Read Kishambala Ntuṅwa 18 Bible Online

Ntuṅwa 18 - Kishambala bible

Ntuṅwa 18

¹Vikibinda azakuuka kuja Atene, azahita Kolinto.

²Kuja azaona Muyuda, zina jakwe ndiye Akila, aanduka Ponto, mishi ija azalawila Italiya, muke ndiye Pulisikila; hambu Kaiza Kalaudiyo azalavya mulomo wa kuγamba: Wayuda woshe walawe Loma! Awa azawatimila.

³Kwa kuti ufundi wawe ni uja wakwe, azaikala kwawe, azaγoshola ndima nawo, ndima yawe ni kuγoshola mahema.

⁴Azahilikila vikiloi kila mushi wa sabato, azavota Wayuda na Wagiliki.

⁵Sila na Timoteyo walawilewo Makedoniya wakibula, Paulo azatoziγwa ni iyo mbuli ya kulonga uwona kwa Wayuda kuti: Yesu ni yuja Kilisito.

⁶Wakimkeleza nkani na kumkanka, azawahumpuntila shuke zakwe angwe: Mpome yenyu ikataifya mitwiyenyu! Imi sina masa, ivi lushe aha nahita kwa wamzimu.

⁷Azahauka, azahita mwe nyumba ya muntu mweitangwa Titiyo Yusito, amwogoha Mulungu, kangi nyumba yakwe ihampikane na vikilo.

⁸Miya Kisipo, mkulu ywa vikilo, azamtozesha Zumbe haṅwe na chengo chakwe kigima, hata Wakolinto wangi wakiiva wazatozesha, wazabatizwa.

⁹Zumbe azamlawila Paulo mwe sozi na kilo, azamuti: Usheogohe! Miya bilikila, usheleke lwashu!

¹⁰Hambu imi ni haṅwe na iwe, nkakuna ndiye akutimile akikuγoshwela vihada, kwa kuti mbali yangu mwe unu muzi ni nkulu.

¹¹Azaikala vuli gima na myezi mtandatu akiwafuza mbuli ya Mulungu.

¹²Galiyoni akitoza shi ya Akeya, Wayuda wazaivana kumgela Paulo masa, wazamwiγala kitala, wazamshinga kuti:

¹³Uyu ahimila wantu, watongele mivikile ishiyoivana na mulomongwa.

¹⁴Paulo akiunga kuzuγula kanwa chakwe, Galiyoni azawati Wayuda: Ati kuna masa ao du mbuli ani mbada, anga vizaniagiza kumiteγeleza inywi Wayuda.

¹⁵Miya kwa kuti kuna mikanano ya mivikile na ya mazina na ya mulomongwa mwinkiγwewo, lushe manyai wenye inu mbuli!

¹⁶Mbuli ze ivyoho sikunda kuzilaha. Azawaγulusha kuja kitala.

¹⁷Woshe wazamgwila Sositene, mkulu ywa vikilo, wazamtowa kuja kitala, miya Galiyoni nkateγeleze inu mbuli.

¹⁸Paulo akiikalaikala, azalagana na waja wanduγu, azaingila mwe chombo, azahita Siliya, ana Pulisikila na Akila; kuja Kenkileya azaleγula vunga jakwe, hambu aijile malape.

¹⁹Wakibula Efeso, azawaasha kuja, azaingila ṅwenye du vikiloi, atamwilane na Wayuda.

²⁰Wakimhembeleza, aikale kwawe mishi kuṅwe, nkaitikile,

²¹miya azawalaga, azawati: Mushi wa nyemi, ndiwo ubule, shuti niubindile Yelusalemu, miya nezeniuye vituhu na kwenyu, Mulungu akinikundiza. Azaingila mwe chombo kuja Efeso,

²²azahita kwa bula Kesaliya. Azaluγushana na bumbangwa, akibinda azasheela na Antiyokiya.

²³Akinyamalanyamala azakulawa, azaangila mwe shi ya Galatiya na ya Fuligiya, azagela wahina woshe nguvu.

²⁴Muyuda mweitangwa Apolo, mweanduka Alekisandiliya, ni muntu mwedahisha kulonga na mwetailisha mbuli za ugondengwa, azahita Efeso.

²⁵Uyu azabinda kufuziγwa sila ya Zumbe, azahimilwa ni moyo wakwe kulonga na kubilikila na utanda mbuli za Yesu, miya ne akitaila ubatizi wa Yohana du.

²⁶Uyu azaandiila kubilikila vikiloi; miya Pulisikila na Akila wakimwiva, wazamγuwa, wazamfumbwila vyedi sila ya Mulungu, aitailishe.

²⁷Akikunda kuhita Akeya, wanduγu wazazumila, wazagondela wahina wa kuja baluwa, wamhokele. Akikubula azawaambiza vikulu waja watozeshewo kwa mbazi.

²⁸Hambu azakihima kutamwilana na Wayuda hena wantu wangi na kuwavota akionyesha na viya vigondiγwevyo kuti: Yesu ni yuja Kilisito.