Read Kishambala Yohana 21 Bible Online

Yohana 21 - Kishambala bible

Yohana 21

¹Ziya mbuli zikibontoka, Yesu azalawila waja wahina vituhu he bahali ya Tibeliya. Awalawilevyo ni iviho:

²Simoni Petelo na Toma mweitangwa Mpasha na Natanayeli ywa Kana ya Galileya na wana Zebedeyo na wahina wakwe watuhu waili ne wai haṅwe.

³Simoni Petelo awati weyae: Nahita kwa lowa. Wazamwitikila: Hata ishwi tihite haṅwe na iwe! Wazalawa, wazaingila mwe chombo, miya chiya kilo nkawana wagwizilevyo.

⁴Kukicha Yesu azaγoloka mpwai, miya waja wahina nkawataile, kuti ni Yesu.

⁵Yesu awati: Wanangu, nkamna vya ja? Wazamlandula: Do.

⁶Azawati: Gelai lwavu lwazu lwa kulume lwa chombo, nemwonele! Wazalugela, miya nkawadahile kuluhuna kwa ungi wa nyama za bahali.

⁷Yuja mhina, Yesu amkundisheye, azamuti Petelo: Ni Zumbe yuja! Simoni Petelo akiiva, kuti ni Zumbe, azakanta nkazu yakwe, hambu ne ai bule, azalumbila na mwe bahali.

⁸Miya waja wahina watuhu wazahita na chombo, hambu ne waishi hale na mpwai, ni mikono magana maili, wazahuna lwavu na ziya nyama.

⁹Wakibula kuja mpwai wazaona makala ya moto yaikiγweyo na makapala muja zikoi na vimande.

¹⁰Yesu awati: Letei makapala kuṅwe, mugwizileyo ivi lushe!

¹¹Simoni Petelo azahita, azahuna lwavu na mpwai, luna nyama nkulu muno gana na milongo mishano na ntatu; hata zikiγenela ivyoho, lwavu nkaludwikile.

¹²Yesu awati: Izai na kunu, mkishashule! Waja wahina nkakuna atozizeye moyo kumwuza: Iwe u ndai? Hambu wazataila, kuti ni Zumbe.

¹³Yesu aiza, aγuwa kimande, awainka, hata kapala vivyoho.

¹⁴Ako ni ka ntatu, Yesu akilawila waja wahina akibinda kufufuka.

¹⁵Wakibinda kukishashula, Yesu amγamba Simoni Petelo: Simoni, ṅwana Yohana, wanikundisha kuzinka awa? Angwe: Ehe, Zumbe! Iwe wataila, kuti nakukundisha. Angwe: Lisha viγoto vyangu!

¹⁶Vituhu amγamba Petelo ka mbili: Simoni, ṅwana Yohana, wanikundisha? Angwe: Ehe, Zumbe! Iwe wataila, kuti nakukundisha. Amuti: Γolokela ngoto zangu!

¹⁷Amγamba ka ntatu: Simoni, ṅwana Yohana, wanikundisha? Petelo azaona ukiwa, kuti amwuza ka ntatu: Wanikundisha?, azamuti: Zumbe, wataila mbuli zoshe, iwe wataila, kuti nakukundisha. Yesu amuti: Lisha ngoto zangu!

¹⁸Kweli nakuti: Aho, ndiho ui mubwanga, uzakikanta ṅwenye, uzaanga, ukundileko. Miya ndiho udalahale, neukusule mikono yako, kangi mtuhu atakukanta, akuiγale ushikundako.

¹⁹Inu mbuli ailongile, kangwe amwonyeshe mifiile, ndiyo amgimbike Mulungu nayo. Akibinda kulonga ivi, amti: Nitongela!

²⁰Petelo azahituka, azamwona yuja mhina, Yesu amkundisheye, kuti amtongela; ni yuja ndiye akiikala hehi na Yesu wakija nkande za ṅwiyaγulo, akimwuza: Zumbe, ni ndai mwekuinkila?

²¹Petelo akimwona uyu amγamba Yesu: Zumbe, uyu ana mbwai?

²²Yesu amuti: Ati imi nakunda, aikale, mpaka nikizaiza, iwe una mbwai navyo?

²³Iwe nitongela du! Ne iyo mbuli iandukeho, wanduγu wakihalonga: Yuja mhina nkafa. Miya Yesu nkalongile kuti: Nkafa, miya alongile: Ati nakunda, aikale, mpaka nikizaiza, iwe una mbwai navyo?

²⁴Uyu ni yuja mhina mwelongela izi mbuli uwona, ne azigondileye, kangi tataila, kuti uwona wakwe ni wa kweli.

²⁵Miya kuna mbuli nyingi ntuhu, Yesu aγosholezo; ati ziya zagondwa ṅwenga ṅwenga, nanga naγamba: Hata mwe ngulu ngima nkeviγendwe viya vitabu, ndivyo vizigondwe.