Read Kishambala Luka 11 Bible Online

Luka 11 - Kishambala bible

Luka 11

¹Mushi azaikala hantu akivika; akiheza, mhina ywakwe muṅwe azamuti: Zumbe, tihinye kuvika, sa Yohana ahinyizevyo wahina wakwe!

²Azawati: Mkivika mγambe: Tate yweshu we uko mwe lwingu! Zina jako jigimbikwe! Uzumbe wako uize! Uvyokunda vibontoke kunu shi sa uko mwe lwingu!

³Utinke mishi yoshe nkande yetu yetiagiza!

⁴Utiushilize masa yetu! Hambu hata ishwi tamwushiliza kila muntu atibanilevyo. Ushetiingize mwe miγezo! Miya utivunile mwe vibada!

⁵Azawati: kuna muntu, ana mbuyae, yuja akiiza na kilo kikulu azamuti: Mbuyangu, ninka migate mitatu!

⁶Kwa kuti mbuyangu ashwelweye silai azafikila mwangu, kangi sina nkande za kumunka.

⁷Lushe yuja mwe nyumbai atamlandula kuti: Ushenipishe! Luvi lwizuγalwe, kangi wanangu nina nawo kunu sasai, sikombaγanya kuinuka nikikunka?

⁸Namiti: Ati asheinuka, akimunka, kwa kuti ni mbuyae, miya kwa kuti yuja nkana shoni, atainuka, amunke vyemwagiza.

⁹Nami namiti: Lombezal! Nemwinkwe. Londai! Nemwone. Goṅondai! Nemzuγwilwe.

¹⁰Hambu kila mwelombeza ainkwa, mweionda aona, mwegoṅonda azuγwilwa.

¹¹Kwenyu kuna ṅwana, akilombeza ishe nkande, ishe amunke iwe? Ao du akimlombeza kapala, aleke kumunka kapala, amunke nyoka?

¹²Ao akimlombeza tagi, amunke kisuse?

¹³Lushe ati inywi wabada mwadaha kuinka wana wenyu vintu vitana, ishe ywenyu ywa kilwingu asheinke mpeho ṅazi waja wemlombeza?

¹⁴Azaingata mpepo, inu ne ishilonga. Miya ija mpepo ikilawa,

¹⁵yuja muntu ashilongaye azalonga, wantu wazavimaka. Miya weyae wawe kuṅwe wazalonga;

¹⁶Aingata mpepo na nguvu ya mzuka, zumbe ywa mpepo. Watuhu wazamγeza wakilonda lwitangilo lweanduka mwe lwingu.

¹⁷Miya ṅwenye azataila ntongonyezi zawe, azawati: Kila uzumbe ukipangana ṅwenye wachakuka, hata ni nyumba zitakinilana.

¹⁸Ati Satani akipanga ṅwenye, uzumbe wakwe utoγa zeze? Kwa kuti mwalonga, kuti niingata mpepo kwa nguvu ya mzuka.

¹⁹Ati imi niingata mpepo kwa nguvu ya Mzuka, wana wenyu waziingata kwa nguvu ya ndai? Kwa ivyoho waja watazamilaha.

²⁰Miya ati niingata mpepo kwa nguvu ya chala cha Mulungu, shivyo, uzumbe wa Mulungu uzabula kwenyu.

²¹Muntu mnguvu akiγoja kitala chakwe aitozize mata, viya vyakwe vyaikala mpeho.

²²Miya mnguvu mwemzinka akimwizila, akimvota, ataγuwa mata yakwe yoshe, ndiyo akialila, atapangila weyae mitahe yakwe.

²³Ashiyeniambiza aniomanya, ashiyeunganyanya haṅwe na imi aasakanya.

²⁴Ati mpepo ye usaba yalawa mwe muntu, yaanga mwe shi ishinayo mazi, yalonda hemelo, yashejiona. Ne ndiho ilonge kuγamba: Neniγotoke na mwe nyumba yangu, niiawilemo namo!

²⁵Ikiiza yaibuliza, iihaγilwe, iihambiγwe.

²⁶Ne ihohita kwa γuwa mpepo mfungate ntuhu mbada kuzinka ija ṅwenye, zitaingila, ziikale muja. Ivyoho bindilizo ja yuja muntu jitaiha kuzinka chandilo.

²⁷Aho akilonga izi mbuli kwa waja wantu, hana mvyele, azainula kanwa, azamuti: Ifu jikuvyelejo, hata matombo, uonkileyo ṅwenye, yaona nyemi.

²⁸Angwe ndiye: Kweli, we nyemi ni waja weiva mbulingwa ya Mulungu na kuiγolokela!

²⁹Wantu wakimtimila wangi muno, azaandiila kulonga angwe: Mbali inu ni mbada; yalonda lwitangilo, kangi nkezewainkwe lutuhu, kushima luja lwa Yona.

³⁰Hambu sa viyaho Yona aγalukilevyo Waniniwe lwitangilo, vivyoho ṅwanangwa ywa muntu neaγalukile inu mbali lwitangilo.

³¹Mushi wa mlaho zumbe ywa kivyele ywa ija shi ye lwazu lwegwila zuwa mishi ya vuli, atazainukila inu mbali, ailahe; hambu azalawa, ikohelela, ateγeleze viyuγo vya Salomo; kangi shivyo, kunu kuna mkulu kumzinka Salomo.

³²Mushi wa mlaho wantu wa Niniwe watazainukila inu mbali, wailahe, kwa kuti wakibilikilwa ni Yona wazavoteka, kangi shivyo, kunu kuna mkulu kumzinka Yona.

³³Nkakuna muntu mwekoleza taa, akiiika hantu hekifisha, kangi nkaifunikila ngahu, miya aiika he kiikilo chakwe, kangwe weingila nyumbai waone langaila.

³⁴Langaila ja ṅwili ni zisho; ati zisho jako ni jedi, ṅwili wako woshe una langaila. Miya ati ni hada, hata ṅwili wako una lwiza.

³⁵Olelesha, langaila, ujona najo, jisheγaluke lwiza!

³⁶Ati ṅwili wako woshe una langaila, ukisheikala na lwiza hata kafungu kaṅwe du, lushe woshe una langaila, viya utemulikilwa ni langaila ja taa.

³⁷Akilonga, Faliseyo muṅwe azamhembeleza, akishashule kwakwe. Akiingila na nyumbai azaikala ha jiila nkande.

³⁸Yuja Faliseyo akiviona azamaka, kuti nkahakile mikono, ashizati aje.

³⁹Zumbe azamuti: Inywi Mafaliseyo, vinywelo na vijiilo muvichunta se, miya uko ndai muigisize mumpa na ubada.

⁴⁰Wadashi inywi! Aγosholeye viya vye se, siye aγosholeye viya vye ndai?

⁴¹Ati mwainkila kwa mbazi viya vye mumo, ne ndivyo vyoshe vimiγalukile kishiṅwiko.

⁴²Miya we ukiwa ni nywiyo Mafaliseyo! Kwa kuti ngoγwe na mauzi na mboγa zoshe mwazilavya fungu ja kumi, miya milahile na mikundishize ya Mulungu mwaiomboka; anga inu mwaibasha yohena na kusheleka viya.

⁴³We ukiwa ni nywiyo Mafaliseyo! Kwa kuti mwe mavikilo mwakundisha kuikala ha wazumbe, kangi mwakunda kuluγushiziγwa lwazoi.

⁴⁴We ukiwa ni nywiyo watabaluwangwa na Mafaliseyo! Kwa kuti mwafanana na mbila zishizotailikana, wantu wazojatila, miya nkawataila, kuti ni mbila.

⁴⁵Mtamulomongwa muṅwe azamlandula angwe: Mfuzi, ukilonga ivyoho, watikanka hata ishwi.

⁴⁶Angwe: Hata inywi watamulomongwa nemwone ukiwal Kwa kuti mwainuza wantu miziγo ishiyoinulikana, kangi inywi wenye ija miziγo nkamwidowa na chala kiṅwe du.

⁴⁷We ukiwa ni nywiyo! Kwa kuti mwazenga mbila za wateγanyingwa, kangi waishe zenyu wazawakoma.

⁴⁸Ivyoho mu waona, kangi mwaivana na miγoshwele ya waishe zenyu, hambu waja wazawakoma, inywi mwazenga mbila zawe.

⁴⁹Kwa ivyoho viyuγo vya Mulungu vyalonga: Neniwatumile wateγanyi na ntuṅwa, watawakoma kuṅwe na kuwaγulusha,

⁵⁰kangwe inu mbali itiγilwe mpome ya wateγanyi woshe iitilweyo, vivyo inu shi ituzilwevyo,

⁵¹kuandiila kwe mpome ya Abeli mpaka kwe mpome ya Zakaliya akomiγweye haja he okelo ja ṅombe za mviko na he nyumbangwa gati. Kweli namiti: Inu mbali nezeivitiγilwe.

⁵²We ukiwa ni nywiyo watamulomongwa! Kwa kuti mzausha lutailile; wenye nkamwingila, kangi waja wekunda kuingila mwawafingiza.

⁵³Akilawa kuja, watabaluwangwa na Mafaliseyo wazaandiila kumupisha na kumlosa na mbuli nyingi na kumnyatila,

⁵⁴ati wamwonela lushingile na mbuli, ayolonga.