Read Kishambala Yohana 2 Bible Online

Yohana 2 - Kishambala bible

Yohana 2

¹Mushi wa ntatu kuna nteγuzi uko Kana ya Galileya, hata nine ja Yesu a haho.

²Yesu yohena na wahina wakwe wazalalikwa kwe iyo nteγuzi.

³Mvinyo ukishoweka, Yesu azaγangwa ni nine: Nkawana mvinyo.

⁴Yesu azamlandula: Mlala, nina mbuli ani na iwe? Hambu hangu nkahazati habule.

⁵Yuja azalonga wafunguwo angwe: Ndivyo amilonge, viγosholei!

⁶Haja ne haina viγa mtandatu vya mawe, viikiγwe kwa vitigo vya Wayuda vya kukihaka, kila kiγa chiingila nange mbili ao ntatu.

⁷Yesu azawati Ivi viγa vimemezei mazi!

⁸Wazavimemeza mpaka ulanga. Azawati: Tekai lushe, mumwiγaile mzuγa mviγa! Wazaiγala.

⁹Yuja mzuγa mviγa azadomela yaja mazi yaγalamushiγweyo mvinyo, miya nkataile, ukoanduka, waja wafunguwo du watekilewo wazataila; yuja mzuγa mviγa azamwitanga ṅwenye nteγuzi,

¹⁰azamuti: Kila muntu aandiila kuinkila mvinyo mtana, wantu wakizatengela, ainkila ushitamawo vyedi; miya iwe uzaika mvinyo mtana mpaka ivi lushe.

¹¹Ichi ni chandilo cha ntangilo, Yesu aγosholecho kuja Kana ya Galileya na kuonyesha, utana wakwe ulivyo; wahina wakwe wazamtozesha.

¹²Vikibinda azasheela Kapelinaumu, ṅwenye na nine na wanduγuze na wahina wakwe, wazaikala kuja, miya so mishi mingi.

¹³Pasa ya Wayuda ikibula hehi, Yesu azakwela Yelusalemu.

¹⁴Muja mwe vikilongwa azaona wetaγa ṅombe na ngoto na visuwa manga, hata weγuzanya feza na senti waiikale haho.

¹⁵Azaγuwa ngole, azaziluka mkambala, azawaγulusha woshe muja mwe vikilongwa haṅwe na ngoto na ṅombe zawe, senti za waja weγuzanya azazikupula, meza zawe azazifununkula;

¹⁶waja wetaγa visuwa manga azawati: Viushei aha! Nyumba ya Tate msheiγalushe nyumba ya uchuluzi!

¹⁷Wahina wakwe wazafukila, kuti kuigondiγwe: Maya yanija kwa mbuli ya nyumba yako.

¹⁸Wayuda wazamlandula angwe: Utionyesha lwitangilo ani, kuti waviγoshola?

¹⁹Yesu azawahitula, azawati: Chakulai iji vikilongwa! Nenijizenge mishi mitatu!

²⁰Wayuda wazamlandula angwe: Iji vikilongwa jizengiγwe mavuli milongo mine na mtandatu, iwe ujizenge mishi mitatu?

²¹Miya yuja alongile mbuli ya vikilongwa ja ṅwili wakwe.

²²Akibinda kufufuka kwa wafilewo, wahina wakwe wazakumbuka, kuti azalonga inu mbuli, wazatozesha ugondengwa na iyo mbuli, Yesu alongileyo.

²³Akiikala Yelusalemu mishi ya mviko wa Pasa, wangi wazatozesha zina jakwe wakiona ziya ntangilo, azoγoshola.

²⁴Miya Yesu ṅwenye nkaalile, kuti wamtozesha, kwa kuti aiwataile woshe;

²⁵hambu nkaagiziγwe ni kulongwa uwona kwa mbuli ya muntu, hambu ṅwenye aitaile vye mwe moyo wa muntu.