Read Kishambala Maliko 6 Bible Online

Maliko 6 - Kishambala bible

Maliko 6

¹Azakulawa kuja, azabula kaya, akulilemo, wahina wakwe wazamtongela.

²Mushi wa sabato azaandiila kufuza vikiloi; wangi wakiiva wazamaka angwe: Uyu ivi vyakwe vianduka na hi? Ainkiγwe viyuγo ani? Kangi izo nguvu zeinga aho ziγosholwa ni mikono yakwe zeze?

³Uyu so yuja fundi ywa zengo? So ṅwana Maliya, mkuluwe ja Yakobo na Yose na Yuda na Simoni? Hata walumbuze nkatina nawo? Wazaihilwa ndiye.

⁴Yesu azawati: Mteγanyingwa nkabelwa kutuhu, kushima kaya kwakwe na kwa wanduγu wakwe na nyumbai mwakwe.

⁵Uko nkadahile kuγoshola kilozo hata kiṅwe, ni wanyonge waγeke du, ahonyizewo na kuwabadikila mikono.

⁶Azamaka kwa mbuli ya kushetozesha kwawe. Azazunguluka kwe mizi tanga yoshe na kufuza γuko.

⁷Azaitanga waja kumi na waili, azaandiila kuwatuma wailiili, azawainka ufuṅwa wa mpepo ze usaba,

⁸azawalaγiliza, washeinule kintu cha ntambo hata, kushima ngoda, washeinule, ati ni nkande, ati ni bene, ati ni senti mwe msipi, vilatu muzwike,

⁹miya mushezwike nkazu mbili.

¹⁰Azawati: Ndimo mwingile mwe nyumba ya muntu, ikalai mumo, mpaka mkizalawa mwe uwo muzi!

¹¹Hantu ndiho mshehokelwe na kusheiviγwa, muhalawe mkiwahuγutila vumbi jitozizejo milundi yenyu, jiwaγalukile uwona!

¹²Wazalawa, wazabilikila, wantu wahitule ntongonyezi zawe,

¹³wazaingata mpepo nyingi, wazahonya wanyonge wangi na kuwashisha mavuta.

¹⁴Hata zumbe Helode azaiva mbuli yakwe, hambu zina jakwe jizatailikana kosheni, azaγamba: Yohana Mubatizi atefufuka kwa wafilewo; ne vyeleka, izo nguvu zikiγosholwa ndiye.

¹⁵Watuhu wazaγamba: Ni Eliya, watuhu wazaγamba:

¹⁶Ni mteγanyingwa sa waja wateγanyi weyae. Miya Helode akiviiva azaγamba: Yohana, nimkomileye na kumshenga mutwi, atefufuka.

¹⁷Hambu Helode aatuma, aamgwila Yohana, aamgela mwe chumba kwa mbuli va Helodiya, mkaza nduγuye Filipo, kwa kuti azamteγula.

¹⁸Hambu Yohana azamγamba: Vina ṅwiko, ukimγuwa mkaza nduγuyo.

¹⁹Miya Helodiya azamγojaγoja, azakunda kumkoma, miya nkadahile.

²⁰Hambu Helode ne akimwogoha Yohana, azamtaila, kuti ni muntu mtanda kangi mṅazi, kwa ivyoho azamγolokela, kangi akikamwiva, moyo uzakamlaha, kangi azatamilwa ni kumwiva.

²¹Hakombaγaneho ni mushi wa nyemi ya kuvyalwa kwa Helode ukibula; aho Helode azalalika wafuṅwa wakwe na waγolokezi wa washilikali na wakulu wa Galileya, waje kwakwe nkande za ṅwiyaγulo.

²²Ṅwana ywa kindele ywa Helodiya azaingila na muja, azasanganya, vizamtamila Helode na waγeni wakwe. Ne zumbe ahomγamba yuja mndele: Nilombeza, ndivyo ukunde! Nenivikunke.

²³Azamlonga na kukilisha: Ndivyo unilombeze, nenivikunke, hata ni hindi gima ja uzumbe wangu!

²⁴Azamlawa, azamlonga nine: Nilombeze mbwai? Angwe ndiye: Lombeza mutwi wa Yohana Mubatizi!

²⁵Azafikaingila, azamγulukila zumbe, azamlombeza angwe: Nakunda, uninke mwe bakuli ivi lushe aha mutwi wa Yohana Mubatizi.

²⁶Zumbe azaja ukiwa, miya kwa mbuli ya ija mikilishize na kwa mbuli ya waja waγeni nkakundile kumlemeza.

²⁷Ne zumbe atumileho mfunguwo, azamlaγiliza, alete mutwi wa Yohana. Azahita, azamshenga mutwi muja mwe chumba.

²⁸Akibinda azaleta uja mutwi wakwe mwe bakuli, azaumunka yuja mndele, kangi yuja mndele azauiγala kwa nine.

²⁹Wahina wakwe wakiviiva wazaiza, wazaγuwa kimba chakwe, wazachiika mwe mbila.

³⁰Ziya ntuṅwa zizaunganana vituhu kwa Yesu, wazamwukwila vyoshe, waγosholevyo na wabilikilevyo.

³¹Azawati: Hitai inywi wenye du hantu he ike, muheme hadodo! Hambu haja hana wangi weiza na wehita, nkawakombaγanye kuja nkande.

³²Wazahita na chombo wenye du na kuntu kwe ike.

³³Wantu wakiwaona, wakihita, wakitaila, wagwizileko nako, wangi wazalawa mwe mizi yoshe, wazaγulukila haja hantu na milundi, kangi wazawahota.

³⁴Yesu akilawa mwe chombo, azaona, kuti wantu ni wangi; azabulwa ni utungu nawo, hambu wazafanana, yiya ni ngoto zishinazo mulishi, azaandiila kuwafuza mbuli nyingi.

³⁵Kukiunga kushwa, wahina wazamwizila, wazamγamba: Kuntu kunu ku ike, kangi kuzashwa.

³⁶Washungule, wazunguluke kwe mbuwa na kwe mizi, wakiγulile vyaja!

³⁷Miya azawalandula angwe: Wainkei inywi, waje! Angwe ndiwo: Tihite kwa γula nkande kwa shilingi magana maili, tidshewainka, waje?

³⁸Azawauza: Muna migate ingahi? Hitai, mwolele. Wakibinda kutaila wazamuti: Mishano na fi mbili.

³⁹Azawalaγiliza, wantu waikale ndala ndala mwe luja lwondo.

⁴⁰Wazaikala mabumbabumba, kuṅwe ni gana, kuṅwe ni milongo mishano.

⁴¹Azaγuwa ija migate mishano na ziya fi mbili, azaolela na kwe lwingu akilavya ntogolo, azabendulabendula ija migate, azaiinkila kwa wahina wakwe, wawaiγaile, hata ziya fi mbili azaziwapangila woshe.

⁴²Woshe wazaja, wazaiγuta.

⁴³Vikibinda wazadodola mpuγutishi, zizamema ngahu kumi na mbili, hata ziya fi ni vivyoho.

⁴⁴Kangi waja wajilewo waγoshi du wazaγelemuka makulija mashano.

⁴⁵Ne ahowakundila wahina wakwe kuingila mwe chombo, waveomboka na sheja kwe muzi wa Betisayida, mpaka ṅwenye ashungule waja wantu.

⁴⁶Akibinda kuwashungula azakwela mwe mulima kwa vika.

⁴⁷Lwiza lukigwa, chiya chombo chiibuzile mwe bahali gati, ṅwenye a ike kuja mpwai.

⁴⁸Azawaona, kuti wana ntoγo kuγesa chombo, hambu mpeho izalawa kuja, wakohita nako; vikibuza luγojo lwa ne lwa kilo, azaiza na kuja, waliko, akiγenda mwe bahali ulanga, azakunda kuwazinka.

⁴⁹Wakimwona, avyoγenda mwe bahali ulanga, wazaγamba: Ni mzimu;

⁵⁰wazakema, hambu woshe wazamwona, wazabulwa ni woγa ukulu. Miya azafikalonga nawo, azawati: Toγwai ni myoyo!

⁵¹Ni miyo, msheogohe! Azakwela mwe chombo, walimo, ne mpeho ihotongomala; miya wazaisiiza kushentukisha mwe myoyo yawe.

⁵²Hambu ija mbuli ya migate nkaiwainkile viyuγo, myoyo yawe ikena ntoγo.

⁵³Wakibinda kuomboka wazabula mwe shi ya Genesaleti, wazafikila haho.

⁵⁴Wakilawa mwe chombo, wantu wazafikamtaila, kuti a haja.

⁵⁵Wazaγulukila iyo shi ngima, wazaandiila kuiγala watamu wawe, wailele mwe sazi zawe, na kuja, wakoiva, kuti a γuko.

⁵⁶Koshe aingileko, ati ni mwe kazizi kadodo, ati ni mwe muzi mkulu, ati ni nkoi, wazaika watamu lwazoi, wazamhembeleza, awakundize kudowa du lusiniko lwa nkazu yakwe; kangi woshe wamdowilewo wazahona.