Read Kishambala Mateyo 9 Bible Online

Mateyo 9 - Kishambala bible

Mateyo 9

¹Azaingila mwe chombo, azaomboka na sheja, azahita kwe muzi wakwe ṅwenye.

²Ne wahomletela mtamu ywa pengene, ailele mwe lusazi. Yesu akiona mitozesheze yawe azamlonga yuja mtamu: Nwanangu, toγwa ni moyo! Uhuza wako uzauushiliziγwa.

³Ne watabaluwangwa kuṅwe waholonga mwe myoyo yawe kuγamba: Uyu amweza Mulungu!

⁴Yesu akiona ntongonyezi zawe azalonga: Nini mkitongonyeza mbuli mbada mwe myoyo yenyu?

⁵Vihufu ni vihi? Kulonga: Uhuza wako uzaushiγwa, haidu kulonga: Inuka, ukaange?

⁶Miya mtaile kuti: Ṅwanangwa ywa muntu ana ufuṅwa kunu shi wa kuushiliza uhuza! Ne ahomlonga yuja mtamu ywa pengene: Inuka, uinule lusazi lwako, uhite na kaya kwako!

⁷Azainuka, azahita na kaya kwakwe.

⁸Wantu wakiviona wazabulwa ni woγa, wazamtogola Mulungu, kuti azawainka wantu ufuṅwa we ivyoho.

⁹Yesu akihauka azaona muntu, aiikale he ngelu, ailangwa Mateyo; uyu azamlonga: Nitongela! Ne ahoinuka akimtongela.

¹⁰Akija nkande nyumbai, kuzaiza wangelu na wahuza wangi, wazaja haṅwe na Yesu na wahina wakwe.

¹¹Mafaliseyo wakiviona wazawalonga wahina wakwe angwe: Nini mfuzi ywenyu akija na wangelu na wahuza?

¹²Akiviiva azalonga: Weikala ugima nkawaagiziγwa ni mγanga, ni waja wehuma. Ndokoi!

¹³Tailai bontokelo ja iyo mbuli ya kuγamba: Nakunda mbazi, sikunda ṅombe za mviko! Hambu siizile, niitange watanda, niizile niitange wahuza.

¹⁴Haja wahina wa Yohana wazamwizila angwe: Nini ishwi na Mafaliseyo tikifunga, wahina wako wakishefunga?

¹⁵Yesu azawati: Welalikilwa nteγuzi wadaha zeze kuona ukiwa, yuja ṅwali wakeanga naye? Mishi yaiza, ndiho ṅwali nezeaushiγwe kwawe ne ndiho wafunge.

¹⁶Nkakuna mwegela ndame ya shuke mpya mwe nkazu shakazu; anga haja hoshe, ashumileho, hauka mwe iyo nkazu, lushe langa jakwe ni kulu kuzinka jiya ja bosi.

¹⁷Kangi nkakuna mwegela mvinyo mwishi mwe mabene mashakazu, anga aya mabene yatatuka, uja mvinyo ukaitika, kangi mabene yohe yabindilizika; miya mvinyo mwishi muntu augela mwe mabene mahya, ne kuhonya mvinyo haṅwe na mabene.

¹⁸Akiwalonga izi mbuli, kuzaiza mfuṅwa, azamkinila angwe: Ṅwanangu ywa kindele azafa ivi lushe; miya iza, umubadikile mkono! Ne ndivyo auye moyo.

¹⁹Yesu azainuka azamtongela na wahina wakwe.

²⁰Kuna mvyele alawileye mpome mavuli kumi na maili, azamwizila nyuma,

²¹azadowa lusiniko lwa nkazu yakwe. Hambu azafanyanya mwe moyo wakwe kuγamba: Ati nadowa nkazu yakwe du, nenihone.

²²Miya Yesu azahituka, azamwolela, azamuti: Toγwa ni moyo, ṅwanangu! Mitozesheze yako izakuhonya.

²³Ne yuja mvyele ahonileho ni haho. Yesu akiingila mwe nyumba ya yuja mfuṅwa, akiona wetowa miluli na wantu wangi wevunka,

²⁴azawati: Ukai! Hambu aka kandele nkakafile, katesisila du.

²⁵Miya wazamsheka. Wantu woshe wakibinda kumlaviγwa, azaingila, azatoza mkono wakwe, ne kaja kandele kahoinuka.

²⁶Nguma ya inu mbuli izaγenda, izagisa ija shi ngima.

²⁷Yesu akihauka, matuntu maili yazamtongela, wakikema angwe: Tife mbazi, ṅwana Dawidi!

²⁸Akiingila na nyumbai, yaja matuntu yazamwizila; Yesu azawati: Mwatozesha, kuti nadaha kuviγoshola ivi? Wazamwitikila: Zumbe, ehe.

²⁹Ne ahodowa mesho yawe angwe: Viya muvyotozesha vimibontokele!

³⁰Ne mesho yawe yahoγubuka. Vikibinda Yesu azawashunda angwe: Olelai, muntu ashezavitaila!

³¹Miya waja wakimlawa wazabilikila mbuli yakwe mwe ija shi ngima.

³²Wakimlawa muja, wazamletela bubu mwehuma mpepo.

³³Iyo mpepo ikiingatwa, yuja bubu azalonga. Wantu wazavimaka, wazaγamba: Kale hoshe mwe Waisilayeli mbuli ye ivyoho nkayaoniγwe.

³⁴Miya Mafaliseyo wazaγamba: Aingata mpepo kwa nguvu ya zumbe ywa mpepo.

³⁵Yesu azaanga mwe mizi yoshe, hata mwe mizi ye tanga akifuza mwe mavikilo yawe na kubilikila ulau wedi wa uzumbengwa, vikibinda azahonya mahisho na manyonge yoshe.

³⁶Akiolela waja wantu azabulwa ni utungu nawo, kwa kuti waonyiγwa lulali, waiasakane, viya ni ngoto zishinazo mulishi.

³⁷Ne aholonga wahina wakwe: Uluki ni ukulu, miya wandima ni waγeke.

³⁸Mhembelezei ṅwenye uluki, atume wandima kwe uluki wakwe!