Read Kishambala Maliko 11 Bible Online

Maliko 11 - Kishambala bible

Maliko 11

¹Wakibula hehi na Yelusalemu mwe muzi wa Betifage na wa Betaniya he mulima wa miziyaγembe, azatuma wahina wakwe waili,

²azawati: Hitai mwe kaja kazizi haja sheja! Kangi aho mkiingila mtaona ṅwana mpunda ashungiγweye, ashizatiye apandwe ni muntu. Mdoholei, mumlete!

³Ati muntu amiγamba: Nini mkiγoshola ivyoho?, mumγambe: Zumbe aagiziγwa ndiyo, ne atafikaituma na kunu.

⁴Wazahita, wazaona ṅwana mpunda ashungiγweye nkilii, ni hehi na silai, wazamdohola.

⁵Wantu kuṅwe waγolokewo haja wazawaγamba: Muγosholai mkidohola mpundangwa?

⁶Waja wazawalandula, sa viyaho Yesu awalaγilizevyo, ne wahowaleka.

⁷Wazaiiγala yuja ṅwampunda kwa Yesu, wazamtandika shuke zawe, wazamkweza Yesu.

⁸Wantu wangi wazatandika shuke zawe silai, watuhu wazashenga masala, wazayatandika silai.

⁹Waja walongolewo, hata waja wetongela wazakema: Hoziyana! Atogolwe mweiza mwe zina ja Zumbe!

¹⁰Utogolwe uzumbe wa tate yweshu Dawidi wetilawila! Hoziyana ulanga!

¹¹Azaingila Yelusalemu mwe vikilongwa, azaolela vyoshe vye muja. Kwa kuti kuishwele, azamlawa, azahita Betaniya na waja kumi na waili.

¹²Keloi jakwe wakilawa Betaniya, azaiva sala.

¹³Kuja azaona mkuyu na hale wena mahungo, azaubasha, ati aonela vya ja mumo; miya akiubulila nkaonele, ni mahungo du, hambu mishi, nkuyu zihoizwila, nkaizati ibule.

¹⁴Azaulana angwe: Kale na kale muntu akashetaja tunda jako! Wahina wakwe wazaviiva.

¹⁵Wazabula Yelusalemu. Akiingila vikiloi, azaandiila kuγulusha waja weγuzanya na wetaγizanya muja vikiloi, azafununkula meza za waja wetaγa mahela, hata viti vya waja welaγa visuwa manga, nkakundize muntu,

¹⁶akiingiza ntanu muja mwe vikilongwa,

¹⁷azawafuza akiwati: Kuigondiγwe: Nyumba yangu iitangwe nyumba ya vikila kwe mbali zoshe! Miya inywi mzaiγalusha mpanga ya wampoko.

¹⁸Wavikizi wakulu na watabaluwangwa wazaviiva, ne wahomlondela lukomele. Hambu wazamwogoha, kuti wantu woshe wazashentushiγwa ni mihinyize yakwe.

¹⁹Kukishwa wazalawa kuja, wazahita kwe muzi tanga.

²⁰Makelo wakizinka sila du wazaona, uja mkuyu uikalaγale mpaka kwe mazindo.

²¹Petelo azafukila ija mbuli azamuti: Mfuzi, olela: Mkuyu, ulanilewo, uzakalaγala!

²²Yesu azawalandula angwe: Mtozeshei Mulungu!

²³Kweli namiti: Ndiye alaγilize unu mulima: Inuka, ukine mwe bahali!, ati ashekalakasha mwe moyo wakwe, ati atozesha du, kuti viya avyolonga nevibontoke, ne vitamubontokela.

²⁴Ne vyeleka, nikimiti: Vyoshe, ndivyo mulombeze na kuvika, mkitozesha, kuti mtaviinkwa, ne vitamibontokela.

²⁵Kangi mkiγoloka na kuvika ushilizanyai mbuli, ati muna masa na wenyu, kangwe ishe ywenyu mwe uko mwe lwingu yohe amiushilize muvyobana!

²⁶Miya ati inywi mwasheushilizanya, hata ishe ywenyu mwe uko mwe lwingu nkeamiushilize muvyobana.

²⁷Wazahita vituhu Yelusalemu. Akizunguluka mwe vikilongwa, wavikizi wakulu na watabaluwangwa na watawa wazamwizila angwe:

²⁸Ivi uviγoshola kwa ufuṅwa ani? Akunkileye unu ufuṅwa wa kuγoshola ivyoho ni ndai?

²⁹Yesu azawati: Nami nimiuze mbuli ṅwenga, mwiniγambile! Ne ndivyo nami nimiγambile, ati niviγoshola kwa nguvu ani.

³⁰Ubatizi wa Yohana uanduke mwe lwingu hambu kwa wantu? Niγambilai!

³¹Wazafanyanya mwe myoyo yawe kuγamba: Ati tamuti: Mwe lwingu, atatiti: Nini mkishemtozesha?

³²Miya tiγambe: Kwa wantu! Miya wazaogoha wantu, hambu woshe wazafanyanya kuti: Yohana ni mteγanyingwa kweli.

³³Wazamlandula Yesu angwe: Nkatitaila. Yesu yohena azawalandula akiwati: Lushe nami simiγambila, ati niviγoshola kwa nguvu ani.