Read Kishambala Yohana 14 Bible Online

Yohana 14 - Kishambala bible

Yohana 14

¹Azawati wahina wakwe: Myoyo yenyu ishetendwe ni futofuto! Mtozeshei Mulungu! Kangi imi nami nitozeshai!

²Mwe nyumba ya Tate muna uikazi ungi; ati sivyo, nangamiti. Nahita, nimiliγanyize henyu!

³Kangi aho, ndiho nihitile kwa miliγanyiza henyu, neniuye vituhu, nimiγuwe na kwangu, kangwe niliho imi, hata inywi muhaikale.

⁴Nikohita nako, sila mwaitaila. Toma amuti: Zumbe, nkatitaila, ukohita nako, lushe sila tiitaile zeze?

⁶Angwe ni Yesu: Imi ni sila na ukweli na nkalamo; nkakuna ndiye abule kwa Tate, akishenitongela.

⁷Ati muzanitaila, mwangamtaila Tate yohe; lushe mwamtaila, mzamwona.

⁸Filipo amuti: Zumbe, tionyeshe Tate! Ne ndivyo vitibesheeze.

⁹Yesu amuti: Filipo, mishi yekuinga haja nizaanga na inywi, kangi nkunitaila? Anieneye imi azamwona Tate; ulonga ywai kuti: Tionyeshe Tate!

¹⁰Nkutozesha kuti: Imi niyaangilana na Tate, kangi Tate aangilana na imi? Mbuli, nizomilonga, sizilonga kwa imi ṅwenye. Tate mweikala kwangu yuja aγoshola ndima zakwe.

¹¹Nitozeshai kuti: Imi nina Tate, kangi Tate ana imi; ati mwashenitozesha, tozeshai kwa mbuli ya ziya ndima!

¹²Kweli namiti: Mwenitozesha, ziya ndima, nizoγoshola, yohena ataziγoshola, hata zekula kuzinka ziya ataziγoshola, kwa kuti imi nahita kwa Tate.

¹³Ndivyo mulombeze mwe zina jangu, neniviγoshole, kangwe Tate agimbikwe mwe ṅwanae.

¹⁴Ndivyo mulombeze mwe zina jangu, neniviγoshole.

¹⁵Ati mwanikundisha, tozeshai milaγilizo yangu!

¹⁶Imi nami nenimhembeleze Tate, aminke mulongezi mtuhu, aikale na inywi kale na kale; ni mpeho ye kweli;

¹⁷inu shi nkaidaha kuihokela, kwa kuti nkaiiolela, nkaiitaila. Inywi mwaitaila, hambu iikala kwenyu, kangi neiikale kwenyu vivyoho.

¹⁸Sezenimiashe wenye du, neniize kwenyu!

¹⁹Kukeshiγale hadodo, ne ndiho inu shi ishenione, miya inywi mwaniona, hambu imi ni moyo, kangi hata inywi mu moyo.

²⁰Uja mushi inywi mtataila, kuti imi nina Tate, kangi inywi muna imi, imi nami nina inywi.

²¹Mwena milaγilizo yangu na kuiγolokela ne mwenikundisha; kangi mwenikundisha nezeakundishiγwe ni Tate, nami nitamkundisha, nimwonyeshe nilivyo.

²²Angwe ni Yuda, miya siye yuja Isikaliyota: Zumbe, ni zeze, ukikunda kutionyesha ishwi, ulivyo, ukishevionyesha inu shi?

²³Yesu azalandula, azamuti: Ndiye anikundishe, atatoza mbuli yangu, ne Tate atamkundisha, titaiza, tiikale kwakwe.

²⁴Ashiyenikundisha nkatoza mbuli yangu; kangi mbuli, muyoiva, so yangu, ni ya Tate anitumileye.

²⁵Ivi nizavimiγambila nike kwenyu. Miya yuja mulongezi, yuja Mpeho mṅazi, ndiye Tate amtume mwe zina jangu, uyu atamifuza mbuli zoshe na kumikumbusha vyoshe, nimiγambilevyo.

²⁷Namiashiliza mpolele, mpolele yangu naiminka; kangi imi siminka, sa inu shi ivyominka; myoyo yenyu ishetende futofuto, Ishevivilwe!

²⁸Mzaiva, kuti nizamiγamba: Nahita, kangi nauya kwenyu. Ati mwanikundisha, mwangatamilwa, kuti nahita kwa Tate, hambu Tate ni mkulu kunizinka imi.

²⁹Kangi lushe nizavimiγambila, vishizati vibontoke, kangwe mtozeshe, ndiho vibontokele.

³⁰Senilonge na inywi mbuli nyingi, hambu zumbe ywa inu shi aiza, kangi nkana nguvu na imi,

³¹miya kangwe inu shi itaile, kuti namkundisha Tate, kangi viya, Tate anilaγilizevyo, naviγoshola: Inukai, tihauke!