Read Kishambala Yohana 9 Bible Online

Yohana 9 - Kishambala bible

Yohana 9

¹Yesu akianga azaona muntu avyelweye tuntu.

²Wahina wakwe wazamwuza angwe: Mfuzi, abanileye ni ndai, ni uyu, hambu ni wavyazi wakwe, akivyalwa tuntu?

³Yesu azalandula: Uyu nkabanile, hata wavyazi nkawabanile, miya kangwe mwe ṅwili wakwe mtailikane, ndima za Mulungu zilivyo.

⁴Ishwi shuti tiγoshole ndima za yuja anitumileye, kuke mushi, hambu kilo chaiza, ne nkahana ndiye adahe kuγoshola ndima.

⁵Nike mwe inu shi, ni langaila ja inu shi.

⁶Akibinda kulonga ivyoho azashwa mate na shi, azaγoshola ntaγata na mate, azamubadika iyo ntaγata mwe mesho angwe:

⁷Hita, ukahake mwe ziwa ja Silowa! Bontokelo ja iji zina ni kuγamba: Ntuṅwa. Azahita, azahaka, azauya na mesho yeona.

⁸Wahundo weyae na waja wamwenewo kale, kuti aakalombeza, wazaγamba: Uyu so yuja, ndiye akiikaia na kukalombeza weyae?

⁹Kuṅwe wazaitikila: Ndiye, kuṅwe wazakela nkani kuti: Siye, atafanana naye du.

¹⁰Yuja ṅwenye azaγamba: Ni miyo. Wazamuti: Mesho yako yaγubulwe zeze?

¹¹Yuja azawahitula: Yuja muntu mweitangwa Yesu azaγoshola ntaγata, azaishishila mwe mesho yangu angwe: Hita kwe ziwa ja Silowa, ukahake!

¹²Nizahita, nizahaka, ne nihoona. Wazamuti: Yuja a kuhi? Angwe: Sitaila.

¹³Yuja, ndiye ai tuntu, wazamwiγala kwa Mafaliseyo.

¹⁴Uja mushi, Yesu aγosholewo nawo ija ntaγata akiγubula mesho ya yuja muntu, ni mushi wa sabato.

¹⁵Mafaliseyo wazamwuza vituhu, vilekilevyo, akidaha kuona; azawati: Azabadika ntaγata mwe mesho yangu, nizahaka, ne nihoona.

¹⁶Mafaliseyo kuṅwe wazalonga: Yuja muntu nkaanduka kwa Mulungu, kwa kuti nkagimbika sabato. Watuhu wazaγamba: Muntu mhuza adaha zeze kuγoshola ntangilo zeinga aho?

¹⁷Ne wavyopangana. Yuja tuntu wazamuti vituhu: Iwe uγambai, kuti ndiye ndai, kuti azakuγubwila mesho yako? Angwe: Ni mteγanyingwa.

¹⁸Wayuda nkawatozeshe mbuli yakwe kuti: Ne ai tuntu, ateona lushe, mpaka wakiilanga wavyazi wa yuja aγubwilweye mesho,

¹⁹wazawauza angwe: Uyu ni ṅwana ywenyu, muyelonga kuti: Avyelwe tuntu? Ivi aona zeze?

²⁰Wavyazi wakwe wazawahitula angwe: Tataila kuti: Uyu ni ṅwana ywetu, avyeiwe tuntu.

²¹Miya vilekilevyo, akiona lushe, nkativitaila, hata amγubwileye mesho nkatimtaila ishwi. Mwuzei ṅwenye! Ni muntu mgima, ṅwenye adaha kulonga mbuli zakwe.

²²Wavyazi wakwe walongile ivyoho, kwa kuti wazaogoha Wayuda. Hambu mishi ija Wayuda waiivane kuγamba: Ndiye alonge cha sale kuti: Yesu ni Kilisito, alemeziγwe miviko!

²³Kwa ivyoho wavyazi wakwe wazaγamba: Ni muntu mgima, mwuzei ṅwenye!

²⁴Yuja muntu, ndiye ai tuntu, wazamwitanga vituhu, wazamuti: Mgimbike Mulungu! Ishwi tataila kuti: Yuja muntu ni mhuza.

²⁵Yuja azawalandula, azawati: Ati yuja ni mhuza, sitaila, nataila mbuli ṅwenga du kuti: Imi ndiwo nii tuntu, naona lushe.

²⁶Wazamuti: Akutendile vivihi? Akuγubwile zeze mesho yako?

²⁷Azawahitula angwe: Kangi nizabinda kuvimiγambila, nkamwivile, lushe mukundilai kuviiva vituhu? Hambu hata inywi mwakunda kuγaluka wahina wakwe?

²⁸Wazamkanka, wazamuti: Iwe u mhina ywakwe, ishwi ti wahina wa Mose.

²⁹Ishwi tataila kuti: Mose ne alongileye na Mulungu, miya uyu nkatitaila, akoanduka nako.

³⁰Yuja muntu azawalandula angwe: Inu mbuli ni ya kumaka kuti: Inywi nkamtaila, akoanduk? nako, kangi azaniγubwila mesho yangu.

³¹Tataila kuti: Mulungu nkaiva wahuza; miya muntu akimwogoha Mulungu, akiγoshola avyokunda, uyu atamwiva.

³²Kale hoshe nkakuivike, kuti kuna amγubwileye muntu mesho avyelweye tuntu.

³³Ati uyu nkaanduke kwa Mulungu, anga nkakuna adahilecho kuγoshola.

³⁴Wazamlandula angwe: Iwe ṅwili wako woshe uvyelwe na uhuza, lushe iwe utifuze? Ne wahomshindika na se.

³⁵Yesu azaiva, kuti wazamshindika na se; akimwona amuti: Iwe wamtozesha ṅwanangwa ywa muntu?

³⁶Yuja azahitula angwe: Zumbe, ni ndai, nimtozeshe?

³⁷Yesu azamuti: Uzamwona, mwelonga na iwe ndiye.

³⁸Angwe: Natozesha, Zumbe. Ne ahomkinila na kumvika.

³⁹Yesu azalonga: Ṅiizile mwe inu shi kwa gwisha masa, kangwe washionawo waone, kangi waja weona waγaluke matuntu.

⁴⁰Mafaliseyo kuṅwe, awona nawo, wakiiva izi mbuli wazamuti: Kumbe hata ishwi ti matuntu?

⁴¹Yesu azawati: Ati mu matuntu, anga nkamna masa; miya lushe mwalonga kuti: Taona, ne masa yenyu yahoikala.