Read Kishambala Luka 22 Bible Online

Luka 22 - Kishambala bible

Luka 22

¹Mviko wa migate ishigezilweyo shimbi weitangwa Pasa uzabula hehi.

²Wavikizi wakulu na watabaluwangwa wazapisha, ndivyo wamkome; hambu wazaogoha wantu.

³Satani azamwingila Yuda mweitangwa Isikaliyota, waja kumi na waili ni ṅwiyae ywawe.

⁴Azahita, azalonga na wavikizi wakulu na wafuṅwa wa washilikali, ndivyo amwinkile na kwawe.

⁵Wazatamilwa, wazamwikila msuhi wa kumunka feza.

⁶Azaivana nawo, akibinda azalonda lwinkilile lushinalo vuzo.

⁷Mushi wa migate ishigezilweyo shimbi uzabula, ni uja weagiza kukoma ngoto ya Pasa.

⁸Azamtuma Petelo na Yohana angwe: Hitai, mtiliγanyize ngolo ya Pasa, tiije!

⁹Wazamuti: Ukunda, tiliγanyize hi?

¹⁰Azawati: Olelai! Mkiingila mwe uja muzi nemkintane na muntu ainuleye iγa ja mazi; mtongelei na mwe iyo nyumba, ndiyo aingile!

¹¹Mulongei ṅwenye nyumba kuti: Kangwe ni mfuzi: Fikilo ni jihi, ndijo nijiile ngoto ya Pasa haṅwe na wahina wangu?

¹²Lushe yuja atamionyesha chumba kikulu chibindilecho kutandikwa; ne ndicho mtiliγanyize!

¹³Wakihita wazaona sa viyaho, awaγambilevyo, wazaliγanya ngoto ya Pasa.

¹⁴Ha jiila hakibula, azaikala haṅwe na ziya ntuṅwa kumi na mbili.

¹⁵Azawati: Nizaheheleziγwa ni kihelehele cha kuja inu ngoto ya Pasa haṅwe na inywi, nishizati nilumiziγwe.

¹⁶Hambu namiti: Sezenikeija, mpaka vihozatimiza mwe uzumbe wa Mulungu.

¹⁷Azaγuwa kinywelo, azalavya ntogolo, angwe: Chiγuwei, mupangilane!

¹⁸Hambu namiti: Kuandiila ivi lushe sezeninywe lute lwa mazabibu, mpaka uzumbe wa lwingu uhozaizila.

¹⁹Vikibinda azaγuwa mgate, azalavya ntogolo, azaubendula, azawainka angwe: Unu ni ṅwili wangu weinkilwa kwa mbuli ya inywi, γosholai ivyoho, kangwe mkenifukila!

²⁰Wakibinda kuja azawainka kinywelo chohe vivyoho, angwe: Ichi kinywelo ni kilaγa kihya che mwe mpome yangu yeitilwa kwa mbuli ya inywi.

²¹Miya olelai! Mkono wa yuja mweniinkila u haṅwe na imi aha he meza.

²²Kweli ṅwanangwa ywa muntu ahita sila yakwe, sa afanyanyiziγwevyo, miya yuja muntu mwemwinkila nezeaone ukiwa.

²³Waja wazaandiila kuuzanya wenye na wenye, ati yuja mweunga kuγoshola viya ni ṅwiyae ywawe yuhi.

²⁴Kuzaoneka nkumbizi kwawe kuγamba: Mkulu ywawe ni yuhi?

²⁵Azawati: Wazumbe wa mbali za wantu wawatoza kinguvu, kangi waja wewatoza na nguvu wainkwa mazina ya shima.

²⁶Miya inywi, mshekaγoshola ivyoho! Miya mkulu ywenyu aγaluke, viya ni mdodo, kangi kilongolezi chenyu aγaluke, viya ni mutakutumikila. Hambu mkulu ni yuhi?

²⁷Mweikala he meza, hambu mweγoshola ndima? So yuja mweikala he meza? Kangi kwenyu imi nifanana, viya ni muntu ywa ndima.

²⁸Miya inywi, ndiwo mwihumule kwangu,

²⁹nikiγezwa, nami neniminke uzumbe, sa Tate aninkilevyo uzumbe.

³⁰Kangwe muje, munywe he meza yangu mwe uzumbe wangu, kangwe mwikale mwe viti, mulahe ziya mbali kumi na mbili za wana Isilayeli.

³¹Zumbe azalonga: Simoni! Simoni! Olela: Satani azamikunda, amihete, viya mu ngano.

³²Miya imi nizakuhembelezeza, mitozesheze yako isheaγe; kangi iwe aho, ndiho nezeuhitukile, ugele wanduγu wako nguvu!

³³Yuja azamuti: Zumbe, niikiteγile kuhita na iwe, ati ni mwe chumba, ati ni kwa fa.

³⁴Angwe: Nakuti Petelo: Lelo soγolo nkeikeme, uishikezile nkani katatu, kuti nkunitaila.

³⁵Azawati: Nihokamituma, mwishina misipi na mabene na vilatu, muna mukosizevyo? Angwe: Nkatina.

³⁶Azawati: Miva ivi lushe mwena msipi auinule! Vivyoho mwena bene! Kangi ashinaye ataγe nkazu yakwe, akiγulile shime!

³⁷Hambu namiti: Viya vigondiγwevyo shuti vinibontokele, viya vya kuγamba: Azatalwa mwe wahambanyi; hambu mbuli yenitala yabontoka.

³⁸Angwe ndiwo: Zumbe, olela: Shime mbili zi haha! Azawati: Vyabesha.

³⁹Azamlawa, azahita, sa avyozwela, kwe mulima wa miziyaγembe; wahina wakwe wazamtongela.

⁴⁰Akibula haja hantu azawati: Vikal, kangwe msheingile mwe miγezo! Ṅwenye azauka

⁴¹haja, waliho, azahita na mazu, sa muntu ahodaha kutambika kawe, azaginta mazwi, azavika angwe: Tate, ati wakunda, leka, ichi kinywelo

⁴²chinizinke! Ntoγo vishebontoke nivyokunda imi, miya iwe uvyokunda vibontoke!

⁴³Kuna mlau alawileye mwe lwingu, azamlawila, azamgela nguvu.

⁴⁴Aho akigomba iyo nkondo azakihimisha kuvika, suγuti zakwe zizaγaluka, viya ni madodwe ya mpome yegwa na shi.

⁴⁵Akibinda kuvika azainuka, azahita kwa wahina wakwe, azawabwila, waisisile kwa ukiwa,

⁴⁶azawati: Musisilai? Inukai, muvike, kangwe msheγeziγwe!

⁴⁷Akelonga, akiolela, azaona wantu; kangi yuja mweitangwa Yuda, ṅwiyae ja waja kumi na waili, aiwalongwele, azamubasha Yesu, afyosane naye milomo.

⁴⁸Yesu azamuti: Yuda, umwinkila ṅwanangwa ywa muntu na kufyosana naye?

⁴⁹Waja, awona nawo, wakiona, mbuli ndivyo iγende, wazamγamba: Zumbe, wakunda, tiwashenge na shime?

⁵⁰Ṅwiyae ywawe muṅwe azatowa mupuna ywa mvikizi mkulu, azamshenga shikilo ja kulume, jizadwika.

⁵¹Miya Yesu azamlandula angwe: Lekai du!

⁵²Azadowa jiya shikilo, azajihonya. Miya waja wamubashizewo, wavikizi wakulu na wafuṅwa wa vikilongwa na waγolokezi, Yesu azawati: Mulawile mwitozize shime na vigongo, viya mtabasha mumpoko, munigwile imi.

⁵³Mishi yoshe nizaikala kwenyu vikiloi, miya nkamkusule mikono, mkinigwila; miya ivi lushe aha ne saa yenyu, ne lwiza luhotoza uzumbe.

⁵⁴Wazamgwila, wazamwiγala, wazamwingiza mwe nyumba ya mvikizi mkulu; miya Petelo azatongela hale hale.

⁵⁵Wakiasha moto gatigati mwe chengo, wakiikala haṅwe, Petelo yohena azaikala gatigati kwawe.

⁵⁶Kuna mndelengwa, akimwona, aiikale he moto, azamdulila, azaγamba: Hata uyu ne akianga naye.

⁵⁷Miya yuja azakela nkani angwe: Simtaila, mlala.

⁵⁸Kafunda kadodo kakizinka, kuna mtuhu, azamwolela angwe: Iwe nawe u ṅwiyae ywawe. Angwe ni Petelo: Ṅwiyangu, si miyo.

⁵⁹Saa ṅwenga ikizinka, mtuhu azalongesha angwe: Kweli uyu yohena ne akianga naye, hambu ni Mgalileya.

⁶⁰Angwe ni Petelo: Ṅwiyangu, sitaila uvyolonga. Akelonga, viya du lushe soγolo izakema.

⁶¹Zumbe azahituka, azamwolela Petelo; ne Petelo ahofukila ija mbuli ya Zumbe amlongileyo kuti: Soγolo nkeikeme lelo, uishikezile nkani katatu, kuii nku ywangu.

⁶²Azalawa na se, azalilisha.

⁶³Waja wantu wamtozizewo Yesu wazamfyulila haṅwe na kumluta;

⁶⁴wazaγubika cheni chakwe, wazamwuza angwe: Teγanya! Akutowileye aha ni ndai?

⁶⁵Hata mbuli nyingi ntuhu za kumkanka wazamlonga.

⁶⁶Kukicha waγolokezi wa mbalingwa wazaunganana na wavikizi wakulu na watabaluwangwa, wazamwiγala na muja, wamokalongela masa. Wazamuti:

⁶⁷Tiγambile, ati iwe u Kilisito! Azawati: Ati namiγambila, kangi nkamtozesha;

⁶⁸ati namiuza, kangi nkamunilandula.

⁶⁹Miya kuandiila ivi lushe ṅwanangwa ywa muntu neaikale kulume kwe nguvu ya Mulungu.

⁷⁰Woshe wazamwuza: Lushe iwe u ṅwana Mulungu?

⁷¹Azawati: Mzalonga, hambu imi ndiye. Waja wazalonga: Tishindalondelai uwona? Wenye tizaiva na mashikilo yetu, avyolonga.