Read Kishambala Maliko 15 Bible Online

Maliko 15 - Kishambala bible

Maliko 15

¹Kukicha makelokelo wavikizi wakulu wazalonga masa yakwe na waγolokezi na watabaluwangwa na wafuṅwa woshe; wazamshunga Yesu, wazamwiγala, wazamwinkila kwa Pilato.

²Pilato azamwuza: Iwe u zumbe ywa Wayuda? Azamwitikila angwe: Uzalonga.

³Wavikizi wakulu wazamfyalima mbuli nyingi.

⁴Pilato azamwuza vituhu: Nkulandula mbuli? Olela viya vyoshe, wavyokushinga!

⁵Miya Yesu nkalandule hata mbuli ṅwenga du, ne Pilato ahomaka.

⁶Miya uja mviko mkulu uhokakinta, akawashungwila mimtu muṅwe ashungiγweye, ndiye wantu wakunde.

⁷Kuna muntu mweitangwa Balaba, ashungiγweye haṅwe na weyae wagwishizewo kiva, kangi ne wakomilewo wangi mwe chiya kiva.

⁸Wantu wazakwela, wazamhembeleza, aγoshole, sa avyokazwela.

⁹Pilato azawaitikila angwe: Mukunda, nimishungwile zumbe ywa Wayuda?

¹⁰Hambu aitaile, kuti wavikizi wakulu wamwinkile kwa wizu.

¹¹Miya wavikizi wakulu wazatunya wantu, kangwe wakunde, wamshungwile Balaba.

¹²Miya Pilato azawalandula akiwati: Uyu, muyelonga kuti: Ni zumbe ywa Wayuda, nimγoshwele mbwai?

¹³Waja wazalandula na kukema: Mkontele mwe muti!

¹⁴Pilato azawati: Abanilei? Miya waja wazaisiiza kukema: Mkontele mwe muti!

¹⁵Pilato azakunda kuγoshola vyetamila wantu, ne ahowashungwila Balaba, miya Yesu azamwinkila, atowiγwe vibonko, vikibinda akontelwe mwe muti.

¹⁶Washilikali wazamwiγala, wazamwingiza na muja mwe kitala cha masa, wazaitanga weyae wawe woshe.

¹⁷Wazamzwika guni ja kizumbe, wazaluka bundu ja miwa, wazajimubadika.

¹⁸Wazaandiila kumluγusha angwe: Mpongezi, zumbe ywa Wayuda!

¹⁹Wazamtowa na ngoda mwe mutwi, wazamshwela mate, wazamgintila mazwi, wazamvika.

²⁰Wakibinda kumfyulila, wazamwusha jiya guni ja kizumbe, wazamzwika shuke zakwe; wazamwiγala, wamkontele mwe muti.

²¹Kuna mγoshi mwezinka haja mwelawa nkoi, ndiye Simoni ywa Kilene, ni ishe ja Alekisando na Lufo; uyu wazamkundila, amwinulile muti wakwe.

²²Wazamwiγala hantu heitangwa Gologota, ni kuγamba: Hemazutwi.

²³Wazamnywesha mvinyo unyeγeziγwewo ni mafutilo ya muti wenyeγelesha, miya azaulemela.

²⁴Wakibinda kumkontela mwe muti wazapangilana shuke zakwe na kuzitowela lusolo, kila muntu ndizo aγuwe.

²⁵Aho wakimkontela mwe muti, ni saa ntatu.

²⁶Kangi mbuli ya masa yakwe izagondwa kuγamba: Zumbengwaywa Wayuda.

²⁷Wazaamba wampoko waili mwe miti haṅwe naye, muṅwe kulume, muṅwe kumosho kwakwe.

²⁸Ne uja ugondengwa ubontokevyo wa kuγamba: Azatalwa mwe wahambanyi.

²⁹Wezinka haja wazamkanka na kumzunguziza mitwi angwe: Kumbe wachakula vikilongwa na kujizenga mishi mitatu!

³⁰Kihonye ṅwenye, usheele mwe unu muti!

³¹Vivyoho hata wavikizi wakulu wazamvuluγila wakilonga wenye na wenye haṅwe na watabaluwangwa angwe: Watuhu azawahonya, ṅwenye nkadaha kukihonya!

³²Kilisito, zumbe ywa Isilayeli, neasheele ivi lushe mwe unu muti, tione, tidahemtozesha! Hata weyae wakontelwewo naye mwe miti wazamubela vivyoho.

³³Saa mtandatu ikibula, kuzagwa lwiza mwe shi ngima mpaka saa kenda.

³⁴Saa kenda Yesu azakema na kanwa kikulu angwe: Eli! Eli! Lama azabutani? Ni kuγamba: Mulungu ywangu! Mulungu ywangu! Nini ukiniasha?

³⁵Kuṅwe waγolokewo haja wakiviiva wazaγamba: Shivyo, amwitanga Eliya.

³⁶Kuzaγuluka muntu azaγuwa fuli, azajigela mazi yenyeγela, azajitunga mwe lasi, azamnywesha najo angwe: Lekai, tiolele, ati Eliya aiza kwa msheleza.

³⁷Yesu azakema na kanwa kikulu, azadwika moyo.

³⁸Jiya shuke kulu muno ja zuγaila haṅazi ṅwenye muja vikiloi jizatatuka gati, kuandiila ulanga mpaka shi.

³⁹Mkulu ywa washilikali aγolokeye sheja akiona, adwikilevyo moyo, azalonga:

⁴⁰Kweli uyu muntu ne ai ṅwana Mulungu. Kuna wavyele waγolokewo hale wakiolela, wakina Maliya Magadalene, na Maliya, nine ja Yakobo mdodo na ja Yose, na Salome.

⁴¹Ni waja ndiwo wakimtongela na kumγoshwela ndima, akianga mwe shi ya Galileya. Wana weyae wawe wangi wakwezilewo naye Yelusalemu.

⁴²Aho kukishwa, kwa kuti ni mushi wa kukiteγa kwe mviko wa Pasa, ni kuγamba: Ni mushi welongwela uja mushi wa sabato ṅwenye,

⁴³kuzaiza Yosefu ywa Alimatiya, ni mfuṅwa mwena kilango kitana, kangi yohe ni muntu mweafiza uzumbe wa Mulungu; azatoza moyo, azaingila kwa Pilato,

⁴⁴azamlomheza kimba cha Yesu Pilato azamaka, kuti Yesu azafikafa, azamwitanga mkulu ywa washilikali, azamwuza, ati azabinda kufa.

⁴⁵Akiviγambilwa ni yuja mγolokezi ywa washilikali, azamunka Yosefu kimba chakwe.

⁴⁶Azaγula shuke yenala, azamsheleza mwe muti, azamkanta na ija shuke yeṅala, azamwika mwe mbila ibongiγwevo mwe kungu, azashindika iwe na kuja kwe kifiγwe cha mbila.

⁴⁷Maliya Magadalene, na Maliya, nine ja Yose, wazaona, aikiγweho.