Read Kishambala Ntuṅwa 2 Bible Online

Ntuṅwa 2 - Kishambala bible

Ntuṅwa 2

¹Mushi wa milongo mishano ukitimiza, woshe wa kiṅwe hantu haṅwe.

²Ne kuholawa vuzo kwe lwingu, viya ni ja mpeho yekunta na nguvu, jizamema muja nyumbai moshe, waikalemo.

³Kuzalawila nyimi zepangana, viyani zamoto, zizawaikaila kila muntu.

⁴Woshe wazagisa mpeho ṅazi, wazaandiila kulonga na vilosi viγeni, kila sa Mpehongwa ivyomshungula kubilikila.

⁵Miya kuja Yelusalemu kuikala Wayuda wemwogoha Mulungu waandukewo mwe mbali zoshe kimu shi.

⁶Lushe jiya vuzo jikiiviγwa, wantu wangi wazaunganana, wazaatukwa ni matumbo, hambu kila muntu azawaiva waja, wakilonga kilosi chakwe ṅwenye.

⁷Wazashentuka, wazamaka angwe: Kaulai! Awa woshe welonga siwo Wagalileya?

⁸Lushe ishwi tiiva zeze kila muntu kilongele chakwe ṅwenye, avyelwecho nacho?

⁹lshwi Wapalito na Wamediya na Waelami na ishwi teikala Mesopotamiya na Yudeya na Kapadokiya na Ponto na Asiya

¹⁰na Fuligiya na Pamufiliya na Egiputa na lwazu lwa Libiya lweolela na Kilene na ishwi Waloma teikala uγeni kunu, ishwi Wayuda na wahina,

¹¹Wakaleta na Waalabu, toshe tiyawaiva, wakibilikila na vilosi vyetu viya vikulu, Mulungu aγosholevyo!

¹²Woshe wazashentuka, wazaaγilwa, wazaγambilana kila muntu na ṅwiyae: Inu mbuli neihite kwa bontokela hi?

¹³Miya kuṅwe wazabela angwe: Watetengeziγwa ni mpombe!

¹⁴Petelo azainuka haṅwe na waja weyae kumi na muṅwe, azainula kanwa chakwe, azawabilikila angwe: Inywi waγoshi wa Kiyuda na inywi nyoshe mweikala Yelusalemu, inu mbuli shuti mwitaile, mteγeleze mbuli zangu!

¹⁵Hambu awa nkawatengele, sa muvyofanyanya, hambu ivi lushe ni saa ntatu za makelo,

¹⁶miya aha habontoka viya vyalongwavyo ni mteγanyi Yoweli akiγamba:

¹⁷Kangwe ni Mulungu: Mishi ija ya shilikiza nezeniitiile wantu woshe mpeho yangu, wana wenyu wa kiγoshi na wa kivyele nezewabilikile mbuli za uteγanyi, wabwanga wa kwenyu nezewaone sozi, hata waγundu wa kwenyu nezewaloshiγwe vivyoho.

¹⁸Wabwanga wangu na wandele wangu ne ndiwo niitiile mpeho yangu mishi ija, ne ndiwo wabilikile mbuli za uteγanyi.

¹⁹Nezenigwishe vilozo mwe lwingu ulanga na vimaka uko shi, vye mpome, vye moto, vye moshi moshi.

²⁰Zuwa jiγalamuke lwiza, ṅwezi uγalamuke mpome, kushizati kulawile uja mushi mkulu wa Zumbe weafiziγwa.

²¹Kangi aho kila, ndiye nezeakemele zina ja Zumbe, atahona. Inywi waγoshi wa Kiisilayeli,

²²ivai izi mbuli: Yesu ywa Nazaleti azatailikana kwenyu, kuti aanduka kwa Mulungu, kwa viya vye nguvu na viya vilozo na viya vimaka, aγosholevyo, kangi ni Mulungu ṅwenye aviγosholeye naye he mesho yenyu, sa muvyotaila wenye.

²³Uyu Mulungu azamfanyanyiza aho kale ndimayakwe na kumshengela mhaka kwaviya, avyotaila mbuli zoshe; kwa ivyoho muzamγuwa mkimwinkwa ni mikono ya wahambanyi, muzamkontela mwe muti, muzamkoma.

²⁴Miya Mulungu azamfufula, akiusha milumilwe ya kifa, hambu nkavidahikane, yuja akitoziγwa ndicho.

²⁵Hambu Dawidi azamfanyanya uyu akiγamba: Hoshe hoshe naiṅwolela Zumbe; akiγoloka kulume kwangu, senivuwe!

²⁶Kwa inu mbuli moyo wangu waona nyemi, lulimi lwangu lwatowa zumo, hata ṅwili wangu waikala mpolele kwa mbuli ya kialilo changu.

²⁷Hambu nkuasha mpeho zangu kuzimu, nkuleka, yuja uyemkundisha akibanika.

²⁸Wanionyesha sila ya nkalamo, waniiγusha na nyemi ye he cheni chako.

²⁹Inywi waγoshi, wanduγu wangu, lekai, nimiγambile na kulaviliza mbuli ya baba yetu Dawidi kuti: Yuja azafa, azazikwa, mbila yakwe i kunu kwetu mpaka unu mushi wa lelo.

³⁰Miya kwa kuti ni mteγanyi, azataila, kuti Mulungu azamunka kilaγa na kukilisha akiγamba: Waja wavyelwewo ndiye nezekuoneke ndiye aikale mwe kiti chakwe.

³¹Akiviona aho kale azalonga ziya mbuli na kuteγanya ufufuki wa Kilisito kuti: Nkaashiγwa kuzimu, kuti: Ṅwili wakwe nkaubanika.

³²Uyu Yesu Mulungu azamfufula, kangi ishwi toshe ti waona wa inu mbuli.

³³Lushe akibinda kuinulwa na kulume kwa Mulungu, azashungulwa ni ishe, abontole uja msuhi wa mpeho mṅazi, ne ahoitila viya inywi muvyoona na muvyoiva.

³⁴Hambu Dawidi nkakwezile na mwe lwingu, miya ṅwenye azalonga kuγamba: Zumbe azamlonga Zumbe ywangu:

³⁵Ikala kulume kwangu, mpaka ndiho nezeniike wankulu wako shi he milundi yako!

³⁶Lushe chengo kigima cha Isilayeli chitailishe kuti: Yuja Yesu, mumkonteleye mwe muti, ne Mulungu amγalusheye Zumbe na Kilisito.

³⁷Wakiviiva, vizaingila mwe myoyo yawe, wazamγamba Petelo na ziya ntuṅwa ntuhu: Waγoshi, wanduγu wetu, tiγoshole vivihi?

³⁸Petelo azawati: Hitulai ntongonyezi zenyu! Kila ṅwenyu abatizwe mwe zina ja Yesu Kilisito, masa yenyu yaushiγwe, mdaheinkwa Mpeho mṅazi kwa mbazi du!

³⁹Hambu uja msuhi wamitala inywi na wana wenyu na woshe we hale, ndiwo Zumbe, Mulungu ywetu, nezeaitange na kwakwe.

⁴⁰Azawabilikila mbuli nyingi ntuhu, azawahimila kuγamba: Kundai kuvunilwa mwe inu mbali yeγangwa: Siyo!

⁴¹Waja wahokelewo mbuli yakwe wazabatizwa; wagezilwewo mwe bumbangwa uja mushi wazaγelemuka makulija matatu.

⁴²Wazakihima kufuziγwa ni ntuṅwa, wazaangilana na kubendwilana migate na kuvika.

⁴³Woshe wazaingilwa ni woγa mwe myoyo yawe, hambu vimaka na vilozo vingi vizaγosholwa ni ntuṅwa.

⁴⁴Miya woshe waandiilewo kutozesha wazaangilana haṅwe, kangi vyawe vyoshe wazaviγamba kuti: Ni vya bumbangwa.

⁴⁵Kitende chawe na viya, wavyona navyo, wazavitaγa, wazavipangila woshe, kila muntu sa avyokakosa.

⁴⁶Kwa kuti ne wai moyo muṅwe, nkawadizile kuunganana kila mushi mwe vikilongwa, hata kwe nyumba zawe wazabendwilana migate,

⁴⁷wazaja nkande zawe na nyemi na myoyo yeṅala; ivyoho wazamtogola Mulungu, kangi wazakundwa ni wantu woshe. Zumbe azakuza jiya bumba akiingiza kila mushi wekunda kuvunilwa.