Read Kishambala Yohana 1 Bible Online

Yohana 1 - Kishambala bible

Yohana 1

¹Kuandiila mbulingwa ne ii haho, iyo mbulingwa ne ii kwa Mulungu, kangi Mulungu ne mbulingwa.

²Iyo kuandiila ne ii kwa Mulungu;

³vyoshe viumbiγwe ndiyo; iishiho nkahana chiumbiγwecho hata kiṅwe.

⁴Mwe iyo mbulingwa nkalamo ne ii mumo, kangi iyo nkalamo ne ii langaila ja wantu.

⁵Langaila jaaka mwe lwiza, miya lwiza nkalujitozize.

⁶Ne kwina muntu atumiγweye ni Mulungu, zina jakwe ndiye Yohana.

⁷Uyu aizile kwa longa uwona alongele jiya langaila uwona, kangwe jileke, woshe watozeshe.

⁸Yuja siye langaila, miya kangwe jiya langaila ajilongele uwona.

⁹Langaila ja kweli jepwinkukila kila muntu ne jikiiza mwe inu shi.

¹⁰Ne jii mumo mwe inu shi, kangi inu shi iumbiγwe ndijo, miya inu shi nkaijitaile.

¹¹Aizile na mwakwe, miya wantu wakwe nkawamhokele.

¹²Miya woshe wamhokelewo azawainka ufuṅwa wa kuγaluka wanangwa wa Mulungu, ni waja watozeshewo zina jakwe.

¹³Awa nkawavyelwe ni mpome ao kwa mikundile ya kimuntu ao kwa ntongonyezi za mγoshi, miya wavyelwe ni Mulungu.

¹⁴Mbulingwa izaγaluka muntu, izaikala kwetu; tizaona utana wakwe, ni utana viya wa ṅwana avyelweye ike ni ishe, hambu aigisize mbazi na kweli.

¹⁵Yohana azamlongela uwona akibilikila angwe: Uyu ni yuja, nilongileye kuti: Yuja mwenitongela nyuma a haho, imi nishizati, hambu ni mkulu ywangu.

¹⁶Hambu mwe viya, avyoγenyeza, ishwi toshe tizaγuwa vya mbazi vivyoho vivyoho.

¹⁷Mulomongwa uzaiza na Mose, miya mbazi na kweli izalawila na Yesu Kilisito.

¹⁸Muntu nkamwene Mulungu kale hoshe; ṅwanangwa avyelweye ike, ndiye akiikala na kukaambatwa ni ishe, ne atiγambileye.

¹⁹Uwona wa Yohana shunu: Wayuda we Yelusalemu ne wakituma kwakwe wavikizi na Walewi, kangwe wamwuze kuti: Iwe ni weyo ndai?

²⁰Aho azalonga na kulaviliza, nkafishize, azalonga cha sale kuti: Imi si Kilisito.

²¹Wazamwuza: Lushe mbuli i zeze? U Eliya? Angwe: Imi siye. Angwe: U mteγanyingwa? Azalandula: Do.

²²Wazamuti: U ndai? Kangwe tilandule waja watitumilewo. Ṅwenye uγambai, kuti iwe u ndai?

²³Angwe: Imi ni kanwa cha mtakubilikila mwe nyika kuti: Liγanyai sila ya Zumbe, sa mteγanyi Yesaya alongilevyo!

²⁴Waja watumiγwe ni Mafaliseyo.

²⁵Wazamwuza, wazamuti: Ubatiza ywai, ati nku Kilisito ao du Eliya ao du mteγanyingwa?

²⁶Yohana azawalandula angwe: Imi nibatiza na mazi; miya kuna mweγoloka kwenyu gati, mushiyemtaila;

²⁷ni yuja mwenitongela, kwa udodo wangu nkaviniagiza, nikimzaγawila mikowa ya vilatu.

²⁸Ivi vizabontoka Betabala sheja ja Yolodani, ndiho Yohana akiikala akibatiza.

²⁹Keloi jakwe Yohana azamwona Yesu, akiiza kwakwe, ne aholonga: Shuyu ṅwangoto ywa Mulungu mweusha masa ya ngulu ngima!

³⁰Uyu ne ndiye nikilonga kuti: Kuna mγoshi mwenitongela, mwe haho, imi nishizati, hambu ni mkulu ywangu.

³¹Nami ne nishimtaila, miya kangwe ataiiwe ni Waisilayeli, ne niizilevyo imi nikibatiza na mazi.

³²Yohana azalongauwonakuti: Imi nizaona, mpehongwa ikilawa mwe lwingu, ifanana na suwa, izamshelela, izamwikaila.

³³Nami ne nishimtaila, miya yuja anitumileye, nibatize namazi, azaniti: Ndiye uone, mpeho ikimshelela, ikimwikaila, uyu ne mwebatiza na mpeho ṅazi.

³⁴Nami nizaviona, ne nilongelevyo uwona kuti: Uyu ni ṅwana Mulungu.

³⁵Mhitu wakwe Yohana azaγoloka vituhu na wahina wakwe waili.

³⁶Akimwona Yesu, avyoanga, azalonga: Shuyu ṅwangoto ywa Mulungu!

³⁷Waja wahina waili wakimwiva, avyolonga, wazamlongela Yesu.

³⁸Yesu azahituka, azawaolela, wavyomtongela, azawati: Mulondai? Wazamuti: Labi, (bontokelo jakwe ni kuγamba: Mfuzi) uikala hi?

³⁹Azawati: Izai, mkaolele! Wazahita, wazaona, ahoikala, wazaikala kwakwe uja mushi; miya ni saa kumi.

⁴⁰Waja wahina waili waivilewo, kangi waγambilwewo ni Yohana, wakimtongela, muṅwe ywawe ni Andeleya, nduγuye ja Simoni Petelo.

⁴¹Uyu akiandiila kumwona mkuluwe Simoni, amuti: Tizamwona Mesiya, ni kuγamba: Kilisito.

⁴²Azamwiγala kwa Yesu. Yesu azamwolela angwe: Iwe u Simoni, ṅwana Yohana, neuitangwe Kefa, ni kuγamba Petelo (ao kungu).

⁴³Keloi jakwe Yesu akikunda kuhalawa, ahite Galileya, azamwona Filipo, azamuti: Nitongela!

⁴⁴Yuja Filipo ni ywa Betisayida, Andeleya na Petelo wamoanduka namo.

⁴⁵Filipo azamwona Natanayeli, azamuti: Mose na wateγanyingwa wamteγanyeye mwe mulomongwa, tizamwona, ni Yesu, ṅwana Yosefu ywa Nazaleti.

⁴⁶Natanayeli azamlandula angwe: Kumbe kuna vitana vyeanduka Nazaleti? Angwe ni Filipo: Iza, ukaolele!

⁴⁷Yesu akimwona Natanayeli, akiiza kwakwe, azalonga mbuli yakwe kuγamba: Shuyu Mwisilayeli mkweli ashinaye mambeza!

⁴⁸Angwe ni Natanayeli: Unitaile na hi? Yesu azamhitula, azamuti. Filipo ashizati akulonge, nizakuona, wiikale he mkuyu.

⁴⁹Angwe ni Natanayeli: Mkulu, iwe u ṅwana Mulungu, iwe u Zumbe ywa Isilayeli!

⁵⁰Yesu azamwitikila, azamuti: Watozesha, kuti nizakulonga kuti: Nizakuona haja he mkuyu, neuone vyekula kuzinka viya.

⁵¹Amuti: Kweli namiti: Nemwone, lwingu luvyozuγuka na walau wa Mulungu wavyokwezanya na wavyoshelezanya, wakimtimila ṅwanangwa ywa muntu!