Read Kishambala Ntuṅwa 13 Bible Online

Ntuṅwa 13 - Kishambala bible

Ntuṅwa 13

¹Kuja Antiyokiya mwe bumbangwa muna wateγanyi na wafuzi, ni Balinaba na Simeyoni mweitangwa Nigeli na Lukiyo ywa Kilene na Manaye akuziγweye haṅwe na Helode, na Sauli.

²Awa wakimvika Zumbe haṅwe na kufunga, Mpeho mṅazi azawati: Niahwilai Balinaba na Sauli kwa ija ndima, niwaitangileyo.

³Ne wahofunga haṅwe na kuvika, wazawabadikila mikono, wazawashungula.

⁴Awa wakituṅwa ni Mpeho mṅazi wazasheela Seloikiya, uko wazahita na chombo na Kipulo,

⁵wakibula Salami wazabilikila mbuli ya Mulungu mwe mavikilo ya Wayuda; yuja Yohana wana naye, awaγoshwela ndima.

⁶Wazadwisha chiya kisiwa choshe mpaka Pafo; kuja wazaona mγanga ywa Kiyuda, ni mubilikizi ywa ulongo, zina jakwe ndiye Ṅwayesu.

⁷Azaanga na mtoza shi Seligiyo Paulo, ni mγoshi mwena viyuγo. Uyu azamwitanga Balinaba na Sauli, azakundisha kuiva mbuli ya Mulungu.

⁸Mγanga Elima — ne zina jakwe jivyohitulwa — azawakeleza nkani, azaγeza kumfingiza mtoza shi, ashetozeshe.

⁹Miya Sauli, mweitangwa Paulo, azagisa mpeho ṅazi, azamdulila angwe:

¹⁰Iwe uigisize minyanyi yoshe na uhambanyi woshe, u ṅwana Satani, utanda woshe wakuihila, nkudila kuhotola sila za Mulungu zeγolokela.

¹¹Lushe shivyo: Mkono wa Zumbe wakuizila, neufe mesho, nkouone zuwa mishi inu! Viya du lushe mesho yakwe yazatenda zundezunde na lwiza, azaangaanga akilonda hiuntu mwemtoza mkono.

¹²Yuja mtoza shi akiona viya viγosholekevyo, azatozesha, hambu azashentuka mifuzize ya Zumbe.

¹³Paulo na weyae wazaingila mwe chombo kuja Pafo, wazahita Pelige mwe shi ya Pamufiliya; miya Yohana azawaasha, azaγotoka na Yelusalemu.

¹⁴Waja wazalawa Pelige, wazabula Antiyokiya mwe shi ya Pisidiya, wazaingila vikiloi mushi wa sabato, wazaikala.

¹⁵Mbuli za muiomongwa na za wateγanyi zikibinda kufyomiγwa, waja wakulu wa vikilo wazawatumila angwe: Wanduγu, ati muna mbuli ya kushangalaza wantu, longai!

¹⁶Paulo azainuka, azawakonyeza na mkono, azawati: Inywi waγoshi wa Kiisilayeli, mwemwogoha Mulungu, teγelezai!

¹⁷Mulungu ywa inu mbali ya Isilayeli azashaγula watate zeshu, kangi azainula mbali yetu, ikiikala uγeni mwe shi ya Egiputa, azailavya muja na mkono wakwe ukusukewo.

¹⁸Azawashuγa mavuli milongo mine mwe nyika.

¹⁹Azabinda mbali mfungate mwe shi ya Kanaani, azawainka shi yawe, waiγuwe.

²⁰Vikibinda azawainka walamuzi mavuli magana mane na milongo mishano mpaka kwe ija mishi ya mteγanyi Samweli.

²¹Haja wazalombeza zumbe, ne Mulungu ahowainka Sauli, ṅwana Kisi, muntu ywa mbali ya Benyamini, mavuli milongo mine.

²²Akimwusha uyu azawagimbikila zumbe Dawidi, uyu azamlongela uwona kuγamba: Nizamwona Dawidi, ṅwana Yese, ni mγoshi mwetamila moyo wangu, ne ndiye aγoshole vyoshe, nivyokunda.

²³Mwe mbeleko ya uyu Mulungu azawalaviliza Waisilayeli mhonya, ndiye Yesu, sa ainkilevyo kilaγa.

²⁴Ashizati alawile, Yohana azabilikila mbali ngima ya Isilayeli ubatizi wa kuhitula ntongonyezi zawe.

²⁵Yohana akibontola iyo ndimangwa, ahinileyo, azaγamba: Yuja, muyefanyanya, kuti ni miyo, si miyo; yuja anitongela nyuma, kangi nkaviniagiza kumzaγawila vilatu vya milundi yakwe.

²⁶Waγoshi, wanduγu, mu wanangwa wa chengo cha Abulahamu, kangi wemwogoha Mulungu muna nawo, lushe inywi mzatumilwa mbuli ya uja uvunizi.

²⁷Hambu waja weikala Yelusalemu na wazumbe wawe nkawamtaila yuja, kangi mbuli za wateγanyi zefyomiγwa kila sikunkulu wazazibontola na ija milahile yawe.

²⁸Hambu hata wakisheona mbuli ya kumkoma, wazamhembeleza Pilato vivyoho, akoṅwe.

²⁹Wakibinda mbuli ziya zoshe zigondiγwezo za uyu wazamsheleza mwe muti, wazamwika mwe mbila.

³⁰Miya Mulungu azamfufula kwa wafilewo.

³¹Lushe azakalawila waja wakwezilewo haṅwe naye Yelusalemu, wakilawa Galileya, awa ni waona wakwe mwe mbali yetu.

³²Hata ishwi tamibilikila chiya kilaγa, watate zeshu wainkiγwecho, kuti:

³³Mulungu azachibontwela wana wenyu aho akimfufula Yesu, sa vigondiγwevyo mwe zumo ja mbili kuγamba: Iwe u ṅwanangu, imi nizakuvyala lelo.

³⁴Iyo mbuli ya kumfufula kwa wafilewo, kangwe ashezahita kwa banika, aailonga kuγamba: Nezeniminke viya viṅazi vya Dawidi vye kweli.

³⁵Kangi hantu hatuhu haγangwa: Nkouleke, mṅazi ywako akibanika.

³⁶Miya Dawidi akibinda kutumikila weyae na kuγoshola viya, Mulungu akundilevyo, azasisila, azaikwa haja ha wababa zakwe, azabanika.

³⁷Miya yuja, Mulungu amfufuleye, nkabanike.

³⁸Lushe wanduγu, inu mbuli mwitailishe kuti: Ni kwa mbuli ya uyu, mkibilikilwa kuti: Mahuza yazaushiγwa; hata viya vyoshe vishidahilevyo kuushiγwa ni mulomo wa Mose,

³⁹kila mwetozesha aviushiliziγwa kwa mbuli ya uyu na kuinkwa utanda.

⁴⁰Lushe olelai, viya vilongiγwevyo ni mteγanyi vishezamiizila,

⁴¹vikiγangwa: Inywi wahezi, violelei, vimakei, mkaaγe! Hambu mwe inu mishi yenyu naγoshola ndima, inu ndima, ati muntu aimishimwela du, anga nkamtozesha.

⁴²Wakilawa mwe vikilo ja Wayuda, wamzimu wazawahembeleza, wawaγambile wohe izi mbuli sikunkulu, ndiyo iize.

⁴³Bumba jiizilejo vikiloi jikichakuka, Wayuda na wahina wemwogoha Mulungu wangi wazamtongela Paulo na Balinaba; awa wazawalonga na kuwahimila, watozeshe mbazi ya Mulungu.

⁴⁴Ija sikunkulu ntuhu muzi woshe uzaunganana, kwa teγeleza mbulingwa.

⁴⁵Wayuda wakiona haja mabumba makulu wazaingilwa ni wizu ungi, wazakeleza nkani viya vyelongwa ni Paulo haṅwe na kukanka.

⁴⁶Miya Paulo na Balinaba wazabilikila na nyemi, wakiγamba: Bosi vizaagiza inywi, mkibilikilwa mbuli ya Mulungu; miya kwa viya muvyoibenta na kukifanyanyiza wenye, kuti nkamwagiziγwa ni nkalamo ya kale na kale, kwa ivyoho tahituka na kwa wamzimu.

⁴⁷Hambu ivyoho Zumbe azatilaγiliza angwe: Nizakuika, nγaluke langaila ja wamzimu, uγaluke mhonya mpaka kwe mihelo ya shi.

⁴⁸Wamzimu wakiviiva, wazatamilwa, wazatogola mbuli ya Zumbe; kuzatozesha woshe waikilwewo nkalamo ya kale na kale.

⁴⁹Mbuli ya Zumbe izagisa ija shi ngima.

⁵⁰Miya Wayuda wazatunya wavyele waγoh watozeshewo mivikile yawe na wakulu wa uja muzi, wazamwinwila Paulo na Balinaba nkondo, wazawaγulusha mwe shi yawe.

⁵¹Waja wazawahuγutila vumbi ja milundi yawe, wazahita Ikoniyo. Kangi waja wahina wazagisa nyemi na mpeho

⁵²ṅazi.