Read Kishambala Yohana 3 Bible Online

Yohana 3 - Kishambala bible

Yohana 3

¹Ne kwina muntu, ni ywa Mafaliseyo, zina jakwe ndiye Nikodemo, ni mfuṅwa ywa Wayuda.

²Uyu azahita kwa Yesu na kilo, azamuti: Mfuzi, tataila kuti: Iwe u mfuzi ulawileye kwa Mulungu; hambu nkakuna mwedaha kuγoshola ziya ntangilo, uzoγoshola iwe, ati nkaanga na Mulungu.

³Yesu azamhitula, azamuti: Kweli nakuti: Muntu akishevyalwa ka mbili nkadaha kuona uzumbe wa Mulungu.

⁴Nikodemo azamuti: Muntu adaha zeze kuvyalwa ai mdala? Atadaha kuingila vituhu mwe ifu ja nine, avyalwe?

⁵Angwe ni Yesu: Kweli nakuti: Muntu akishevyalwa mwe mazi na mpehongwa, nkadaha kuingila mwe uzumbe wa Mulungu.

⁶Vivyelwevyo ni muntu, ni muntu vivyoho; vivyelwevyo ni mpehongwa, ni mpeho vivyoho.

⁷Ushemake, nikikuti: Shuti muvyalwe ka mbili!

⁸Mpeho ikunta ihokunda; waiva kuvumila kwakwe, miya nkutaila, ikoanduka ao ikohita kwa helela; ne kila avyelweye ni mpehongwa alivyo.

⁹Nikodemo azamhitula, angwe: Ivi vidahikana zeze?

¹⁰Yesu azamhitula, azamuti: Iwe u mfuzi ywa Kiisilayeli, kangi ivi nkuvitaila?

¹¹Kweli nakuti: Tibilikila tivyotaila; tienevyo tavilongela uwona, miya uwona wetu nkamwuhokela.

¹²Vya inu shi nikivimiγambila, mkishevitozesha, mtozesha zeze, nikimiγambila viya vya lwingu?

¹³Nkakuna akwezileye mwe lwingu kushima yuja asheeleye mwe lwingu, ni ṅwanangwa ywa muntu.

¹⁴Sa Mose akwezizevyo nyoka mwe nyika, ṅwanangwa ywa muntu yohe nezeakweziγwe sa viyaho,

¹⁵kangwe kila mwemtozesha ainkwe nkalamo ya kale na kale.

¹⁶Hambu Mulungu azaikundisha inu shi, akimwinkila ṅwanae mwe ike, kangwe ndiye amtozeshe ashezaaγa, miya nezeainkwe nkaiamo ya kale na kale.

¹⁷Hambu Mulungu nkamtumile ṅwanae mwe inu shi, ailahe inu shi, miya inu shi ivunilwe ndiye.

¹⁸Mwemtozesha nkalahwa, ashitozeshaye aibindile kulahwa, kwa kuti nkatozeshe zina ja ṅwanangwa ywa Mulungu mwe ike.

¹⁹Mlaho ni unu kuti: Langaila jizaingila mwe inu shi, miya wantu wazakundisha lwiza kuzinka langaila, hambu miγoshwele yawe ni mibada.

²⁰Hambu kila mweγoshola vibada aihilwa ni langaila kangi nkabula he langaila, kangwe ndima zakwe zishebunkuke.

²¹Miya mweγoshola vye kweli ahita kwe langaila, kangwe ndima zakwe zimanyike, kuti ziγosholwe na Mulungu.

²²Vikibinda Yesu na wahina wazahita mwe shi ya Yudeya, azanyamala nawo uko, akibatiza.

²³Yohana yohe azaikala na kubatiza kuja Enoni hehi na Salemu, hambu kuja mazi ni mangi, hata wantu wazaiza, wazabatizwa ndiye.

²⁴Hambu Yohana ne ashizati agelwe mwe chumba.

²⁵Wahina wa Yohana ne waina mkanano na Muyuda kwa mbuli ya kukihaka.

²⁶Wazahita kwa Yohana, wazamuti: Mfuzi, aizileye kwako kuja sheja ja Yolodani, umlongeleye uwona, yuja abatiza, kangi wantu woshe wahita kwakwe.

²⁷Yohana azawalandula, azawati: Muntu nkana achodaha kuhaγuwa, ati nkachiinkiγwe mwe lwingu.

²⁸Inywi wenye mwanilongela uwona, kuti nizalonga: Imi si Kilisito, miya nitumiγwe, nimlongwele yuja.

²⁹Mwena kilumbu ni ṅwenye nteγuzi; miya mbuyae ja ṅwenye nteγuzi aikala nkandai, amteγeleza, atamilwa ni kanwa cha yuja ṅwenye nteγuzi. Inu nyemi yangu izabontoka lushe.

³⁰Yuja shuti akule, imi shuti nipunguke.

³¹Mwelawa uko mwe lwingu ni mkulu kuzinka woshe; yuja ywa kiinushi aanduka mwe inu shi, alonga viya vya inu shi. Mwelawa mwe Iwingu ni mkulu kuzinka wosheni.

³²Aenevyo na aivilevyo, avilongela uwona, kangi uwona wakwe nkakuna mweuhokela.

³³Mwehokela uwona wakwe, avilongela uwona, kuti Mulungu ni mkweli.

³⁴Hambu yuja, Mulungu amtumileye, alonga mbuli za Mulungu, hambu nkainkila mpehongwa na kuihima.

³⁵Tate amkundisha ṅwanae, azainkila vyoshe mwe mkono wakwe.

³⁶Mwemtozesha ṅwanangwa ana nkalamo ya kale na kale; mwemupapalika ṅwanangwa nkeaone nkalamo, miya maya ya Mulungu yatamwikaila.