Read Kishambala Maliko 14 Bible Online

Maliko 14 - Kishambala bible

Maliko 14

¹Kukeshiγale mishi mili, mishi ya Pasa iki bula, yejiilwa migate ishigezilweyo shimbi. Wavikizi wakulu na watabaluwangwa wazapisha, ndivyo wamgwile na minyanyi, wamkome.

²Hambu wazaγamba: Tishezaγoja mishi ya mviko, kushezaoneka nkondo nkulu na wantu!

³Akiikala Betaniya mwe nyumba ya Simoni Mkoma, wakija nkande, kuzaiza mvyele, aitozize kakomba ka mavuta ya muti weitangwa Nalada yavanganeyo na mafutilo ya mluziluzi, yeγulwa na mali nyingi muno. Azabonda kaja kakomba, azayatununtila mwe mutwi wakwe.

⁴Miya kuṅwe wazaihilwa mwe myoyo yawe angwe: Nini aya mavuta matana yakihabaniγwa?

⁵Hambu aya mavuta yetama ivyoho yaadaha kutaγwa kwa shilingi magana maili, zikainkilwa kwa wakiwa. Wazamshimbukila.

⁶Miya Yesu azalonga: Mulekei! Nini mkimwonya sungu? Azaγoshola ndima ntana mwe ṅwili wangu.

⁷Hambu wakiwa muna nawo kwenyu mishi yoshe, ndiho mkundile, mwadaha kuwafila mbazi, miya imi nkamna na imi mishi yoshe.

⁸Viya avyodaha azaviγoshola; azaandiila kushisha ṅwili wangu mavuta kangwe nezeuzikwe.

⁹Kweli namili: Aho ndiho ulau wedi nezeubilikilwe mwe ngulu ngima, hata ivi, uyu aγosholevyo, nezevilongwe, kangwe yohe nezeakumbukwe.

¹⁰Yuda Isikaliyota, waja kumi na waili ni ṅwiyae ywawe, azahita kwa wavikizi wakulu, kangwe amwinkile kwawe.

¹¹Waja wakiviiva wazatamilwa, wazalaγana naye feza, ndizo wamunke. Lushe azapisha, ndivyo akombaγanye kumwinkila.

¹²Mushi wantu wahoandiila kuja migate ishigezilweyo shimbi, wantu wakikoma ngoto za Pasa, wahina wakwe wazamuti: Ukunda kujiila hi ngoto ya Pasa, tihite, tiveiliγanya?

¹³Azatuma wahina waili, azawati: Hitai na muja kaya! Nemkintane na muntu ainuleye iγa ja mazi, mtongelei!

¹⁴Ndimo aingile, mtamγamba yuja ṅwenye nyumba: Kangwe ni mfuzi: Fikilo jangu ni jihi, ndimo nijiile ngoto ya Pasa haṅwe na wahina wangu?

¹⁵Lushe ṅwenye atamionyesha chumba kikulu chibindilecho kutandikwa, ne ndimo mtiliγanyize.

¹⁶Waja wahina wazalawa, wazahita na muja kaya, wazaona, sa viyaho awaγambilevyo; wazaliγanya ngoto ya Pasa.

¹⁷Lwa ṅwiyaγulo azaiza nawaja kumi nawaili.

¹⁸Wakiikala, wakija, Yesu azalonga: Kweli namiti: Ṅwenyu muṅwe mweja na imi aunga kuniinkila.

¹⁹Wazaandiila kuona ukiwa na kulonga muṅwe muṅwe: Hambu ni miyo?

²⁰Azawahitwila angwe: Inywi kumi na waih ni ṅwenyu, ni yuja, ndiye aginte haṅwe na imi mwe lwiγa.

²¹Ṅwanangwa ywa muntu ahita sila yakwe sa viyaho, mbuli yakwe igondiγwevyo; miya yuja muntu mwemwinkila ṅwanangwa ywa muntu nezeaone ukiwa. Ati yuja muntu nkavyelwe, anga ni vitana vyakwe.

²²Aho wakija, azaγuwa mgate, azalavya ntogolo, azaubendula, azawainka angwe: Γuwai! Unu ni ṅwili wangu.

²³Vikibinda azaγuwa kinywelo, azalavya ntogolo, azachiwainka, woshe wazanywa mumo.

²⁴Azawati: Inu ni mpome yangu ya kilaγa kihya yeitilwa kwa mbuli ya wantu wangi.

²⁵Kweli namiti: Sezeninywe lute lwa mazabibu mpaka uja mushi, nihozalunyweela luhya mwe uzumbe wa Mulungu.

²⁶Wakibinda kutogola wazamlawa, wahite kwe mulima wa miziyaγembe.

²⁷Yesu azawati: Nyoshe nemwihilwe ni miyo. Hambu kuigondiγwe: Nezenitowe mulishi, ngoto ziasakanyiγwe.

²⁸Miya nikibinda kufufuka nitamilongwela na Galileya.

²⁹Petelo azamuti: Ati woshe waihilwa, miya imi seniihilwe.

³⁰Yesu azamuti: Kweli nakuti: Ichi kilo cha lelo, soγolo ishizati ikeme kaili, utakela nkani katatu, kuti nku ywangu.

³¹Miya yuja azalongesha kuti. Hata nikibuza kukoṅwa haṅwe na iwe, sezenikele nkani kuti: Si ywako. Woshe wazalonga vivyoho.

³²Wazabula hantu heitangwa Getisemane, haja azalonga wahina wakwe: Ikalai aha, mpaka nibinde kuvika!

³³Azamγuwa Petelo na Yakobo na Yohana, azahita nawo; azaandiila kudidima na kuukwa ni vizingizo,

³⁴azawati: Moyo wangu waisa kujiγwa ni lusoyoyo, ushiγaze kufa. Ikalai aha, mgone mesho!

³⁵Azahita na kamazu hadodo, azakina funi, azavika, ati vyadahikana, aho hantu hamzinke.

³⁶Azalonga: Tate ene, vyoshe vyadahikana kwako, zisa ichi kinywelo kwangu! Miya imi nivyokunda sivyo, miya iwe uvyokunda vibontoke.

³⁷Azahita, azawabulila waja, waisisile, azamγamba Petelo: Simoni, utesisila? Nkudaha kugona mesho saa ṅwenga du?

³⁸Gonai mesho, muvike, kangwe msheγeziγwe! Moyo wakunda, miya ṅwili ni mnyonge.

³⁹Azahita vituhu azavika akilonga ija mbuli, alongileyo.

⁴⁰Akiiza vituhu azawabulila waja, waisisile, hambu mesho yawe ne yaina usisiza ungi, nkawataile vya kumlandula.

⁴¹Azaiza ka ntatu, azawati: Mwasisila vivyoho, mwushe muku? Hangu hazatimiza, hazabula; olelai: Ṅwanangwa ywa muntu ainkilwa mwe mikono ya wahuza!

⁴²Inukai, tihite! Shuvuja mweniinkila! Azabula.

⁴³Haho akelonga, Yuda azabula, waja kumi na waili ni ṅwiyae ywawe, ana bumba kulu ja wantu watozizewo shime na vigongo, watumiγwe ni wavikizi wakulu na watabaluwangwa na waγolokezi.

⁴⁴Miya yuja mwemwinkila aiwainkile weyae lwitangilo kuγamba: Ṅdiye nifyosane naye milomo, ndiye; mgwilei, mumwiγale na kumγojesha!

⁴⁵Viya du lushe akibula azamtimila angwe: Mkulu! Akibinda azamfyosa milomo.

⁴⁶Wazamgwila na mikono yawe, wazamshunga.

⁴⁷Waja waγolokewo haja, ṅwiyae ywawe muṅwe azasholola shime, azamshenga mupuna ywa mvikizi mkulu, azamdwisha shikilo.

⁴⁸Yesu azawalonga angwe: Mulawile mwitozize shime na vigongo, viya mtabasha mumpoko, munigwile imi

⁴⁹Mishi yoshe nizaikala kwenyu vikiloi nikifuza, miya nkamunigwizile; ni kangwe ugondengwa ubontoke.

⁵⁰Woshe wazamwasha, wazanyilika.

⁵¹Kuna mubwanga, azamtongela, aikiγubike shuke yeṅala; wazamgwila.

⁵²Miya yuja azaasha shuke yakwe, azanyilika bule.

⁵³Wazamwiγala Yesu kwa mvikizi mkulu; wavikizi wakulu woshe na waγolokezi na watabaluwangwa wazaunganana kwakwe.

⁵⁴Petelo azamtongela hale hale mpaka mwe chengo cha kitala cha mvikizi mkulu; azaikala na wafunguwo akiotela moto.

⁵⁵Miya wavikizi wakulu haṅwe na wafuṅwa woshe wazalonda mbuli ya kumfyalima Yesu, kangwe wamkome, miya nkawaene.

⁵⁶Hambu wangi wazamshinga mbuli za mambeza, miya mbuli zawe, wazomshinga, zizazinkana.

⁵⁷Kuna wainukewo wakimshinga kuγamba;

⁵⁸Tizamwiva, akiγamba: Imi nezenichakule iji vikilo jizengiγwejo ni wantu, nizenge tuhu mishi mitatu jishizengiγwejo ni wantu.

⁵⁹Miya hata ivyoho uwona wawe uzazinkana.

⁶⁰Ne mvikizi mkulu ahoinuka akilawila na haja gati, azamwuza Yesu angwe: Nkulandula ivi, awa wavyokushinga?

⁶¹Miya azaleka lwashu, nkalandule hata. Vituhu mvikizi mkulu azamwuza akimuti: Iwe u Kilisito, ṅwana yuja mweagiziγwa ni ntogolo zoshe?

⁶²Angwe ni Yesu: Ni miyo; kangi nezemumwone ṅwanangwa ywa muntu, avyoikala kulume kwe nguvungwa, kangi avyoiza mwe mazunde ya lwingu.

⁶³Ne mvikizi mkulu ahotatula shuke zakwe angwe: Waona tishindawalondelai?

⁶⁴Mzaiva ulu lukanko. Muγambai? Woshe wazaitikila kuti: Ni mumasa ywa kufa.

⁶⁵Kuṅwe wazaandiila kumshwela mate na kuγubika cheni chakwe na kumtowa nkonde wakimuti: Teγanya! Hata waja wafunguwo wazamγuwa na kumtowa vibao.

⁶⁶Petelo akiikala kuja chengoi, kuzaiza mndele muṅwe ywa mvikizi mkulu.

⁶⁷Akimwona Petelo, avyootela moto, azamwolela, azamuti: Hata iwe ne ukianga na yuja Yesu ywa Nazaleti.

⁶⁸Miya yuja azakela nkani angwe: Sitaila, siiva uvyolonga. Azakulawa, azahita na lwazoi.

⁶⁹Yuja mndele akimwona azaandiila vituhu kuwaγambila waja waγolokewo kuti: Uyu ni ṅwiyae ywawe.

⁷⁰Miya azakela nkani vituhu. Kafunda kadodo kakizinka, vituhu waja waγolokewo haja wazamuti Petelo: Kweli u ṅwiyae ywawe, hambu u Mgalileya.

⁷¹Miya yuja azaandiila kukilaγilila na kukilisha angwe: Simtaila yuja muntu, muyelonga!

⁷²Viya du lushe soγolo izakema ka mbili; ne Petelo ahofukila ija mbuli, Yesu amulongileyo kuti: Soγolo ishizati ikeme kaili, neukele nkani katatu, kuti nku ywangu. Akivitongonyeza mwe moyo wakwe azalila.