Read Kishambala Luka 10 Bible Online

Luka 10 - Kishambala bible

Luka 10

¹Vikibinda Zumbe azagimbika watuhu milongo mfungate, azawatuma wailiili, wamlongwele na mwe mizi yoshe na hantu hoshe, ṅwenye akundileho kuhita naho.

²Azawati: Uluki ni ukulu, miya wandima ni waγeke. Mhembelezei ṅwenye uluki, atume wandima kwe uluki wakwe!

³Hitai! Olelai: Imi namituma, viya mu ngoto, na kwe mashuwi gati.

⁴Msheinule misipi na mabene na vilatu! Msheluγushane na muntu silai!

⁵Nyumba, ndiyo mwingile, munelonga: Mpeho na inu nyumba!

⁶Ati mwe iyo nyumba muna mweagiziγwa ni mpeho, mpeho yenyu itamwikaila; ati nkamna, itamiuyiya.

⁷Mwe ija nyumba ikalai, muje, munywe muvyoinkwa ni waja wenye! Hambu mndima aagiziγwa ni upokezi wakwe. Msheshindelawa mwe nyumba, mkiingila ntuhu!

⁸Muzi, ndiwo mwingile, wakimihokela, jai muvyoletelwa!

⁹Kangi honyai wanyonge we muja! Vikibinda waγambilei kuti: Uzumbe wa Mulungu uzamibulila hehi!

¹⁰Muzi, ndiwo mwingile, wakishemihokela, mulawile na lwazoi, muwaγambe:

¹¹Hata vumbi jitozizejo milundi yetu umu kaya mwenyu tajimihuγutila, komo tailai kuti: Uzumbe wa Mulungu uzamibulila hehi!

¹²Namiti: Masa ya Sodoma, ndiyo yagwe uja mushi, nezeyahuhe kuzinka ayo ya uwo muzi.

¹³Ukatabanika, Kolazini! Ukatabanika, Betisayida! Hambu ati kuja Tilo na Sidoni kwaaγoshwelwa viya vilozo viγosholwevyo kwenyu, anga wavoteka kale na kukanta maguniya na kukigela zelu.

¹⁴Kweli mlaho wa Tilo na wa Sidoni, ndiwo ugwe uja mushi wa masa nezeuhuhe kuzinka wenyu.

¹⁵Hata iwe Kapelinaumu, nkukweziγwe mpaka kwe lwingu? Nezeushindikwe na uko ishi kuzimu!

¹⁶Mwemiiva inywi aniiva imi, mwemibela inywi anibela imi; miya mwenibela imi amubela yuja anitumileye.

¹⁷Waja milongo mfungate wazauya na nyemi angwe: Zumbe, hata mpepo zizatiitika kwa nguvu ya zina jako!

¹⁸Azawati: Nizamwona Satani, akishindikwa mwe lwingu, akikina sa lumuli.

¹⁹Olelai! Nizaminka ufuṅwa wa kujata mwe nyoka na visuse, muvote nguvu zoshe za yuja munkulu, nkakuna ndivyo vimiifye.

²⁰Miya mshetamilwe, kuti mpepo zamiitika! Tamilwai, kuti mazina yenyu vaigondiγwe mwe lwingu!

²¹Haja ne Yesu atowileho zumo akimema mpeho mṅazi akilonga: Nakulaviliza ntogolo, iwe Tate, Zumbe ywa lwingu na ywa shi, kuti izi mbuli watalizi na waviyuγo uzaziwafisha, miya uzazifumbwila wankebe. Kweli, Tate, ne vikutamilevyo.

²²Vyoshe nizaviinkwa ni Tate, nkakuna mwemtaila ṅwanangwa, kushima Tate, kangi nkakuna mwemtaila Tate, kushima ṅwanangwa na yuja, ṅwanangwa ndiye akunde kumlaviliza.

²³Azahituka kwa wahina wakwe, azawaγamba wawo du:

²⁴Mesho yeona viya, muvyoona, yana nyemi. Hambu namiti: Wateγanyi na wazumbe wangi wazaheheleziγwa ni kuona viya, inywi muvyoona, miya nkawaviene; hata kuiva viya, muvyoiva, miya nkawaviivile.

²⁵Kuna mtamulomongwa, azainuka, amγeze, azamuti: Mfuzi, nitende vivihi, kangwe nezenipale nkalamo ya kale na kale?

²⁶Yuja azamuti: Mwe mulomongwa mugondiγwe mbwai? Ufyomile zeze?

²⁷Angwe ndiye: Umkundishe Zumbe, Mulungu ywako, kwa moyo wako woshe na kwa mpeho zako zoshe na kwa nguvu zako zoshe na kwa ntongonyezi zako zoshe! Vikibinda umkundishe ṅwiyawo, sa uvyokikundisha ṅwenye!

²⁸Azamuti: Uzaitikila vitana, viγoshole, neukalame!

²⁹Yuja azakunda kukikanila ṅwenye, azamγamba Yesu: Lushe ṅwiyangu ni yuhi?

³⁰Yesu azaγuwa ija mbuli, azalonga: Kuna muntu alawaye Yelusalemu, asheele na Yeliko, azaγomelwa ni wampoko; awa wazamzula shuke zakwe, wazamtowesha; wakihita wazamwasha, aibuzize kufa.

³¹Vizateγana, mvikizi azasheela mwe ija sila, akimwolela azaomboka.

³²Vivyoho mulevi yohe azabula haja hantu, akimwona azaomboka.

³³Msamaliya azatongela ija sila, azabula haja;

³⁴akimwona azabulwa ni utungu naye, azahila, azakanta vilonda vyakwe haṅwe na kuvigela mavuta na mvinyo; akibinda azamkweza mwe mpunda yakwe ṅwenye, azamdemeza na kwe fikilo, hata γuko azamupikila.

³⁵Mhitu wakwe azalavya shilingi mbili, azazimimka yuja ṅwenye fikilo angwe: Mupikile! Ati wabinda mali kuzinka inu, nezenikulihe nikizauya.

³⁶Lushe uγambai: Waja watatu, yuja aγomelweye ni wampoko ṅwiyae ni yuhi? Angwe: Ni yuja amfileye mbazi.

³⁷Angwe ni Yesu: Hita, ukaγoshole sa viyaho!

³⁸Wakihita, ṅwenye azaingila mwe muzi: kuna mvyele mweitangwa Malita azamhokela mwe nyumba yakwe.

³⁹Yuja ana nduγuye mweitangwa Maliya; uyu azaikala he milundi ya Zumbe akiteγeleza mbuli yakwe.

⁴⁰Miya Malita azapikapika kwa ndima nyingi, azomγoshwela; azabula angwe: Zumbe, nkuihilwa, ṅwenetu akiniashiliza ndima ike? Mulonge, aniambizeambize!

⁴¹Zumbe azalandula azamuti: Malita! Malita! Waona lulali na lupisho na ndima nyingi;

⁴²miya mbuli yeagiza ni ṅwenga du. Maliya azashaγula fungu tana, nkezeajihokwe.