Read Kishambala Ntuṅwa 1 Bible Online

Ntuṅwa 1 - Kishambala bible

Ntuṅwa 1

¹Ṅwiyangu Teyofilo, kitabu cha bosi nizachibinda cha viya, Yesu aandilevyo kuγoshola na kufuza

²mpaka uja mushi, ahoinulwa na mwe lwingu; ne abindileho kulaγiliza ziya ntuṅwa, ashaγulezo, viya vya mpeho ṅazi.

³Kangi ni waja, aonyeshewo na ntangilo nyingi haja akibinda kulumiziγwa, kuti a moyo; aakawalawila mishi milongo mine akiwaukwila viya vya uzumbe wa Mulungu.

⁴Akiwaunganyanya azawalaγiliza: Msheuke kuja Yelusalemu, miya mwafize uwo msuhi wa Tate, mwivilewo kwangu!

⁵Hambu Yohana ne akibatiza na mazi, miya inywi nemubatizwe na mpeho ṅazi, kukizinka mishi miγeke du.

⁶Miya waungananewo wazamwuza angwe: Zumbe, mishi ija ne ndiho ushimikile Waisilayeli uzumbe?

⁷Azawaγamba: So mbuli yenyu kutaila, mishi ija ihozabula, Tate aikileyo kwa nguvu yakwe ṅwenye;

⁸komo mhokele nguvu ya mpeho mṅazi aho ndiho nezeimiizile, mγaluke waona wangu uko Yelusalemu na mwe shi ngima ya Yudeya na ya Samaliya na kosheni mpaka kwe mihelo ya shi.

⁹Akiwaγambila izi mbuli, wakiolela, azainulwa, zunde jizamγuwa, jizamwusha, waiolele.

¹⁰Waja wakiolela, avyohita na mwe lwingu, ne waγoshi waili wahoγoloka haja, waliho, wazwikilewo shuke zeṅala,

¹¹wazawati: Waγoshi wa Galileya inywi, nini mkiγoloka na kuolela na kwe lwingu? Uyu Yesu sa iviho avyoinulwa na mwe lwingu akiushiγwa kwenyu, ne ndivyo nezeaize, sa iviho mumwenevyo, akihita na mwe lwingu.

¹²Haho wakihauka he uja mulima wa miziyaγembe wazauya Yelusalemu; unu mulima u hehi na Yelusalemu, ni kadambo kashinako ṅwiko na sabato.

¹³Wakibula kaya wazakwela mwe tala ja ija nyumba, wamoikala, ni Petelo na Yohana na Yakobo na Andeleya na Filipo na Toma na Balitolomeyo na Mateyo na Yakobo, ṅwana Alifeyo, na Simoni Zelote na Yuda, ṅwana Yakobo.

¹⁴Awa woshe wazatenda moyo muṅwe wakishindiza vika haṅwe na wavyelengwa na Maliya, nine ja Yesu, na wanduγuze wa Yesu.

¹⁵Mishi ija Petelo azawalawila waja wanduγu; kangi jiya bumba joshe jiungananejo muja jizaγelemuka mazina gana na milongo mili, azawati:

¹⁶Waγoshi kangi wanduγu wangu, vizaagiza, kunebontoka ugondengwa, sa mpeho ṅazi ilongilevyo na kanwa cha Dawidi kale kwa mbuii ya Yuda; uyu azawalongwela waja wamgwizilewo Yesu.

¹⁷Kangi ne akitalwa haṅwe na ishwi, yohe azapangilwa unu ufuṅwa wetu.

¹⁸Uyu azamota luja lubuwa na kitumulo cha ubada wakwe; azakina funi, ne ahotumbuka ṅwili gati, matumbo yakwe yoshe yazalawa.

¹⁹Inu mbuli izamanyika kwa wantu woshe weikala Yelusalemu, wazaitanga Iuja lubuwa na milongele yawe: Akelidama, ni kuγamba: Lubuwa lwe mpome.

²⁰Hambu mwe kitabu cha mazumo kuigondiγwe: Nyumba yakwe nezeiγaluke huzu, nkezekuoneke mwemwikala, kangi: Uolezi wakwe shuti uhile na mtuhu!

²¹Lushe kuna waγoshi waangilewo na ishwi mishi yoshe, Zumbe Yesu akiingila kwetu mpaka akikulawa,

²²kuandiila akibatizwa ni Yohana mpaka uja mushi akiinulwa, akiushiγwa kwetu, waja vyaagiza, ṅwiyae ywawe muṅwe alongele ufufuki wakwe uwona haṅwe na ishwi.

²³Wazaγolosha waili, Yosefu mweitangwa Balisaba, vituhu aitangwa Yusito, na ṅwiyae Matiya.

²⁴Wazavika angwe: Iwe Zumbe, wataila myoyo ya wantu woshe, awa waili tionyeshe yuja,

²⁵umshaγuleye, aγuwe unu ufuṅwa na ntuṅwa, Yuda aashizewo, kangwe ahite na haja hantu hakwe ṅwenye.

²⁶Wazawatowela lusolo; lusolo luzagwa na kwa Matiya, ne ahogimbikwa haṅwe na ziya ntuṅwa kumi na muṅwe.