Read Kishambala Ntuṅwa 16 Bible Online

Ntuṅwa 16 - Kishambala bible

Ntuṅwa 16

¹Azahita kwa bula Delibe na Lisitila; kuja kuna mhina mweitangwa Timoteyo, nine ni mvyele ywa Kiyuda mwetozesha, ishe ni Mgiliki,

²ana kilango kitana kwa wanduγu we kuja Lisitila na Ikoniyo.

³Uyu Paulo azamkunda, aange naye; azamγuwa, azamshenga kwa mbuli ya Wayuda weikala mwe ija shi, hambu woshe waitaile, kuti ishe ni Mgiliki.

⁴Wakianga mwe ija mizi, wazawalaγiliza, watozeshe ija miko iikiγweyo ni ntuṅwa na waγolokezi we uko Yelusalemu.

⁵Yaja mabumbangwa yazatenda nguvu ya kutozesha, kangi yazakula kila mushi.

⁶Miya wakidwisha Fuligiya na Galatiya wazafingiziγwa ni Mpeho mṅazi, washelonge mbulingwa mwe shi ya Asiya.

⁷Wakihita Misiya wazaγeza kuhita Bitiniya, miya mpehongwa ya Yesu nkaiwakundize.

⁸Wazazinka Misiya, wazasheela na Tilowa;

⁹na kilo Paulo azaloshiγwa ni sozi: Mγoshi ywa Kimakedoniya azaγoloka, azamwitanga angwe: Omboka na Makedoniya, utiambize!

¹⁰Akibinda kuona inu sozi, ne tihouzanya, kangwe tikulawe kuja, tihite Makedoniya, hambu tizatailisha, kuti Mulungu ṅwenye azatiitanga, kangwe tibilikile waja wantu.

¹¹Ne tiholawa Tilowa na chombo, tizachigwiza na Samotilake, keloi jakwe tizachibuza Neapoli;

¹²tikilawa haja tizachigwiza na Filipi, ni muzi mkulu wa luja lwazu lwa Makedoniya, utuzilwe ni Waloma. Mwe unu muzi tizanaikala mishi kuṅwe.

¹³Mushi wa sabato tizalawa nkilii, tizahita mtoi, ne tifanyanyeho, kuti wantu wavika haho; tizaikala, tizalonga na wavyele waungananewo.

¹⁴Kuna mvyele, zina jakwe ndiye Lidiya, ni mchuluzi ywa shuke ntana, aanduka mwe muzi wa Tiyatila, amwogoha Mulungu; azateγeleza, hambu Mulungu aimzuγwile moyo, atozeshe viya vyelongwa ni Paulo.

¹⁵Akibatizwa na chengo chakwe azatihimila angwe: Ati mwanifanyanya, kuti ni mvyele mwemtozesha Zumbe, ingilai mwe nyumba yangu, mwikale mumo! Azatikungumiza.

¹⁶Tikihita kwa vika, tizakintana na mndele mwena mpepo ya uteγanyi; na uteγanyi wakwe azaonela wababa zakwe kuwo jingi.

¹⁷Uyu azamtongela Paulo, azatikemela angwe: Awa wantu ni wapuna wa Mulungu mwe uko ulanga, watibilikila sila ya uhonya.

¹⁸Azaγoshola mishi mingi ivyoho; miya Paulo azabulwa ni mbazi, azahituka, azalonga ija mpepo angwe: Nakulaγiliza mwe zina ja Yesu Kilisito: Lawa mwe uyu mvyele! Ne iholawa viya du lushe.

¹⁹Wababa zakwe wakiona, kuti kialilo chawe cha kuwo chizaaγa, wazamgwila Paulo na Sila, wazawahuna na lwazoi kwa wafuṅwa.

²⁰Vikibinda wazawaiγala kwa wazumbe wenye angwe: Awa wantu waazaγanya muzi wetu, ni Wayuda,

²¹miya wabilikila misimo ishiyotiagiza ishwi kuihokela na kuiγoshola, hambu ti Waloma. Paulo na Sila watowiγwa, wagelwa mwe chumba.

²²Bumba kulu jizawainukila, ne waja wazumbe wahowahoka shuke zawe za kukiγubika, wazalaγiliza, watowiγwe.

²³Wazawatowa vibonko vingi, vikibinda wazawagela mwe chumba, wazamlaγiliza yuja mγolokezi ywa chumba awaγojeshe.

²⁴Akiinkwa unu mulomo azawagela mwe chumba che ndai, kangi milundi yawe azaigela magogolo, washenyilike.

²⁵Kilo kikulu Paulo na Sila wazamvika Mulungu na kumwimbila, washungiγwewo wazateγeleza.

²⁶Haho mdidimo mkulu uzaoneka, hata mashikamilo ya nyumba yazakuchanika; viya du lushe nyuvi zoshe zizazuγuka, hata mazolo yoshe yazadwika.

²⁷Mγolokezi ywa chumba akiviluka, akiona, kuti nyuvi za chumba ziizuγuke, azasholola shime, azakunda kukikoma, hambu azafanyanya kuti: Washungiγwewo wazanyilika.

²⁸Paulo azamkemela na kanwa kikulu angwe: Ushekiγoshwele mbuli mbada! Hambu loshe li mumu.

²⁹Azailanga laa, azafikalumbila na kuja, azaukwa ni vizingizo, azamkinila Paulo na Sila,

³⁰azawalavya na se, azawati: Wazumbe, nilende zeze, kangwe nezenivunilwe?

³¹Angwe: ndiwo: Mtozeshe Zumbe Yesu! Ne ndivyo uvunilwe lwe na chengo chako.

³²Wazamtamwila haṅwe na woshe we mwe nyumba yakwe mbuli ya Mulungu.

³³Azawaγuwa ija saa ya chiya kilo, azawahaka vilonda vya vibonko, azabatizwa haho ṅwenye na wantu wakwe woshe.

³⁴Azawaingiza mwe nyumba yakwe, azawatandikila meza. Azatowa mazumo haṅwe na chengo chakwe, kuti aibindile kumtozesha Mulungu.

³⁵Kukicha wazumbe wazatuma waja wawatowilewo angwe: Shungula waja wantu!

³⁶Mγolokezi ywa chumba azamγambila Paulo izi mbuli kuti: Wazumbe wazatuma, kangwe mshungulwe. Lushe mulawei, mhite mpeho!

³⁷Miya Paulo azawati: Wazatitowa he wantu woshe, waishilahile masa yetu, kangi ti wantu wa Kiloma, vikibinda wazatigela mwe chumba; lushe wakunda kutilavya kinjamanjama? Sivyo shuti waize wenye, watilavye!

³⁸Waja wawatowilewo wazaukwila wazumbe izi mbuli. Wazaingilwa ni woγa wakiiva, kuti ni wantu wa Kiloma, wazahila, wazawavotekela,

³⁹wazawalavya na kuwahembeleza, walawe mwe uja muzi.

⁴⁰Wakilawa mwe chumba wazahita kwa Lidiya. Wakibinda kuonana na wanduγu na kuwashangalaza, wazahita.