Read Kishambala Yohana 13 Bible Online

Yohana 13 - Kishambala bible

Yohana 13

¹Mviko wa Pasa ushizati ukinte, Yesu aitaile, kuti hakwe hazabula, alawe mwe inu shi, ahite kwa ishe; lushe waja wakwe we mwe inu shi, awakundishevyo, azawakundisha vivyoho shuti bindilizo.

²Wakija nkande za ṅwiyaγulo, yuja ṅwenye leba aikundile moyo wa Yuda Simoni Isikaliyota, kangwe amwinkile.

³Yesu aitaile, kuti ishe azainkila vyoshe mwe mikono yakwe, kuti azalawa kwa Mulungu, kutiauya kwa Mulungu; ne ahoinuka haja, wahojiila nkande,

⁴azaika shuke zakwe, azaγuwa demu, azajikanta;

⁵akibinda azagela mazi mwe bakuli, azaandiila kuhaka milundi ya wahina na kuihonola na jiya demu, akantilejo.

⁶Akiiza kwa Simoni Petelo azamuti: Zumbe, iwe unihake milundi?

⁷Yesu azamlandula angwe: Imi nivyoγoshola, iwe nkuvitaila ivi lushe, miya nezeuvitaile mishi ya nyuma.

⁸Angwe ni Petelo: Nkezeunihake milundi kale na kale! Yesu azamlandula: Ati nashekuhaka, nku ṅwiyangu.

⁹Ne Simoni Petelo ahomuti: Zumbe, ushenihake milundi du! Nihaka hata mikono na mutwi!

¹⁰Yesu azamuti: Ahakiγweye mazi nkashindahaka kushima milundi, hambu aiṅazile. Mwiṅazile, miya so nyoshe. Hambu ai

¹¹mtaile yuja, ndiye amwinkile; ne vyeleka, akilonga kuti: So nyoshe muṅazilewo.

¹²Akibinda kuwahaka milundi azaγuwa shuke zakwe, azaikala vituhu haja ha jiila, azawati: Kumbe, mwataila nimiγoshwelevyo?

¹³Mwaniitanga mfuzi na Zumbe, kangi mwazifya mkilonga ivyoho, hambu ni miyo.

¹⁴Lushe kwa kuti imi Zumbe na mfuzi nizamihaka inilundi, hata inywi vyamitala kuhakana milundi.

¹⁵Nizaminka mbuli ya hinila, kangwe nimiγoshwelevyo inywi, vivyoho mγoshole nenywi.

¹⁶Kweli namiti: Mupuna so mkulu kumzinka baba yakwe, atumiγweye so mkulu kumzinka yuja amtumileye.

¹⁷Ati mwavitaila ivyoho muna nyemi mkiviγoshola.

¹⁸Silonga kwa mbuli ya inywi nyoshe; imi nataila, nishaγulewo, miya kangwe ugondengwa ubontoke uja wa kuγamba: Mweja nkande zangu anishindika na kunishampa.

¹⁹Nivimiγambila ivi lushe, vishizati vibontoke, kangwe ndiho vibontoke, mtaile, kuti ni miyo.

²⁰Kweli namiti: Mwehokela ndiye nimtume, anihokela imi; kangi mwenihokela imi amhokela yuja anitumileye.

²¹Yesu akibinda kulonga ivyoho azaona futofuto mwe moyo wakwe, azalonga uwona angwe:

²²Kweli namiti: Ṅwenyu muṅwe neaniinkile. Wahina wazaolelana, hambu nkawataile, kuti amlonga ndai.

²³Wahina wakwe ṅwiyae ywawe muṅwe aiikale hehi na Yesu, kangi Yesu azamkundisha.

²⁴Simoni Petelo azamkonyeza, kangwe amwuze ati ni ndai, ayemlonga.

²⁵Yuja aikaleye hehi na Yesu azamuti: Zumbe, nindai?

²⁶Yesu azamwitikila angwe: Ni yuja, ndiye nimunke tonge nikibinda kujiginta mwe mshozi. Azaginta tonge mwe mshozi, azajimunka Yuda Isikaliyota, ṅwana Simoni.

²⁷Akibinda kuγuwa jiya tonge, Satani azamwingila. Yesu azamuti: Uvyoγoshola, ufikevibontola!

²⁸Waja waikalewo haja he nkande nkakuna ataileye, ati amlongelai ivyoho.

²⁹Hambu kuṅwe wazafanyanya kuγamba: Kwa kuti atoza mfuko wa shilingi, Yesu atemuti: Γula tivyoagiziγwa mishi ya mviko, ao ainkile kuṅwe kwa wakiwa!

³⁰Yuja akibinda kumeza jiya tonge azafikamulawa; miya ni kilo.

³¹Akibinda kumlawa, Yesu aγamba: Lushe ṅwanangwa ywa muntu azagimbikwa, kangi Mulungu azagimbikwa ndiye.

³²Mulungu akigimbikwa ndiye, Mulungu yohe amgimbika ṅwenye, kwa kuti ana naye, kangi neamgimbike nguzu.

³³Wanangu, mishi miγeke nike kwenyu; nemunilonde, kangi sa nilongilevyo waja Wayuda kuti: Imi nikohita, inywi nkamdaha kukubula, lushe hata inywi namilonga ivyoho.

³⁴Naminka mlaγilizo muhya, mkundishane! Sa iml nimikundishevyo, nenywi kundishanai ivyoho!

³⁵Na inu mbuli woshe watataila kuti: Mu wahina wangu, ati mwakundishana wenye na wenye.

³⁶Simoni Petelo amuti: Zumbe, uhita nahi? Angwe ni Yesu: Nikohita nako ivi lushe, nkudaha kunitongela, nezeunitongele mishi ya nyuma.

³⁷Petelo amuti: Zumbe, nini nikishedaha kukutongela lushe? Nenikiinkile kwa mbuli ya iwe!

³⁸Yesu azamlandula: Ukiinkile kwa mbuli ya imi? Kweli nakuti: Soγolo nkeikeme, uishikezile nkani katatu, kuti nku ywangu!