Read Kishambala Mateyo 6 Bible Online

Mateyo 6 - Kishambala bible

Mateyo 6

¹Teγelezai utanda wenyu msheuγoshole he mesho ya wantu mkiolelwa ndiwo! Ati mu ivyoho, nkamna upokezi kwa ishe ywenyu mweikala mwe lwingu.

²Ndiho uinkile cha mbazi, usheleke, ukitowelwa gunda haja uhoinkila, sa waja wehemba wavyoγoshola mwe mavikilo, hata lwazoi, kangwe watogolwe ni wantu! Kweli namiti: Wazabinda kuγuwa upokezi wawe.

³Miya iwe ukiinkila cha mbazi uleke, mkono wako wa kumosho ushetaile, wa kulume uvyoγoshola,

⁴kangwe chiya cha mbazi yako chifishiγwe! Kangi isho mweona viya vyefishiγwa atazavikuuziza.

⁵Mkivika mshefanane na waja wehemba! Hambu wakundisha kuvika waiγoloke, ati ni mwe mavikilo, ati ni he makintanilano ya sila za muzi, kangwe waoniγwe ni wantu; kweli namiti: Wazabinda kuγuwa upokezi wawe.

⁶Miya iwe ukivika ingila nyumbai mwako mwe chumba che ndai, uzuγale luvi, udahemvika isho uikifishize! Kangi isho mweikala ashihooniγwa atazavikuuziza.

⁷Mkivika mshehakilongela mbuli nyingi, sa wamzimu wavyoγoshola! Hambu wafanyanya, wakilonga mbuli nyingi wataiviγwa.

⁸Mshekifanyanye nawo! Hambu ishe ywenyu ataila viya vyemitala, mushizati mumhembeleze.

⁹Vikai ivyoho: Tate yweshu we uko mwe lwingu!

¹⁰Zina jako jigimbikwe! Uzumbe wako uize! Uvyokunda vibontoke kunu shi sa uko mwe lwingu!

¹¹Utinke lelo nkande yetu yetiagiza!

¹²Utiushilize masa yetu, sa ishwi tivyowaushiliza weshu masa!

¹³Ushetiingize mwe miγezo! Miya utivunile mwe vibada! Hambu wako ni uzumbe na nguvu na utana kale na kale.

¹⁴Hambu mkiushiliza wenyu wavyomibanila, hata ishe ywenyu ywa kilwingu atazamiushiliza vyenyu.

¹⁵Miya mkishewaushiliza wenyu, hata ishe ywenyu nkezeamiushilize muvyobana.

¹⁶Mkifunga msheifye vyeni, sa waja wehemba wavyoγoshola! Hambu waja wafisha vyeni vyawe, kangwe waoniγwe ni wantu kuti: Wafunga. Kweli namiti: Wazabinda kuγuwa upokezi wawe.

¹⁷Miya iwe ukifunga shisha mutwi wako mavuta,

¹⁸kangi uhake cheni chako, kangwe usheoniγwe ni wantu kuti: Wafunga, uoniγwe ni isho mweikala hashihooniγwa! Kangi isho mweona vyefishiγwa atazavikuuziza.

¹⁹Mshekiumbikile mali kunu shi! Hambu kunu zabindwa ni visaga na nkanga, kangi zafokolwa, zabaiγwa ni wabavi.

²⁰Miya kiumbikilei mali mwe lwingu! Hambu kuja nkazibindwa ni visaga na nkanga, kangi nkazifokolwa, nkazibaiγwa ni wabavi.

²¹Hambu mali yako iliko, ne moyo wako uliko.

²²Langaila ja ṅwili ni zisho; ati zisho jako ni jedi, ṅwili wako woshe una langaila.

²³Miya ati zisho jako ni bada, ṅwili wako woshe una lwiza. Lushe viya vye langaila mwe ṅwili wako vikitenda kiza, kiza ṅwenye chiinga hahi?

²⁴Nkakuna mwedaha kutumikila wazumbe waili; hambu atamshuka yuja muṅwe, amkundishe yuja mtuhu, ao akianga na yuja ywa bosi atamubela yuja mtuhu; nkamdaha kumtumikila Mulungu haṅwe na mali ya kiinushi.

²⁵Ne vyeleka, nikimiti: Msheje sungu kwa mbuli ya ugima wenyu kuγamba: Tijei? ao du: Tinywei? Msheje sungu kwa mbuli ya mili yenyu kuγamba: Tizwikei? Ugima so ukulu kuzinka ṅkande? Ṅwili so mkulu kuzinka shuke?

²⁶Olelai madeγe yeanga ulanga! Nkayahanda, nkayaluka, nkayaika mako, kangi ishe ywenyu ywa kilwingu ayashuγa. Inywi nkamuyazinka hakulu?

²⁷Kwenyu kuna muntu mwedaha kuongeza mishi yakwe kahindi kaṅwe du na kupikapika kwakwe?

²⁸Nini mkikionya sungu kwa mbuli ya shuke? Hinilai mwe vititi vya tunduwi, vivyokula! Nkavina ndima, nkaviluka shuke.

²⁹Kangi namiti: Hata Salomo aγenyezeye utana wakwe ungi nkavutile sa kititi kiṅwe.

³⁰Ati Mulungu avutila ivyoho mani ya tunduwi yeikala lelo, kangi keloi yaashiγwa mwe moto, asheisiize kumivutila inywi? Nini mkishetozesha vyedi?

³¹Msheje sungu kuγamba: Tijei? ao du: Tinywei? ao du: Tizwikei?

³²Ivi vyoshe wamzimu ne wevilonda. Hambu ishe ywenyu ywa kilwingu ataila, kuti mwaagiziγwa ni ivi vyoshe.

³³Kuandiila londai uzumbe wa lwingu na utanda wakwe! Ne ndivyo mwinkwe viya vyoshe.

³⁴Msheje sungu kwa mbuli za keloi! Mushi wa keloi una zakwe sungu. Vyabesha, kila mushi una ntoγo zakwe.