Read Kishambala Luka 18 Bible Online

Luka 18 - Kishambala bible

Luka 18

¹Azawaγambila lushimo lwa kuγamba: Shuti wavike, washedile, washetibuke!

²Angwe: Kuna muzi, muja muna mlaha masa ashiyemwogoha Mulungu, hata muntu nkana shoni naye.

³Mwe uja muzi ne mwina mvyelengwa afilweye ni mulume, uyu azamtimila, azamuti: Nivunila mwe masa, ṅwiyangu ayonigela!

⁴Mishi mingi nkakundile. Vikibinda azafanyanya mwe moyo wakwe kuγamba: Ati Mulungu nashemwogoha, ati sina shoni na muntu,

⁵miya yuja mvyele, kwa kuti aisa kunipisha, nenimvunile, kangwe ashezaiza akinitula vuzo.

⁶Zumbe azawati: Teγelezai, yuja mlaha masa muwiwi avyolonga!

⁷Mulungu ashevunile washaγulwewo ndiye, wemkemela kilo na mushi? Atazunganya mbuli yawe?

⁸Namiti: Atafikawavunila kinyanyi. Kumbe ṅwanangwa ywa muntu akizaiza neaone wemtozesha kunu shi?

⁹Wantu kuṅwe wakifanyanyizewo wenye, kuti ni watanda, haṅwe na kubela waja watuhu azawazisa ulu lushiino angwe:

¹⁰Wantu waili wazakwela vikiloi, wavike; muṅwe ni Faliseyo, muṅwe ni mngelu.

¹¹Yuja Faliseyo azaγoloka, azavika mwe moyo wakwe angwe: Mulungu, nakulaviliza ntogolo kuti: Sifanana na wantu watuhu, ati ni wampoko, ati ni watungulu, ali ni watesi, hata ni uyu mngelu.

¹²Kila juma nifunga kaili, vyoshe nivyoonela navilavya fungu ja kumi.

¹³Miya yuja mngelu azaγoloka hale, mesho du nkakundile kuyainula na kwe lwingu, miya azatowa kifuwa chakwe angwe: Mulungu, nifa mbazi imi mhuza!

¹⁴Namiti: Uyu asheele na kaya kwakwe ai mtanda kumzinka yuja. Hambu kila mwekikuza ṅwenye atazapunguziγwa, kangi mwekipunguza ṅwenye atazakuziγwa.

¹⁵Wazamletela hata vizana, kangwe avibadikile mikono; wahina wakwe wakiona wazawavaila.

¹⁶Miya Yesu azaviitanga angwe: Lekai, vizana viize kwangu, mshevifingize! Hambu we ivyoho uzumbe wa Mulungu ni wawe.

¹⁷Kweli namiti: Ndiye ashehokele uzumbe wa Mulungu, viya ni kazana, nkezeauingile.

¹⁸Kuna mfuṅwa, azamwuza angwe: Mfuzi mtana, nitende zeze, kangwe nezenipale nkalamo ya kale na kale?

¹⁹Yesu azamuti: Nini ukiniitanga mtana? Nkakuna mtana kushima Mulungu ike du.

²⁰Milomongwa waitaila ija ya kuγamba: Ushetende kilanga! Ushekome! Ushebawe! Ushemshinge ṅwiyawo ukilonga uwona wa lulimi! Gimbika isho na nyokwe!

²¹Angwe ndiye: Ivi vyoshe nizaviγolokela, vivyo nikuzilevyo.

²²Yesu akiviiva azamuti: Ukeshiγaze mbuli ṅwenga; vyoshe, uvyona navyo, vitaγe, ukavipangile wakiwal Ne ndivyo utende mali mwe lwingu; ukibinda uize, unitongele!

²³Yuja akiiva izi mbuli azaona ukiwa ukulu, hambu ne ai mzuli kabisa.

²⁴Yesu azamwolela, azalonga: Wena kitende wana ntoγo nyingi za kuingila mwe uzumbe wa Mulungu.

²⁵Ngameya ntoγo zakwe za kuingila mwe kihula cha singano nkaziinga sa ziya, mzuli azoona za kuingila mwe uzumbe wa Mulungu.

²⁶Waviivilewo wazalonga: Lushe ndiye adahe kuzahona, ni ndai?

²⁷Angwe: Vishivyodahikana kwa wantu vyadahikana kwa Mulungu.

²⁸Angwe ni Petelo: Olela! Ishwi tizaasha vyetu, tizakutongela.

²⁹Azawati: Kweli namiti: Mweasha nyumba yakwe ao muke ao wakuluwe ao wanduγuze ao wavyazi wakwe ao wanae kwa mbuli ya uzumbe wa Mulungu,

³⁰nkakuna ndiye asheviuziziγwe kangi muno mwe mishi inu, kangi mishi ija, ndiyo nezeibule, atazainkwa nkalamo ya kale na kale.

³¹Azaγuwa waja kumi na waili azawati: Olelai! Takwela Yelusalemu, vyoshe ṅwanangwa ywa muntu agondelwavyo ni wateγanyingwa nevibontoke.

³²Hambu neainkilwe kwa wamzimu, afyulilwe, akankwe, ashwelwe mate;

³³vikibinda watamtowa, watamkoma, miya mushi wa ntatu atafufuka.

³⁴Waja izi mbuli nkawaziivile hata ṅwenga, ziifishiγwe, washezione bontokelo, nkawataile walongiγwevyo.

³⁵Akibula hehi na Yeliko, kuna muntu afileye mesho, azaikala silai, aakalombeza.

³⁶Akiiva shindo ya wantu wangi weomboka azauza, ati kuna mbwai.

³⁷Wazamwukwila, kuti Yesu ywa Nazaleti aomboka.

³⁸Azakema angwe: Yesu, ṅwana Dawidi, nifa mbazi!

³⁹Waja walongolewo wazamvaila, kangwe aleke lwashu; miya azaisiiza kukema vivyoho: Yesu, ṅwana Dawidi, nifa mbazi!

⁴⁰Yesu azaγoloka, azalaγiliza, aletiγwe na haja, aliho. Akibula, azamwuza:

⁴¹Ukunda, nikuγoshwele mbwai? Angwe: Zumbe, nakunda, nione!

⁴²Yesu azamuti: Ona! Mitozesheze yako izakuhonya.

⁴³Viya du lushe azaona, azamtongela akimtogola Mulungu. Hata wantu woshe wavienewo wazamunka Mulungu ntogolo.