Read Kishambala Maliko 9 Bible Online

Maliko 9 - Kishambala bible

Maliko 9

¹Azawati: Kweli aamiti: Awa weγoloka aha, weyae wawe kuṅwe nkewaone kifa, shuti waneona uzumbe wa Mulungu, ukiiza na nguvu.

²Mishi mtandatu ikizinka, Yesu azamγuwa Petelo na Yakobo na Yohana, azawakweza mwe ntuli nkulu, wai wenye du.

³Wakimwolela, azaγalamuka, hata shuke zakwe zizanamanika na kuṅalisha kabisa, viya ni kau, nkakuna mfula shuke kunu shi mwedaha kuziṅaza ivyoho.

⁴Eliya na Mose wazawalawila, wazalonga na Yesu.

⁵Petelo azamlonga Yesu angwe: Mfuzi, vyatama, tikiikala kunu, tizenge makumbi matatu, iṅwe jako, iṅwe ja Mose, iṅwe ja Eliya.

⁶Hambu nkataile vya longa, hambu wazaingilwa ni woγa ukulu.

⁷Kuzaiza zunde, jizawagwishiliza mpungo; muja mwe zunde muzalawa kanwa angwe: Uyu ni ṅwanangu, niyemkundisha, mwivei!

⁸Viya du lushe wakiolela, nkawaene muntu, ni Yesu ike mwe haja, waliho.

⁹Wakisheela mwe ija ntuli, azawalaγiliza, washezavimtamwila muntu viya, waenevyo, ṅwanangwa vwa muntu ashizati afufuke kwa wafilewo.

¹⁰Inu mbuli wazaitoza mwe myoyo yawe, wakiuzanya kuγamba: Kuja kufufuka kwa wafilewo ni mbwai?

¹¹Wazamwuza angwe: Watabaluwangwa waalonga kuti: Shuti kuneiza Eliya!

¹²Azawahilwila angwe: Kweli, bosi Eliya aiza, aγoshole vyoshe vibanikevyo, miya ni zeze, mbuli ya ṅwanangwa ywa muntu ikigondwa kuti: Nezealumiziγwe vikulu, nezeabelwe?

¹³Miya namiti: Eliya azabinda kuiza, kangi wazamγoshwela wakundilevyo, sa viyaho mbuli yakwe igondiγwevyo.

¹⁴Wakibula kwa wahina wazaona bumba kulu haho, hata watabaluwangwa wauzanya nawo.

¹⁵Wantu woshe wakimwona wazashentuka, wazafikamγulukila, wazamluγusha.

¹⁶Azawauza: Mwuzanya mbwai nawo?

¹⁷Muṅwe ywa waja wantu azamγamba: Mfuzi, nizaleta ṅwanangu na kwako, ana mpepo ishiyolonga.

¹⁸Ihokamgwila yamshindika na nguvu, alawa tefu haṅwe na kugwelenya meno, vikibinda ṅwili woshe utamhoholeka, nizalonga wahina wako, waiingate, miya nkawadahile.

¹⁹Azawalandula angwe: Mbali inu nkaitozesha; niange na inywi mpaka lini? Nimizizimizize mpaka hi?

²⁰Mletei na kwangu! Wazamleta na kwakwe. Akimwona, ija mpepo izamshindika, azakina na shi, azadongoloka, azalawa tefu.

²¹Azamwuza ishe: Ivi vimwandiile lini?

²²Angwe: Ake ṅwana mdodo. Yaakamtambika mwe moto kangi muno, vituhu mwe mazi, kangwe imkome. Miya ati wadaha mbuli, tiambize, utifile mbazi!

²³Yesu azamuti: Ukiγamba, ati wadaha, vyoshe vidahiγwa ni muotu mwetozesha.

²⁴Ne ishe ja ṅwana ahokema angwe: Natozesha; ulelenganyi wangu uugele nguvu!

²⁵Miya Yesu akiona, kuti wantu wangi waγuluka na haja, azaivaila ija mpepo ye usaba angwe: Iwe mpepo ushilongawo, kangi ushiivawo, nakulaγiliza, ulawe mwe ṅwili wakwe, ushezauingila vingi!

²⁶Izakemesha, izamnyaγalisha, ikibinda izalawa mwakwe. Azaγaluka viya ni mfi, wangi wazafanyanya kuti azafa.

²⁷Yesu azamtoza mkono, azamwinula, azainuka,

²⁸Akiingila na nyumbai, wahina wakwe wazamwuza he njama: Ni vihi vilekilevyo, tikishedaha kuiingata?

²⁹Azawati: Inu mbali nkaihalawa mwe mimtu, ati so kwa kuvika na kufimga.

³⁰Wakikulawa kuja wazaanga mwe shi ya Galileya, miva nkakundile, muntu akitaila.

³¹Hambu azawafuza wahina wakwe, azawati: Ṅwanangwa ywa muntu neainkilwe mwe mikono ya wantu, akoṅwe; miya akibinda kukoṅwa, mishi mitatu ikizinka, neafufuke.

³²Miya waja nkawataile inu mbuli, kangi wazaogoha kumwuza.

³³Wazabula Kapelinaumu. Akiingila na nyumbai azawauza: Kuja silai ne mkifanyanya mbwai?

³⁴Miya wazaleka lwashu. Hambu kuja ne wakikanana kuγamba: Mkulu ni ndai?

³⁵Azaikaia, azalonga na waja kumi na waili, azawati: Muntu akikunda kuγaluka ywa bosi, shuti aγaluke shilikizi ja weyae woshe, awatumikile woshe!

³⁶Azaγuwa kazana, azakaγolosha gatigati haja, waliho, azakaambata, azawati:

³⁷Ndiye ahokele kazana keinga aha kwa mbuli ya zina jangu, anihokela imi; kangi ndiye anihokele imi, nkanihokela imi du, miya amhokela yuja anitumileye.

³⁸Yohana azamuti: Mfuzi, tataila muntu mweingata mpepo kwa nguvu ya zina jako, kangi nkatitongela, ne tihomfingiza, kwa kuti nkatilongela.

³⁹Angwe ni Yesu: Mshemfingize! Hambu nkakuna mwetenda nguvu kwa zina jangu, vituhu akidaha kufikanishinga vibada.

⁴⁰Hambu ashiyetiikila nkani ne mweivana na ishwi.

⁴¹Hambu ndiye nezeaminke ntungo ya mazi kwa mbuli ya zina jangu, kwa kuti mu wa Kilisito, kweli namiti: Upokezi wakwe nkezeumwaγile.

⁴²Miya awa wadodo wenitozesha, ndiye aihize ṅwiyae ywawe muṅwe, vyamtala, mwe shingo yakwe mukigelwa nolo gima, akitambikwa na mwe bahali.

⁴³Ali mkono wako wakuihiza, uushenge! Ni vitana, ukiingila he nkalamo wina mkono muṅwe du, kuzinka aho, ukionya kuzimu na mikono mili, ukigelwa mwe uja moto ushizimawo.

⁴⁴Hambu zongolo jawe jewalumiza kuja nkajifa, kangi uja moto nkauzima.

⁴⁵Ati mulundi wako wakuihiza, uushenge! Ni vitana, ukiingila he nkalamo wina mulundi muṅwe du, kuzinka aho, ukishindikwa kuzimu na milundi mili.

⁴⁶Hambu zongolo jawe jewalumiza kuja nkajifa, kangi uja moto nkauzima.

⁴⁷Ati zisho jako jakuihiza, jifokole! Ni vitana, ukiingila he nkalamo wina zisho iṅwe du, kuzinka aho,

⁴⁸ukishindikwa kuzimu wina mesho maili. Hambu zongolo jawe jewalumiza kuja nkajifa, kangi uja moto nkauzima.

⁴⁹Hambu kila muntu atazatamiziγwa ni moto.

⁵⁰Munyu ni mtana; miya ati munyu wabanika, nezemuuzifye na mbwai? Tendai munyu mwe myoyo yenyu, mwivane wenye na wenye!