Read Kishambala Maliko 2 Bible Online

Maliko 2 - Kishambala bible

Maliko 2

¹Mishi ikizinka, azaingila vituhu Kapelinaumu; vizaivika, kuti a mwe nyumba siku.

²Muzaunganana wantu wangi muno, nkawaliγanilwe nyumbai, hata kwe nkomela, azawabilikila mbulingwa.

³Kuzaiza wantu weleta mtamu ywa pengene, aiinulwe ni wantu wane.

⁴Wakishedaha kumubuza kwakwe kwa mbuli ya wantu wangi, wazapuchula ija nyumba, alimo, wakibinda kubovola wazasheleza lusazi, yuja mtamu alelemo.

⁵Yesu akiona mitozesheze yawe azamγamba yuja mtamu: Ṅwanangu, uhuza wako uzaushiγwa.

⁶Kuna watabaluwangwa, waiikale mumo, wazafanyanya mwe myoyo yawe kuγamba:

⁷Uyu muntu alonga zeze ivyoho? Atemweza Mulungu. Kuna mwedaha kuusha uhuza? So Mulungu ike du?

⁸Yesu azafikataila mwe moyo wakwe, kuti wazafanyanya ivyoho mwe myoyo yawe, ne ahowati: Nini mkifanyanya ivyoho mwe myoyo yenyu?

⁹Vihufu ni vihi: Kumγambila uyu mtamu ywa pengene kuti: Uhuza wako uzaushiγwa, haidu kuγamba: Inuka, uinule lusazi lwako, uhite?

¹⁰Miya mtaile kuti: Ṅwanangwa vwa muntu ana ufuṅwa kunu shi wa kuushiliza uhuza!

¹¹Ne ahomlonga yuja mtamu ywa pengene: Nakuti iwe: Inuka, uinule lusazi lwako, uhite na kaya kwako!

¹²Viya du lushe azainuka, azainula lusazi lwakwe, azamlawa, woshe waiolele; ne wahoshentuka wosheni, wazamtogola Mulungu angwe: Kale hoshe nkataene ivyoho.

¹³Vituhu azalawa, azabula kwe bahali, wantu woshe wazamtimila, azawafuza. Akianga kuja azamwona Lewi, ṅwana Alifeyo, aiikale he ngelu, azamuti: Nitongela!

¹⁴Ne ahoinuka akimtongela.

¹⁵Akija nkande mwe nyumba ya yuja Lewi, kuzaiza wangelu na wahuza wangi, wazaja haṅwe na Yesu na wahina wakwe; hambu wamtongelewo wazaγenela.

¹⁶Watabaluwangwa wa Kifaliseyo wakiona, kuti aja na wangelu na wahuza, wazawalonga wahina wakwe angwe: Kumbe aja, anywa na wangelu na wahuza?

¹⁷Yesu akiviiva azawati: Weikala ugima nkawaagiziγwa ni mγanga, ni waja wehuma; siizile niitange watanda, wahitule ntongonyezi zawe, niizile niitange wahuza.

¹⁸Wahina wa Yohana na Mafaliseyo ne wakifunga. Wazamwizila, wazamuti: Nini wahina wa Yohana na wa Mafaliseyo wakifunga, wahina wako wakishefunga?

¹⁹Yesu azawahitula angwe: Welalikilwa nteγuzi wadaha zeze kufunga, yuja ṅwenye nteγuzi wakeanga naye? Mishi waina ṅwenye nteγuzi nkawadaha kufunga.

²⁰Miya mishi yaiza, ndiho ṅwenye nteγuzi nezeaushiγwe kwawe, mushi uja ne ndiho nezewafungile.

²¹Nkakuna mwegela ndame ya shuke ndala mwe nkazu shakazu; ati aγoshola ivyoho, ija ndame mpya yoshe itafikauka mwe ija nkazu shakazu, lushe langa jakwe ni kulu kuzinka jiya ja bosi.

²²Kangi nkakuna mwegela mvinyo mwishi mwe mabene mashakazu; ati agela, uwo mvinyo mwishi utavusa yaja mabene, mvinyo utaitika, kangi mabene yohe yatabindilizika. Mvinyo mwishi ugelwa mwe mabene mahya.

²³Mushi azaanga kwe mbuwa za ngano mushi wa sabato, wahina wakwe wazaγenda wakidahula maiswa ya ngano.

²⁴Ne Mafaliseyo wahomγamba: Olela! Nini wakiγoshola mushi wa sabato vishivyoγosholwa?

²⁵Azawati: Nkamfyomile, Dawidi aγosholevyo, akikosa vya ja, akiluṅwa ni sala na weyae, awona nawo?

²⁶Kuti azaingila mwe nyumba ya Mulungu kwa mvikizi mkulu Abiyatali, kuti azaja haho migate ya ntogolo yena ṅwiko kujiγwa ni wantu washiwo wavikizi, hata weyae, awona nawo, azawapangila?

²⁷Azawati: Mushi wa sabato uikiγwe kwa mbuli ya muntu, miya muntu nkaikiγwe kwa mbuli ya mushi wa sabato.

²⁸Kwa ivyoho ṅwanangwa ywa muntu ni zumbe ywa mushi wa sabato wohena.