Read Kishambala Yohana 12 Bible Online

Yohana 12 - Kishambala bible

Yohana 12

¹Kukeshiγale mishi mtandatu, mviko wa Pasa ukibula; Yesu azahita Betaniya, Lazalo akoikala, ni yuja, Yesu amfufuleye kwa wafilewo.

²Kuja wazamzuγila nkande, Malita azaγoshola ndima, Lazalo aiikale nawo he nkande.

³Maliya azaγuwa kakomba ka mavuta ya muti weitangwa Nalada yavanganyiγweyo na mafutilo ya mluziluzi, yeγulwa na mali nyingi muno, azashisha nayo milundi ya Yesu, akiheza azahonola ija milundi yakwe na swili zakwe. Nyumba yoshe izagisa mhempe wa yaja mavuta.

⁴Waja wahina wakwe ṅwiyae ywawe muṅwe, ni Yuda Isikaliyota, ni yuja amwinkileye uko nyuma, azaγamba:

⁵Nini aya mavuta yakishetaγwa kwa shilingi magana maili, zikainkilwa kwa wakiwa?

⁶Nkalongile ivyoho, kuti atapikila wakiwa, miya ni mubavi, aitozize mfuko wa senti, aiinule wavyokainkwa.

⁷Angwe ni Yesu: Muleke! Kangwe ayaikile mushi wa kuzikwa kwangu.

⁸Hambu wakiwa muna nawo kwenyu mishi yoshe, miya imi nkamna na imi mishi yoshe.

⁹Wantu wangi wa Kiyuda wakitaila, kuti a γuko, wazaiza, miya so kwa mbuli ya Yesu ike, miya kangwe wamwone Lazalo yohena, amfufuleye kwa wafilewo.

¹⁰Wavikizi wakulu wazaivana kumkoma Lazalo yohe,

¹¹kwa kuti Wayuda wangi wazahita kwa mbuli yakwe, ne wahomtozesha Yesu.

¹²Keloi jakwe wantu wangi waizilewo kwe uja mviko wakiiva kuti: Yesu aiza Yelusalemu,

¹³wazaγuwa masala, wazamγendela nayo singili wakiimba: Hoziyana! Atogolwe mweiza mwe zina ja Zumbe! Ni Zumbe ywa Isilayeli!

¹⁴Yesu azaona ṅwampunda, azamupanda, sa vigondiγwevyo kuγamba:

¹⁵Usheogohe, mndele Siyoni! Shuyu Zumbe ywako! Aiza, aipandile ṅwana njowe.

¹⁶Iviwahinawakwe bosi nkawavitaile, miya Yesu akibinda kuinkwa utana, wazafukilakuti: Neagondelweye izo mbuli, kangi wenye wazazimγoshwela.

¹⁷Waja wantu, ndiwo aina nawo, akimwitanga Lazalo, alawe mwe mbila, akimfufula kwa wafilewo, wazavibilikila.

¹⁸Kwa ivyoho wantu wazamγendela singili, kwa kuti wazaiva, kuti azaγoshola luja lwitangilo.

¹⁹Mafaliseyo wazaγambilana: Olelai kuti: Nkamγesa! Shivyo: Wantu woshe wamtongela.

²⁰Mwe waja wakwezilewo kwa binda mviko kuna Wagiliki kuṅwe.

²¹Waja wazamwizila Filipo ywa Betisayida ya Galileya, wazamhembeleza angwe: Zumbe! Takunda kumwona Yesu.

²²Filipo azahita, azavimγambila Andeleya. Andeleya na Filipo wazavimγambila Yesu.

²³Yesu azawalandula angwe: Haibuzile, ṅwanangwa ywa muntu agimbikwe.

²⁴Kweli namiti: Ati mpuluzi ya ngano yashegwa mwe shanga ikifa, yaikala ṅwenye ike; miya ikifa yalavya kuwo jingi.

²⁵Mwekikundisha ṅwenye akiaza; mwekishuka ṅwenye mwe inu shi atakihonya, abule kwe nkalamo ya kale na kale.

²⁶Ati muntu anitumikila, shuti anitongele! Hambu niliho imi, mndima ywangu yohe aikale haho! Ati muntu anitumikila, Tate atamgimbika.

²⁷Ivi lushe moyo wangu una futofuto. Kangi niγambeze? Tate, nihonya, hashenibwile? Kangi ne vilekilevyo, nikihatimila!

²⁸Tate, gimbika zina jako! Kuzalawa kanwa mwe lwingu angwe: Naajigimbika, kangi nenijigimbike vituhu!

²⁹Wantu waγolokewo haja wakiviiva wazaγamba: Kuzaγuγumuka; watuhu wazaγamba: Mlau azalonga naye.

³⁰Yesu azalandula angwe: Ichi kanwa nkachilawile kwa mbuli ya imi, miya ni kwa mbuli ya inywi.

³¹Ivi lushe ni mishi ya kulaha inu shi; ivi lushe zumbe ywa inu shi inga ashindikwe na se.

³²Nami ndiho nikweziγwe ṅa kuushiγwa kunu shi, woshe nitawahuna na kwangu.

³³Ivi avilongile, awaonyeshe mifiile, ndiyo afe.

³⁴Wantu wazamlandula: Ishwi tizaiva mwe mulomongwa kuti: Kilisito akalama kale na kale, iwe ulonga ywai kuti: Ṅwanangwa ywa muntu shuti akweziγwe? Uyu ṅwanangwa ywa muntu ni ndai?

³⁵Yesu azawati: Langaila jike kwenyu mishi miγeke; angai, kwa kuti langaila mkena najo, kangwe lwiza lushemigweele! Kangi mweanga na lwiza nkataila, akohita nako.

³⁶Kwa kuti langaila muna najo, jiya langaila jitozeshei, kangwe mγaluke wana wa langaila! Yesu akibinda kulonga ivyoho, azahita, azakifisha, asheoniγwe ndiwo.

³⁷Kangi aiγoshole ntangilo zeinga haja, waja waiolele, miya nkawamtozeshe,

³⁸kangwe mbuli ya mteγanyi Yesaya iwabontokele, akiγamba: Zumbe, mwetozesha ulau wetu ni ndai? Mwefumbwilwa viya vya mkono wa Mulungu ni ndai?

³⁹Kwa ivyoho nkawadahile kutozesha, kuti Yesaya azalonga hatuhu:

⁴⁰Mesho yawe azayakoma, myoyo yawe azaitoγesha, kangwe washeone na mesho yawe, washetaile na myoyo yawe, wakihituka, nikiwahonya.

⁴¹Ivyoho Yesaya alongile, kwa kuti azaona utana wakwe, kangi azalonga mbuli yakwe.

⁴²Vivyoho wafuṅwa wangi wazamtozesha, miya kwa mbuli ya Mafaliseyo nkawavilavilize, washezalemeziγwa miviko;

⁴³hambu kushimilwa ni wantu wazakukunda kuzinka kushimilwa ni Mulungu.

⁴⁴Yesu azabilikila angwe: Mwenitozesha nkanitozesha imi, miya amtozesha yuja anitumileye;

⁴⁵kangi mweniona amwona yuja anitumileye.

⁴⁶Imi ni langaila, nizaiza mwe inu shi, kangwe kila mwenitozesha asheange mwe lwiza.

⁴⁷Ati muntu aiva mbuli zangu, miya akisheziγoja, imi simlaha, hambu siizile kwa laha inu shi, miya kwa vunila inu shi.

⁴⁸Mwenibela na kushehokela mbuli zangu ana mwemlaha; mbuli, nilongileyo, ija nezeimlahe mushi wa bindilizo.

⁴⁹Hambu imi silongile vyangu ṅwenye, miya Tate anitumileye ne anilaγilizeye, ndivyo nibilikile, ndivyo nilonge.

⁵⁰Nataila, kuti mlaγilizo wakwe ni nkalamo ya kale na kale. Nivyolonga, nivilonga sa viyaho Tate anilaγilizevyo.