Read Kishambala Yohana 20 Bible Online

Yohana 20 - Kishambala bible

Yohana 20

¹Mhitu wa hosi wa juma Maliya Magadalene azahita makelokelo kwe mbila, kukena lwiza; akibula azaona, kuti jiya iwe jiiushiγwe he mbila.

²Ne ahofikahita na kuγuluka kwa Simoni Petelo na kwa yuja mhina, Yesu amkundisheye, awati: Wazamwinula Zumbe mwe ija mbila, nkatitaila, wamwikileho.

³Petelo na yuja mhina mtuhu wazalawa, wazahita kwe mbila.

⁴Awa waili wazaγuluka makiṅwe; yuja mhina mtuhu azamhota Petelo na kuγuluka, azalongola kuhula kwe mbila,

⁵akishungila azaona ziya shuke, ziiikonyiγwe, miya nkaingile.

⁶Simoni Petelo azashilikiza kuhula, azaingila mwe mbila, azaona ziya shuke,

⁷ziikiγwe, kangi uja mhaluma, akantiγwewo nawo mutwi, nkauikiγwe haṅwe na ziya shuke, miya uikonyiγwe, uiikiγwe hantu hakwe nkandai.

⁸Hatayuja mhina mtuhu alongoleye kubula kwe mbila, azaingila yohena, azaviona, azatozesha.

⁹Hambu nkawazati wataile uja ugondengwa wa kuγamba: Shuti afufuke kwa wafilewo.

¹⁰Waja wahina wazauya na kwawe.

¹¹Maliya aiγoloke se he mbila, alila. Aho akilila azashungila mwe mbila,

¹²azaona walau waili wazwikilewo shuke zeṅala, waiikale, muṅwe haja he mutwi, muṅwe haja he milundi, ndiho kimba cha Yesu chiikiγwe.

¹³Waja wamuti: Mlala, ulilai? Awati: Kwa kuti wazamwinula Zumbe ywangu, kangi sitaila, wamwikileho.

¹⁴Akilonga ivyoho azahituka na nyuma, azamwona Yesu, aiγoloke, kangi nkataile, kuti ni Yesu.

¹⁵Yesu amuti: Mlala, ulilai? Umlonda ndai? Yuja azafanyanya kuti: Ni mγolokezi ywa mγunda, amγamba: Zumbe, ati iwe uzamwinula, niγambila, umwikileho, nikamwinule imi!

¹⁶Yesu amuti: Maliya! Yuja azahituka, amlonga Kiebuleyo angwe: Labuni!, ni kuγamba: Mfuzi.

¹⁷Yesu amuti: Ushenidowe! Hambu sizati nikwele kwa Tate. Miya hita kwa wanduγu wangu, uwaγambile kuti: Nakwela kwa Tate na kwa ishe ywenyu, kwa Mulungu ywangu na kwa Mulungu ywenyu!

¹⁸Maliya Magadalene azahita, azaviukwila waja wahina angwe: Nizamwona Zumbe, kangi azaniγambila visiku.

¹⁹Lwa ṅwiyaγulo uja mushi wa bosi wa sikunkulu wahina wazaunganana, miya nyuvi ziizuγalwe muja, walimo, kwa mbuli ya woγa na Wayuda. Aho Yesu azaiza, azaγoloka gati, azawati: Mpeho na inywi!

²⁰Akilonga ivyoho azawaonyesha maγasa na luja lubazu lwakwe. Waja wahina wakimwona Zumbe wazatamilwa.

²¹Yesu azawati vituhu: Mpeho na inywi! Sa Tate anitumilevyo, ne imi nami nivyomituma.

²²Akibinda kulonga ivyoho azawavuzila angwe: Hokelai Mpeho mṅazi!

²³Ndiwo muwaushilize uhuza, ne wazauushiliziγwa; ndiwo mshewauushilize, ne nkawauushiliziγwa.

²⁴Waja kumi na waili ṅwiyae ywawe muṅwe ni Toma mweitangwa Mpasha, ne aishi haṅwe nawo, Yesu akiiza.

²⁵Waja wahina watuhu wazamuti: Tizamwona Zumbe! Miya azawati: Nikisheona nkozu za misumali mwe maγasa yakwe, nikishegela chala changu mwe izo nkozu za misumali, nikishegela mkono wangu haja he luja lubazu lwakwe, senitozeshe!

²⁶Mishi mnane ikizinka, wahina wakwe wazaunganaha vituhu mwe ija nyumba, hata Toma a haṅwe nawo; nyuvi ziizuγalwe vivyoho, ne Yesu ahoiza, azaγoloka gati angwe: Mpeho na inywi!

²⁷Vikibinda azamγamba Toma: Lete chala chako na kunu, uolele maγasa yangu! Lete mkono wako, uugele mwe lubazu lwangu! Usheγaluke muntu ashiyetozesha, uγaluke muntu mwetozesha!

²⁸Toma azahitula angwe: Zumbe ywangu na Mulungu ywangu!

²⁹Yesu amuti: Kwa kuti uzaniona, ne uhotozesha. We nyemi ni waja wetozesha na kusheona!

³⁰Ntangilo nyingi ntuhu Yesu azaziγoshola, wahina wakwe waiolele, zishigondiγwezo mwe ichi kitabu.

³¹Izi zigondiγwe, kangwe mtozeshe kuti: Yesu ni Kilisito, ṅwana Mulungu, kangwe kuja kutozesha kwenyu mwonele nako nkalamo ye mwe zina jakwe.