Read Kishambala Ntuṅwa 11 Bible Online

Ntuṅwa 11 - Kishambala bible

Ntuṅwa 11

¹Ntuṅwa na wanduγu wa Yudeya wazaiva, kuti wamzimu wohena wazahokela mbuli ya Mulungu.

²Petelo akikwela Yelusalemu, waja washengiγwewo wazakanana naye angwe:

³Uzaingila kwa wantu washishengiγwewo, kangi uzaja nawo.

⁴Petelo azaandiila kuwaonyesha, ija mbuli iγendilevyo, angwe:

⁵Imi ne nikivika mwe muzi wa Yope, nizashentukisha, hambu nizaona, nii mesho, bwesuna jikisheela jefanana, viya ni shuke nkulu muno ikantiγweyo miswa mine, jelawa mwe lwingu; jikisheleziγwa, jizabula haja, niliho.

⁶Nikishungila na muja ndai, nikiolela, nizaona nyama za kunu shi zena milundi mine na makaka na zetambala shi na madeγe yeanga ulanga.

⁷Vikibinda nizaiva kanwa, chikiniti: Inuka, Petelo, ukome, uje!

⁸Miya nizaγamba: Zumbe! Kale hoshe chena kisitama ao ṅwiko nkachaingile mwe kanwa changu.

⁹Kanwa chizalawa mwe lwingu, chizalandula ka mbili angwe: Mulungu aushizevyo ṅwiko, ushezavizila!

¹⁰Ivi vizaγosholwa katatu, vikibinda vyoshe vizakweziγwa na mwe lwingu.

¹¹Viya du lushe waγoshi watatu wazaγoloka he ija nyumba, nilimo, watumiγwe uko Kesaliya.

¹²Miya mpehongwa izaniγamba, nihite nawo, nishezakalakasha. Awa wanduγu mtandatu wazahita haṅwe na imi, tizangila mwe nyumba ya yuja mγoshingwa.

¹³Azatiukwila, aenevyo mlau, aiγoloke mwe nyumba yakwe, akimuti: Tuma na Yope, umtumize Simoni mweitangwa Petelo!

¹⁴Ne ndiye akuγambile mbuli, ndizo uhonyiγwe nazo ṅwenye na chengo chako kigima.

¹⁵Nikiandiila kulonga, mpeho mṅazi izagwa mwe waja, sa viyaho igwelevyo kwa ishwi haja kuandiila.

¹⁶Nizafukila mbuli ya Zumbe, akiγamba: Yohana azabatiza na mazi, miya inywi nezemubatizwe na mpeho ṅazi.

¹⁷Ati Mulungu azawafila iyo mbazi ṅwenga, atifileyo ishwi, wakimtozesha Yesu Kilisito, lushe imi nina nguvu ani za kumfingiza Mulungu?

¹⁸Wakiiva ivyoho wazaleka nkani, wazamtogola Mulungu angwe: Kumbe wamzimu wohena Mulungu awakundiza kuhitula ntongonyezi zawe, watende nkalamo!

¹⁹Waja waasakanewo kwa mbuli ya uja ukiwa wa kukoṅwa kwa Sitefano, wazaangisha, wazabula Fonike na Kipulo na Antiyokiya, miya nkawaγambile muntu mtuhu mbulingwa kushima Wayuda.

²⁰Miya weyae wawe kuṅwe, ni wa Kipulo na Wakilene, wazaiza Antiyokiya, wazailonga hata kwa Wagiliki, wazabilikila mbuli ya Zumbe Yesu.

²¹Mkono wa Zumbe uzaanga nawo; watozeshewo na kuhituka na kwa Zumbe wazaγelemuka talo kulu.

²²Inu mbuli yawe izaivika mwe mashikilo ya bumbangwa je nko Yelusalemu, wazamtuma Balinaba, ahite Antiyokiya.

²³Akibula, akiona ija mbazi ya Mulungu azatamimilwa, azawahimila woshe, waike inu mbuli mwe myoyo yawe, waandakane na Zumbe.

²⁴Hambu ni muntu mtana agisizeye mpeho ṅazi, mwetozesha vyedi. Bumba kulu muno jizaiγalwa kwa Zumbe.

²⁵Vikibinda azakulawa, azahita Taliso, amlonde Sauli.

²⁶Akimwona azamwiγala Antiyokiya. Vuli gima wazaangilana na jiya bumbangwa, wazafuza wantu wangi, kwa ivyoho uko Antiyokiya wantu wazaandiila kuitanga wahina: Wakilisito.

²⁷Mishi ija wateγanyi walawilewo Yelusalemu wazahita Antiyokiya.

²⁸Ṅwiyae ywawe muṅwe mweitangwa Agabo azainuka, azateγanya kwa mpehongwa kuti: Nezekuoneke sala nkulu mwe shi zoshe za ngulu ngima. Igwele mishi ya Kalaudiyo.

²⁹Waja wahina wazaivana kuγamba: Kila muntu sa avyoγenyeza, ashanguze kwa mbazi, viiγailwe waja wanduγu weikala Yudeya!

³⁰Wazaγoshola ivyoho, wazavituma kwa waγolokezi, vizaiγalwa ni Balinaba na Sauli.