima. Muzi weikala mwe ntuli ulanga nkaukifisha.

¹⁵Wantu wohena wakikoleza taa nkawaifunikila ngahu, waiika mwe kiikilo chakwe, imulikile woshe we muja nyumbai.

¹⁶Vivyoho lekai, hata langaila jenyu jimulikile wantu, waone ndima zenyu ntana, wakamtogole ishe ywenyu mweikala mwe lwingu!

¹⁷Mshefanyanye, kuti nizaiza, nichakule mbuli za mulomongwa ao za wateγanyingwa! Siizile nichakule, niizile nibontoleze.

¹⁸Kweli namiti: Mpaka lwingu lubanike haṅwe na inu shi, miya mulomongwa nkeubanike kagonde ao kasonono kaṅwe du, shuti vyoshe vinebontoka!

¹⁹Lushe ndiye aushe mulaγilizo muṅwe du, hata ni mdodo kabisa, kangi akifuza wantu ivyoho, mwe uzumbe wa lwingu uyu atazaitangwa mdodo ṅwenye; miya ndiye auγoshole na kufuza wantu ivyoho, mwe uzumbe wa lwingu uyu atazaitangwa mkulu.

²⁰Hambu namiti: Utanda wenyu ukishezinka uja wa watabaluwangwa na uja wa Mafaliseyo nkezemwingile mwe uzumbe wa lwingu.

²¹Mzaiva kuti: Wakale wazaγangwa: Ushekome! Ndiye akome atakola masa.

²²Miya imi namiti: Kila mwena maya na mnduγu ywakwe atazakola masa; ndiye amweze mnduγu ywakwe, atazakola masa bomani, ndiye amkanke, atazakola masa ya kushindikwa mwe moto wa kuzimu.

²³Ati waiγala tulo jako vikiloi, lushe uko ukifukila, kuti mnduγu ywako ana mfundo mwe moyo kwa mbuli ya iwe,

²⁴asha tulo jako kuja kwe vikilo, unehita kwa ivana na mnduγu ywako, ukibinda udaheiza, uiγale tulo jako!

²⁵Ṅwiyawo mwekuifya ufikemγendela na uhozu ukena naye silai, kangwe uyu ṅwiyawo mubada ashezakuinkila kwa mlaha masa, uyu mlaha masa akikuinkila kwa mshilikali, ukigelwa mwe chumba!

²⁶Kweli nakuti: Nkezeumlawe muja, shuti unemliha ṅwiyawo na kusheshiγaza, ati ni kahela kaṅwe du.

²⁷Mzaiva kuti: Wakale wazalongwa: Ushetende kilanga!

²⁸Miya imi namiti: Kila mwemwolela mvyele na luzisho azabinda kutenda kilanga naye mwe moyo wakwe.

²⁹Ati zisho jako ja kulume jakunda kukuhosa, ujifokole, ujiashe! Hambu ni vitana, dango iṅwe ja ṅwili wako jikibanika, kushima ṅwili wako mgima ukishindikwa na kuzimu.

³⁰Ati mkono wako wa kulume wakunda kukuhosa, uushenge, uuashe! Hambu ni vitana, dango iṅwe ja ṅwili wako jikibanika, kushima ṅwili wako mgima ukishindikwa na kuzimu.

³¹Kangi kuzalongwa: Ndiye alekane na muke, shuti amunke cheti cha kulekana!

³²Miya imi namiti: Ndiye alekane na muke, ati so kwa mbuli ya kilanga, aleka, yuja atende kilanga, kangi ndiye aγuwe mvyele alekiγweye ni mγoshi ywakwe, atenda kilanga.

³³Vituhu mzaiva kuti: Wakale wazalongwa: Ushekilishe ulongo du! Miya shuti umlihe Zumbe malape yako!

³⁴Miya imi namiti: Ushezakilisha hata hadodo! Ushekilishe na lwingu! Hambu ni kiti cha Mulungu.

³⁵Ushekilishe na inu shi! Hambu ne ayoikila milundi yakwe. Ushekilishe na Yelusalemu! Hambu ni muzi wa Zumbe mkulu.

³⁶Ushekilishe na mutwi wako! Kwa kuti luzwili luṅwe du nkudaha kuluṅaza haidu kuluchusha.

³⁷Mkilonga: Ndivyo, shuti ndivyo kweli! Mkilonga: Sivyo, shuti sivyo kweli! Vyezinka aho, viandusha vibada.

³⁸Mzaiva, kuti viyakalongwa: Zisho jilihiγwe zisho! Zino jilihiγwe zino!

³⁹Miya imi namiti: Ṅwiyawo mubada ushemwikile nkani! Ndiye akutowe kibao mwe tama ja kulume, umtendezwile hata tama tuhu!

⁴⁰Ndiye akunde kukulaha masa, aγuwe nkazu yako, umleke, aγuwe hata shuke yako ya kiγubika.

⁴¹Ndiye akukungumize, uhite naye ntambo ṅwenga, γesanya naye hata mbili! Mwekulombeza umunke!

⁴²Hata yuja mwekunda kukuambala ushemnyime!

⁴³Mzaiva, kuti vizalongwa: Umkundishe ṅwiyawo, umshuke munkulu ywako!

⁴⁴Miya imi namiti: Kundishai wankulu wenyu, mhembelezeze waja wemiifya,

⁴⁵kangwe mγaluke wana wa ishe ywenyu mweikala mwe lwingu! Kangi aleka, zuwa jakwe jiake kwa wabada na kwa watana, hata fula aileka, igwe kwa watanda na kwa wahuza.

⁴⁶Hambu ati mwakunda waja wemikundisha, muna upokezi ani? Wangelu wohena nkawaγoshola ivyoho?

⁴⁷Ati mwaluγushana na wanduγu wenyu du, mzinka zeze watuhu? Wamzimu wohena nkawaγoshola ivyoho?

⁴⁸Kwa ivyoho γalukai watakuzifya sa ishe ywenyu ywa kilwingu avyo mtakuzifya!