Read Kishambala Maliko 12 Bible Online

Maliko 12 - Kishambala bible

Maliko 12

¹Azaandiila kulonga nawo kilushimo angwe: Muntu azahanda mizabihu, azaidenganyiza na hibili, azafuka shimo ja minyiza mazabibu, azazenga dungu, azaiinkila kwa walimi, vikibinda azahita mwe shi ntuhu.

²Mishi ikitimiza, azatuma muhwanga kwa waja walimi, kangwe ainkwe mazabibu ni waja walimi.

³Miya waja wazamgwila, wazamuluta, wazamγotosha mikono du.

⁴Azatuma vituhu muhwanga mtuhu na kuja kwawe, wazamtowa mutwi na mawe, na kumweza.

⁵Azatuma mtuhu, yohena wazamkoma; vivyoho wangi watuhu kuṅwe wazawaluta, kuṅwe wazawakoma.

⁶Ne aina ṅwanae muṅwe, ayemkundisha; kushilikiza azamtuma na kwawe angwe: Uyu ṅwanangu newaingilwe ni shoni naye.

⁷Miya waja walimi wazafanyanya mwe myoyo yawe kuγamba: Uyu ni mupazi; ndokoi, timkome!

⁸Lushe ufa utaγaluka wetu. Ne wahomgwila, wakimkoma wazamwasha nkandai ya mizabibu uko se.

⁹Lushe yuja ṅwenye mizahibu atatenda zeze? Atahita, akome waja walimi, ainkile ija mizabibu kwa watuhu.

¹⁰Nkamfyomile uja ugondengwa wa kuγamba: Iwe, wazengo wabentilejo, jizaγaluka shikizi ja heta.

¹¹Ivi vizaanduka kwa Zumbe; tikiviolela, ni kimaka.

¹²Wazalonda, ndivyo wamgwile, miya wazaogoha wantu, hambu wazataila, kuti luja lushimo alulongile kwa mbuli yawe, miya wazamleka, wazahita.

¹³Wazatuma kwakwe Mafaliseyo na wantu kuṅwe wa Helode, wamgwize na mbuli, ndiyo alonge.

¹⁴Wazahita, wazamuti: Mfuzi, tataila kuti: Iwe u mkweli, kangi nkushindauza muntu, hambu nkuolela vyeni vya wantu, miya ufuza sila ya Mulungu, ilivyo kweli. Vina ṅwiko kumunka Kaiza kodi, hambu nkavina? Tiinkile? Hambu tisheinkile?

¹⁵Miya azataila kuhemba kwawe, azawati: Nini mkiniγeza? Ninkai sumni, niolele!

¹⁶Wazaleta. Azawati: Ichi chapa ni cha ndai? Kangi ugonde ni wa ndai? Angwe ndiwo: Ni wa Kaiza.

¹⁷Ne Yesu ahowati: Munkei Kaiza viya vya Kaiza! Kangi Mulungu mumunke viya vya Mulungu! Wazamumakisha.

¹⁸Vikibinda Masadukeyo wazamwizila, ni waja weγamba:

¹⁹Ufufuki nkahana, wazamwuza angwe: Mfuzi, Mose azatigondela kuγamba: Mkuluwe ja muntu akifa, akiasha mvyele, akisheasha ṅwana, shuti nduγuye amupale yuja muke, amwinulile mkuluwe mbeleko.

²⁰Ne kwina wanduγu mfungate; yuja ywa bosi azaγuwa mvyele, azafa, nkaashize ṅwana.

²¹Yuja ywa mbili azamupala, yohe azafa nkaashize ṅwana. Yuja ywa ntatu ni vivyoho.

²²Waja woshe mfungate wazamγuwa, miya nkawaashize mbeleko. Kushilikiza yuja mvyele yohena azafa.

²³Mwe ufufuki wakizafufuka, yuja mvyele neaγaluke ywa ndai? Hambu woshe mfungate ne waina naye.

²⁴Yesu azawati: Mkiaγilwa so kwa mbuli ya kuti nkamtaila baluwangwa? Hata nguvu ya Mulungu nkamwitaila?

²⁵Hambu aho ndiho nezewafufukile kwa wafilewo, nkawaγuwa, nkawaγwiγwa, miya wataikala mwe lwingu, viya ni walau.

²⁶Miya kwa kuti: Wafilewo wafufuka, nkamfyomile mwe kitabu cha Mose, Mulungu alongilevyo naye mwe jiya shafi akimuti: Imi ni Mulungu ywa Abulahamu na Mulungu ywa Isaka na Mulungu ywa Yakobo?

²⁷Kangi Mulungu so ywa wafilewo, ni ywa we moyo. Kuaγilwa kwenyu ni kukulu.

²⁸Azaizilwa ni mtabaluwangwa aivileye, wavyouzanya naye, azataila, kuti azawalandula vitana, azamwuza: Mulomo mkulu kuzinka yoshe ni uhi?

²⁹Yesu azamwitikila angwe: Mulomo mkulu shunu: Iva, Isilayeli! Zumbe, Mulungu ywetu, ni Zumbe ike du. Umkundishe Zumbe,

³⁰Mulungu ywako, kwa moyo wako woshe na kwa mpeho zako zoshe na kwa ntongonyezi zako zoshe na kwa nguvu zako zoshe!

³¹Wa mbili shunu: Umkundishe ṅwiyawo, sa uvyokikundisha ṅwenye!

³²Nkakuna mulomo mtuhu wekula kuzinka inu. Yuja mtabaluwangwa azamuti: Ni vitana, mfuzi, uzalonga vye kweli, kuti: Mulungu ni muṅwe, nkakuna mtuhu kushima yuja.

³³Kangi kuja kumkundisha kwa moyo woshe na kwa ntongonyezi zoshe na kwa nguvu zoshe na kuja kumkundisha ṅweshu, sa tivyokikundisha wenye, ni kukulu kuzinka ṅombe za mviko na ntogolo zoshe.

³⁴Yesu akiona, kuti azaitikila na viyuγo, azamuti: Nku hale na uzumbe wa Mulungu. Nkakuna lushe atozizeye moyo wa kumwuza mbuli.

³⁵Vikibinda Yesu azaγuwa mbuli, azalonga akifuza vikiloi angwe: Watabaluwangwa walonga zeze kuti: Kilisito ni ṅwana Dawidi?

³⁶Dawidi ṅwenye azalonga kwa viva, avyona Mpeho mṅazi, angwe: Zumbe azamlonga Zumbe ywangu: Ikala kulume kwangu, mpaka ndiho nezeniike wankulu wako shi he milundi yako!

³⁷Dawidi ṅwenye amwitanga Zumbe, lushe ni ṅwanae vivihi?

³⁸Wantu wangi muno wazatamilwa ni kumteγeleza. Akiwafuza azawati: Kiγojei kwa mbuli ya watabaluwangwa! Watamilwa ni kuanga waizwikile shuke za kizumbe, watamilwa ni kuluγushiγwa lwazoi.

³⁹Mwe mavikilo waikala mwe viti vya wazumbe, hata wakilalikwa kwe nkande waikala ha wafuṅwa.

⁴⁰Waaja nyumba za wavyelengwa wafilwewo ni waγoshi, kangi wakionyaonya, viya wataisiiza kuwahembelezeza. Awa watazalahwa masa yezinka ya weyae wawe.

⁴¹Azahita kwa ikala he chiya kisanduku cha ntogolo, azaolela wantu, wavyogela mali na mumo. Wazuli wangi wazagela nyingi.

⁴²Kuzaiza mvyele mkiwa afilweye ni mγoshi ywakwe, azagela visenti vili vyeγelemuka hela ṅwenga.

⁴³Azaitanga wahina wakwe, azawati: Kweli namiti: Uyu mvyelengwa mkiwa azagela hakulu kuzinka waja woshe wagezilewo mwe ichi kisanduku cha ntogolo.

⁴⁴Hambu woshe wazausha senti kuṅwe mwe mali yawe nyingi, wazazigela, miya uyu ṅwenye ni mkiwa vikulu, kangi vyoshe, avyona navyo, azavigela, ni nkande zakwe zoshe.