Read Kishambala Mateyo 7 Bible Online

Mateyo 7 - Kishambala bible

Mateyo 7

¹Mshelahe wenyu, kangwe mshezalahiγwa!

²Hambu milahile, ndiyo mulahe nayo, ne ndiyo nezemulahiγwe nayo, kangi kihimo, ndicho muhime nacho, ne ndicho nezemuhimilwe nacho.

³Nini ukiolela kashashani ke mwe zisho ja ṅwiyawo; miya jiya γoγo gima je mwe zisho jako nkujiona?

⁴Ṅwiyawo umlonga zeze: Leka, niushe kashashani ke mwe zisho jako? Kangi shivyo: Γoγo gima ji mumo mwe zisho jako!

⁵Wahemba iwe! Kuandiila usha jiya γoγo mwe zisho jako! Ukibinda udaheolela, ndivyo uushe kaja kashashani ke mwe zisho ja ṅwiyawo!

⁶Viṅazingwa msheviinkile kwe makuli! Kangi makalata yenyu msheyaashe kwe nguluwe, zishezayajata na milundi vawe, zikimihitukila, zikimimokolamokola.

⁷Lombezai! Nemwinkwe. Londai! Nemwone. Goṅondai! Nemzuγwilwe.

⁸Hambu kila mwelombeza ainkwa, mwelonda aona, mwegoṅonda azuγwilwa.

⁹Hambu kwenyu kuna muntu, ndiye amunke ṅwanae iwe, akimlombeza nkande?

¹⁰Ao du akimlombeza kapala, amunke nyoka?

¹¹Lushe ati inywi wabada mwadaha kuinka wana wenyu vintu vitana, ishe ywenyu mweikala mwe lwingu asheisiize kuinka vintu vitana waja wemlombeza?

¹²Vyoshe muvyokunda, wantu wavimiγoshwele, andiilai inywi kuviwaγoshwela! Ne bontokelo ja mulomongwa na ja wateγanyingwa.

¹³Ingilai mwe nkili finyu! Hambu kuna nkili sangalamu na sila nkulu, ne yeonya kwa banikila; weiingila ni wangi.

¹⁴Kangi kuna nkili finyu na sila shishili, ue yeonya kwe ukalamo, weiona ni waγeke.

¹⁵Kiγojei kwa mbuli za wateγanyi wa ulongo! Waiza kwenyu waizwikile sa ngoto, miya uko ndai ni mashuwi yena upakuzi:

¹⁶Nemuwataile na miγoshwele yawe! Sabibu wantu wazishenga mwe mishewa? Ao nkuyu wantu wazishenga mwe migunga?

¹⁷Ivyoho kila muti mtana uvyala matunda matana, kila muti mbada uvyala matunda mabada.

¹⁸Muti mtana nkaudaha kuvyala ntunda mbada, muti mubada nkaudaha kuvyala ntunda ntana.

¹⁹Kila muti ushiwotenda kuwo jedi wakelwa, waashiγwa mwe moto.

²⁰Kwa ivyoho nemuwataile na miγoshwele yawe!

²¹Weniitanga Zumbe! Zumbe! Nkawaingila woshe mwe uzumbe wa lwingu, miya ni waja du weγoshola Tate mweikala mwe lwingu avyokunda.

²²Mushi uja wangi newaniγambe: Zumbe! Zumbe! Nkatibilikile mwe zina jako? Nkatiingate mpepo mwe zina jako? Nkatiγoshole vilozo vingi mwe zina jako?

²³Ne ndiho niwalavilize kuγamba: Kale hoshe samitaile, ukai kwangu, inywi mγosholewo vishivyoγosholwa!

²⁴Kila muntu mweiva izi mbuli zangu akiziγoshola atafanana na muntu mkiyuγo mwezenga nyumba yakwe kunguwi.

²⁵Hata fula iisiize, mito imeme, mpeho ikuntishe, itowe ija nyumba nkaikina, hambu izashikainiziγwa mwe kungu.

²⁶Kangi kila muntu mweiva izi mbuli zangu akisheziγoshola atafanana na muntu mubabashi mwezenga nyumba yakwe mwe mshangalaγala.

²⁷Fula ikiisiiza, mito ikimema, mpeho ikikuntisha, ikitowa ija nyumba, itakina, kangi kuchakuka kwakwe ni kukulu.

²⁸Yesu akibinda izi mbuli, wantu wazashentuka mifuzize yakwe.

²⁹Hambu azawafuza sa muntu mwena ufuṅwa, nkafanane na watabaluwangwa we kwawe.