Read Kishambala Luka 12 Bible Online

Luka 12 - Kishambala bible

Luka 12

¹Wantu wangi muno, makulija na makulija, wakiunganana wazabuza kujatilana; azaandiila kulonga na wahina wakwe angwe: Kiγojeshei kwa mbuli ya shimbi ja Mafaliseyo, ni kuhemba kwawe!

²Hambu nkakuna mbuli ifishiγweyo, ndiyo ishebunkuke; nkakuna vye njamanjama, ndivyo vishetailwe.

³Kwa ivyoho mulongilevyo he lwiza, nezeviivike he langaila; kangi viya, muvyonoṅonezanya nyumbai mwe mashikilo, nezevibilikilwe lwazoi.

⁴Inywi wambuyangu namiti: Msheogohe waja wekoma ṅwili du! Hambu wakibinda nkawana, ndivyo wadahe kuγoshola vingi.

⁵Miya nitamionyesha, ndiye mumwogohe. Mwogohei yuja mwekoma, kangi akibinda ana ufuṅwa wa kushindika na kuzimu!

⁶Kweli namiti: Uyu mwogohei! Vikwele vishano nkaviγulwa na centinne? Kangi ṅwiyae ywawe muṅwe du nkajazilwe ni Mulungu.

⁷Hata swili za mitwi yenyu zoshe ziitazilwe. Msheogohe! Inywi mwazinka vikwele vingi.

⁸Namiti: Ndiye nezealonge cha sale kwa wantu, kuti ni ywangu, ṅwanangwa ywa muntu yohena nezealonge cha sale kwa walau wa Mulungu kuti: Uyu ni ywangu.

⁹Miya ndiye nezeanitowe hulu kwa wantu, atazatowiγwa hulu kwa walau wa Mulungu.

¹⁰Kila ndiye nezeamubishize ṅwanangwa ywa muntu nkani, atadaha kuviushiliziγwa; miya ndiye aeze Mpeho mṅazi, nkezeaushiliziγwe.

¹¹Aho ndiho wamiingize mwe mavikilo na mwe vitala na bomani, msheone sungu kwa mbuli ya mikanile na ya milandwile!

¹²Hambu Mpeho mṅazi atamihinya ija minga milongele yeagiza.

¹³Waja wantu we haja muṅwe azamγamba: Mfuzi, mulonge mkulu, apange ufa na imi!

¹⁴Miya azamuti: Ṅwiyangu, anigimbikeye mlaha masa na mupanga ufa ni ndai?

¹⁵Azawati: Kiolelei na kuγojesha kwa mbuli ya mumelo woshe! Hambu ugima wa muntu nkauanduka mwe kuγenyeza kitende.

¹⁶Azawazisa lushimo angwe: Kuna muntu mzuli, mbuwa zakwe zizalozoka.

¹⁷Azafanyanya mwe moyo wakwe kuγamba: Nitende zeze? Hambu sina, ndimo niumbikile nkande zangu. Azaγamba: Niγoshole ivyoho:

¹⁸Nichakule maikilo yangu ya nkande, nizenge makulu kuzinka aya! Ne ndimo niumbikile ngano zangu na vitana vyangu vyoshe;

¹⁹niuγambe moyo wangu: Moyo wangu, una vitana vingi, viikilwe vya mavuii mangi; unahema, uje, unywe, utamilwe!

²⁰Miya Mulungu azamut: U mdashi iwe! Kilo cha lelo neuhokwe moyowako! Lushe, viya uliγanyevyo, nevihite na ndai?

²¹Ne mbuli ya muntu mwekiumbikila ṅwenye ivyoγenda, ashiye mzuli kwa Mulungu.

²²Azalonga wahina wakwe angwe: Ne vyeleka nikimiti: Msheje sungu kwa mbuli ya ugima wenyu kuγamba: Tijei? ao kwa mbuli ya mili yenyu kuγamba: Tizwikei?

²³Hambu ugima ni ukulu kuzinka nkande, ṅwili ni mkulu kuzinka shuke. Olelai makungulu!

²⁴Nkayahanda, nkayaluka, nkayaika mako ao ntiγili, kangi Mulungu ayashuγa yoshe.

²⁵Inywi nkamzinka madeγe hakulu? Kwenyu kuna muntu mwedaha kuongeza mishi yakwe kahindi kaṅwe du na kupikapika kwakwe?

²⁶Ati ivi vidashi ṅwenye nkamvidaha, viya vituhu muvipikilai?

²⁷Olelai vititi vivyokula! Nkavihanda makonge, nkaviluka shuke nayo; miya namiti: Hata Salomo aγenyezeye utana weinga haja nkavutile sa ivi ṅwiyae ywawe muṅwe.

²⁸Ati Mulungu avutila ivyoho mani ya tunduwi yeikala lelo, kangi keloi yaashiγwa mwe moto, asheisiize kumivutila inywi? Nini mkishetozesha vyedi?

²⁹Inywi mshelonde, ndivyo muje, kangi ndivyo munywe!

³⁰Kangi mshetendwe ni wasiwasi! Hambu ivi vyoshe wamzimu wa inu shi ne wevilonda, miya ishe ywenyu ataila, kuti mwaagiziγwa ndivyo.

³¹Miya londai uzumbe wakwe! Ne ndivyo mwinkwe viya vyoshe.

³²Usheogohe, iwe kafyo kadodo! Hambu ishe ywenyu atamilwa ni kuminka uja uzumbe.

³³Taγai viya, muvyona navyo, muviinkile kwa mbazi du! Kiγoshwelei misipi ishiyoshakala, mtende mali mwe lwingu ishiyobaiγwa, hambu ne kushikobulwa ni mubavi, ne kushikojiγwa ni visaga.

³⁴Hambu mali yenyu iliho, ne myoyo yenyu iliho.

³⁵Ikalai mwikikantile! Kangi lekai, taa zenyu ziake!

³⁶Hambu mwafanana na wantu wemwafiza zumbe ywawe, ndiho auye kwe nteγuzi, kangwe, ahoizila akigoṅonda, wafikemzuγwila.

³⁷Waja wapuna wataona nyemi, zumbe awozabwila, wakigona mesho. Kweli namiti: Atakikanta, miya waja atawaikaza ha jiila nkande, aize, awatumikile.

³⁸Ati aiza na luγojo lwa mbili ao lwa ntatu lwa kilo, ati awabwila ivyoho, waja wataona nyemi. Miya ivi vitailei!

³⁹Ati ṅwenye nyumba ataila, mubavi ndiho aizile, anga nkaleka, nyumbai mwakwe mukibaiγwa.

⁴⁰Hata inywi kiteγei! Hambu ṅwanangwa atazaizila, mshihomwafiza.

⁴¹Angwe ni Petelo: Ulu lushimo ululonga ishwi, hambu wantu woshe?

⁴²Angwe ni Zumbe: Mγolokezi mkweli mwena viyuγo, baba yakwe akimgimbika mγolokezi ywa wandima wakwe, awainke nkande, zihokateγana naho ni yuhi?

⁴³Mupuna mwena nyemi ni yuja, baba yakwe ayemubwila, akiγoshola ivyoho, ndiho alawile.

⁴⁴Kweli namiti: Atamgimbika, aγolokele viya vyakwe vyoshe, avyona navyo.

⁴⁵Miya ati yuja mupuna afanyanya mwe moyo wakwe kuγamba: Baba yangu nkeaize nguzu, kangi akiandiila kutowa waja wabwanga na wandele, akija, akinywa, mpaka atengele,

⁴⁶baba ya yuja mupuna atazalawila mushi, ashiwomwafiza, atazaiza, ashihotaila, ne atamkoma na shime, amlavye nyazu mbili, amunke upokezi wakwe haṅwe na waja washitozeshawo.

⁴⁷Yuja mupuna ataileye, baba yakwe avyokunda, kangi nkakihimile kuviγoshola, nkavibontole, yuja avyokunda, atatowiγwa vibonko vingi.

⁴⁸Miya yuja ashitaileye akiγoshola vyeagiza kutowiγwa, atatowiγwa vibonko viγeke. Kila ainkiγweye vingi, atazatiγilwa vingi, kangi alaγiliziγweye vingi yuja ataisiiza kuuziγwa.

⁴⁹Niizile, nitunge moto mwe inu shi, kangi sina nivyokundisha kuzinka ukifikabililika.

⁵⁰Nina ubatizi, ndiwo nibatize nawo, kangi nalumila vyeinga aha, mpaka ukibontoka.

⁵¹Muγamba: Ṅiizile kwa gwisha utondolo kunu shi? Sivyo, namiti: Neniγenyeze mipangano.

⁵²Hambu kuandiila ivi lushe wantu washano we mwe nyumba ṅwenga newapangane, watatu newapangane na weyae wawe waili, waili newapangane na weyae wawe watatu.

⁵³Hata ishe na ṅwanae ywa kiγoshi, kangi ṅwana ywa kiγoshi na ishe, nine na ṅwanae ywa kivyele, kangi ṅwana ywa kivyele na nine, nine vyala na mkaza ṅwanae, kangi mkaza ṅwana na nine vyala watapangana.

⁵⁴Waja wantu woshe azawati: Ndiho mwone, zunde jikikwela kuja, zuwa jikoingila, mwatikalonga kuti: Fula yaiza, kangi vyabontoka vivyoho.

⁵⁵Ndiho hakunte mpeho yelawa na kuja, kwegwila zuwa mishi ya vuli, mwaγamba: Nekuake zuwa, kangi vyabontoka vivyoho. Mwahemba inywi!

⁵⁶Vya inu shi na vya lwingu vivyobontoka, mwataila kuvibunkula, miya ni vivihi, mkishebunkula, vya mishi inu vivyobontoka?

⁵⁷Wenye nkamlaha masa yeagiza?

⁵⁸Hambu ukihita kwa zumbe haṅwe na ṅwiyao mwekuifya, uko silai upishe, ndivyo uivane naye, kangwe ashezakuhuna kwa mlaha masa, yuja mlaha masa akikuinkila kwa mshilikali, yuja mshilikali akikugela mwe chumba!

⁵⁹Nakuti: Nkezeumulawe muja, shuti uneliha hata senti ya kubindiliza.