Read Kishambala Yohana 8 Bible Online

Yohana 8 - Kishambala bible

Yohana 8

¹Yesu azahita kwe mulima wa miziyaγembe.

²Kukicha azahita vituhu mwe vikilongwa, wantu woshe wazamtimila, azaikala akiwafuza.

³Watabaluwangwa na Mafaliseyo wazaleta mvyele agwizilweye akiγoshola kilanga.

⁴Wazamuti: Mfuzi, uyu mvyele agwizilwe aho akiγoshola kilanga.

⁵Miya Mose azatilaγiliza mwe mulomongwa, we ivyoho tiwakome na kuwahomela mawe.

⁶Lushe iwe uγambai? Ivyoho wazavilonga na kumγeza, kangwe waone ndivyo wamfyalime. Miya Yesu azainama na shi, azagonda na chala mwe shanga.

⁷Miya wakishedila kumwuza, azainuka, azawati: Inywi ashiye mhuza aandiile kumhomela iwe!

⁸Azainama vituhu akigonda haja shi.

⁹Waja wakiviiva wazalawa muṅwe muṅwe, waivotiγwe mwe myoyo yawe; waandiilewo ni waγolokezi; azaashiγwa ike, kangi yuja mvyele a haja gati.

¹⁰Yesu azainuka, azamuti: Mlala, waja wakufyalimewo wa kuhi? Nkakuna akulahileye?

¹¹Angwe: Nkakuna, Zumbe. Angwe ni Yesu: Imi nami sikulaha; hita! Miya lushe hela kuγoshola uhuza!

¹²Yesu azawalonga vituhu angwe: Imi ni langaila ja inu shi. Mwenitongela nkeaange mve lwiza, miya ataona langaila ja nkalamo.

¹³Mafaliseyo wazamuti: Ukilongela uwona ṅwenye, uwona wako so wa kweli.

¹⁴Yesu azawalandula angwe: Hata nikikilongela uwona ṅwenye, uwona wangu ni wa kweli, kwa kuti nataila, nikoanduka nako, kangi nikohita nako; miya inywi nkamtaila, nikoanduka nako, kangi nikohita nako.

¹⁵Inywi mulaha kimuntu, miya imi sina, niyelaha.

¹⁶Ati imi nalaha, anga milahile yangu ni ya kweli, kwa kuti si ike, miya ni haṅwe na yuja anitumileye.

¹⁷Kangi mwe milomo yenyu mwigondiγwe kuti: Uwona wa wantu waili ni wa kweli.

¹⁸Imi nakilongela ṅwenye uwona, kangi Tate anitumileye anilongela uwona.

¹⁹Wazamuti: Isho a kuhi? Yesu azawalandula angwe: Imi nkamunitaila, hata Tate nkamumtaila; ati mwanitaila imi, Tate yohe mwangamtaila.

²⁰Izi mbuli azilongile akifuza mwe vikilongwa he kisanduku cha ntogolo. Nkakuna amgwizileye, hambu hakwe nkahazati hakinte.

²¹Azawalonga vituhu angwe: Imi nahita, inywi nemunilonde, miya nemufe na uhuza wenyu. Nikohita nako imi, inywi nkamdaha kukubula.

²²Wayuda wazaγamba: Atakikoma ṅwenye, kwa kuti aγamba: Nikohita nako, inywi nkamdaha kukubula?

²³Azawati: Inywi mwanduka uko shi, imi nianduka uko ulanga; inywi mwaanduka mwe inu shi, imi sianduka mwe inu shi.

²⁴Kwa ivyoho nizamiti: Nemufe na uhuza wenyu! Hambu mkishetozesha, kuti ni miyo, nemufe na uhuza wenyu. Wazamuti: Iwe u ndai?

²⁵Angwe ni Yesu: Ṅwande nizavimiγambila, kuti ni miyo ndai.

²⁶Mbuli zenyu nyingi nina nazo za kulonga na za kulaha, miya yuja anitumileye ni mkweli; nami viya, niivilevyo kwakwe, navilonga kunu shi.

²⁷Nkawataile, kuti azawalonga mbuli ya ishe.

²⁸Yesu azawati: Aho ndiho nezemumkweze ṅwanangwa ywa muntu, ne ndiho mtaile, kuti ni miyo; imi ṅwenye sina nivyoγoshola, Tate anihinyizevyo, navilonga.

²⁹Yuja anitumileye a haṅwe na imi, nkaniashize ike, hambu mishi yoshe naγoshola vyemtamila.

³⁰Akilonga izi mbuli, wangi wazamtozesha.

³¹Yesu azawaγamba waja Wayuda wamtozeshewo: Ati inywi mwaikala na mbuli yangu, mu wahina wangu kweli;

³²nemtaile vye kweli, kangi viya vye kweli vitamikombola.

³³Wazamlandula angwe: Ti mbeleko ya Abulahamu, nkatina tiyemwikaila utuṅwa kale hoshe, lushe ulonga ywai kuti: Nezemkombolwe?

³⁴Yesu azawalandula angwe: Kweli namiti: Kila mweγoshola uhuza ni mluṅwa ywa uhuza.

³⁵Kangi mtuṅwa nkaikala kale na kale mwe iyo nyumba ṅwenga, ṅwana vyale aikala mumo kale na kale.

³⁶Ati ṅwana vyale amikombola, ne mtakombolwa kweli.

³⁷Nataila kuti: Mu mbeleko ya Abulahamu, miya mwalonda kunikoma, kwa kuti mbuli yangu nkaiikala kwenyu.

³⁸Nienevyo kwa Tate, ne nivyolonga; lushe inywi mwivilevyo kwa Tate, viγosholei!

³⁹Wazamlandula angwe: Tate yweshu ni Abulahamu. Yesu azawati: Ati mu wana Abulahamu, γosholai ndima za Abulahamu!

⁴⁰Miya lushe mwalonda kunikoma imi muntu nimiγambileye vye kweli, niivilevyo kwa Tate. Abulahamu nkaγoshoh ivyoho.

⁴¹Inywi mwaγoshola ndima za ishe ywenyu. Angwe ndiwo: Nkativyelwe kihuza, tina tate yweshi muṅwe, ni Mulungu.

⁴²Yesu azawati: Ati Mulungu ni ishe ywenyu, mwanganikunda. Hambu imi nilawile kwa Mulungu, ne nikoanduka;

⁴³hambu siizile kwa mbuli yangu, yuja atenituma.

⁴⁴Nini mkishetaila milongele yangu? Kwa kuti nkamdaha kuiva mbuli yangu. Inywi mwaanduka kwa ishe ywenyu, ni yuja ṅwenye leba, kangi mwakunda kuγoshola, ishe ywenyu avyoheheleziγwa ndivyo; yuja ne mkoma wantu hata kale, na viya vye kweli nkaikala navyo, kwa kuti ṅwenye vye kweli nkana navyo. Akilonga vye mambeza, alonga vyeanduka kwakwe ṅwenye, hambu ni mumambeza, ni ishe ja mambeza.

⁴⁵Miya kwa kuti imi nilonga vye kweli, nkamunitozesha.

⁴⁶Kwenyu kuna mwenibunkula uhuza? Ati nilonga vye kweli, nini inywi mkishenitozesha?

⁴⁷Mweanduka kwa Mulungu aiva mbuli za Mulungu; kwa ivyoho inywi nkamziiva, kwa kuti nkamwanduka kwa Mulungu.

⁴⁸Wayuda wazamlandula angwe: So kweli, tikilonga kuti: U Msamaliya, una mzimu?

⁴⁹Yesu azawahitula angwe: Imi sina mzimu, miya nimgimbika Tate, miya inywi mwanieza.

⁵⁰Imi silonda, nigimbikwe, kuna mwenilonda na kulaha.

⁵¹Kweli namiti: Ati muntu aγoja mbuli yangu, kifa nkeachione kale na kale.

⁵²Wayuda wazamuti: Lushe tizataila kuti: Una mzimu. Abulahamu azafa, hata wateγanyingwa, kangi iwe waγamba: Ati muntu aγoja mbuli yangu, nkezeaone kifa kale na kale.

⁵³Kumbe iwe u mkulu kumzinka tate yweshu Abulahamu afileye? Kangi wateγanyingwa wazafa; ukiγalusha ndai?

⁵⁴Yesu azalandula: Ati imi nakigimbika ṅwenye, anga utana wangu ni wa bule; miya ni Tate mwenigimbika imi, ni yuja, muyelonga, kuti ni Mulungu ywenyu.

⁵⁵Miya nkamumtaila, miva imi namtaila; ati naγamba: Simtaila, anga ni mumambeza sa inywi. Miya namtaila, kangi naγoja mbuli yakwe.

⁵⁶Ishe ywenyu Abulahamu azatowa zumo, akiγambilwa, kuti neaone mushi wangu, kangi azauona, azatamilwa.

⁵⁷Wayuda wazamuti: Nkuzati ubinde mavuli milongo mishano, uγambe, uzamwona Abulahamu?

⁵⁸Yesu azawati: Kweli namiti: Abulahamu ashizati avyalwe, imi ni haho.

⁵⁹Ne wahododola mawe, kangwe wamhomele, miya Yesu azafishiγwa, azalawa mwe vikilongwa.