Read Kishambala Ntuṅwa 20 Bible Online

Ntuṅwa 20 - Kishambala bible

Ntuṅwa 20

¹Jiya vuzo jikihombwela, Paulo azatumizawahina, azawaṅaza mesho, azalagana nawo, azakulawa, ahite Makedoniya.

²Akianga mwe ziya shi azawashangalaza na mbuli nyingi, azahita Giliki, azanyamala kuja myezi mitatu.

³Akiunga kuingila mwe chombo, ahite Siliya, azahetelwa leba ni Wayuda, ne ahoγamba: Kesa nigwile Makedoniya niγotoke.

⁴Waγesanyewo naye mpaka Asiya ni Sopatilo, ṅwana Pilo ywa Beloya, na Alisitaliko na Sekundo wa Tesalonike na Gayo ywa Delibe na Timoteyo, Waasiya ni Tikiko na Tilofimo.

⁵Awa wazalongola, wazatiγoja Tilowa.

⁶Mishi ya migate ishigelwayo shimbi ikizinka, tizaingila mwe chombo kuja Tilowa, ni ntambo ya mishi mishano, tizahumula kuja mishi mfungate.

⁷Mhitu wa sabato tikiunganana kwa bendwilana migate, Paulo azabilikila, kwa kuti keloi jakwe azakunda kuhita, miya azalonga mpaka kilo kikulu.

⁸Miya muja talai, tiungananemo, muna laa nyingi.

⁹Kuna mubwanga, zina jakwe ndiye Oitiko, aiikale mwe dilisha, azavotwa ni usisiza ungi, kwa kuti Paulo azabilikila vivyoho vivyoho; lushe akibinda kuvotwa ni usisiza azakina na shi mwe jiya tala ja ntatu, azainulwa kimba.

¹⁰Paulo azasheela, azamkinila, azamwambata angwe: Mshevunke! Hambu moyowakwe uke mumu.

¹¹Vikibinda azakwela, azabendula mgate, azaja, azawatamwila vivyoho mbulingwa, mpaka kukicha, ne aholawa kuja.

¹²Miya yuja mubwanga wazamleta, a moyo, wazahembuliziγwa vikulu kwa inu mbuli.

¹³Miya ishwi tiilongole na chombo, tizabula Aso, ne tikundileko kumhokela Paulo; hambu azavilaγiliza ivyoho, kwa kuti ṅwenye azakunda kukuhita na milundi yakwe.

¹⁴Akibula kuja Aso, tizamγuwa, tizahita Mitilene.

¹⁵Tikilawa kuja na chombo chetu, keloi jakwe tizabula Kiyo, keloi ni Samo, keloi ni Mileto.

¹⁶Hambu Paulo azakunda kuzinka Efeso na chombo, ashekuingile, kangwe ashediziγwe kuja Asiya mishi mingi. Hambu azaγuluka, kangwe, ati vyadahikana, nyemi ya mushi wa milongo mishano akaijiile Yelusalemu.

¹⁷Miya kuja Mileto azatumiza waγolokezi wa bumbangwa ja Efeso.

¹⁸Wakiiza kwakwe, azawati: Inywi mwataila kuti: Kuandiila uja mushi wa bosi, ṅiizileho Asiya, nizaangilana na inywi mishi ija yoshe.

¹⁹Nizamtumikila Zumbe mwe ntoγo zoshe, ati ni kupunguziγwa, ati ni kuliziγwa, ati ni kuja kuγezwa koshe ni Wayuda, wakinilondeleza.

²⁰Kangi sina mbuli, nilekileyo kumibilikila yedaha kuzifya, vivyoho silekile kumifuza, wantu wakiunganana, hata nyumbai kwenyu.

²¹Wayuda na Wagiliki nizawaγambila uwona, wahituke na kwa Mulungu, wamtozeshe Zumbe ywetu Yesu.

²²Miya ivi lushe aha kwa viya, nishungiγwevyo ni mpehongwa, nahita Yelusalemu, kangi sitaila, ndivyo nione kuja.

²³Nataila du, kuti Mpeho mṅazi aniγambila uwona mwe mizi yoshe, kuti mazolo na nkondo yaniγoja γuko.

²⁴Miya naγamba: Nkavina mbuli, ṅwenye nikibanika, ntoγo nibontoleze ntambo yangu na ija ndimangwa, niinkiγweyo ni Zumbe Yesu, nilongele ulau wedi wa mbazi ya Mulungu uwona.

²⁵Kangi lushe natailisha, kuti nkezetionane vyeni kwa vyeni na inywi nyosheni, ndiwo nikiikala kwenyu na kumibilikila uzumbe wa Mulungu.

²⁶Ne vyeleka, nikilonga unu mushi wa lelo na kulaviliza kuti: Inywi nyoshe nkakuna mwedaha kunilaha masa.

²⁷Hambu silekile kumibilikila kikundile choshe cha Mulungu.

²⁸Kiγolokelei wenye na ifyo gima, Mpeho mṅazi amigimbikilejo waolezi, mulishe bumbangwa ja Mulungu, amotilejo na mpome yakwe ṅwenye!

²⁹Nataila kuti: Nikibinda kuhita, nekuingile mashuwi makali kwenyu yashinayo mbazi na iji ifyo.

³⁰Hata kwenyu kuṅwe newainuke, wabilikile mbuli zishiteγanazo, wahune wahinangwa na kwawe, wawatongele.

³¹Kwa ivyoho γojeshai mkifukila kuti: Mavuli matatu kilo na mushi sidizile kumihembelezeza kila muntu na kulila.

³²Ivi lushe namiinkila na kwa Zumbe kwa mbuli ya mbazi yakwe yedaha kumizifya na kuminka chiya kifu haṅwe na waja woshe waṅaziγwewo.

³³Sikundile feza ao zahabu ao shuke ya muntu.

³⁴Wenye mwataila, kuti inu mikono yangu izapikila viya, niagiziγwevyo ndivyo haṅwe na weyangu, niangilewo nawo.

³⁵Vyoshe nizavimionyesha, kuti vyatiagiza kukihima ndima ivyoho, kangwe tidahe kupangila wanyonge, kuti vyatiagiza kufukila ija mbuli, Zumbe Yesu alongileyo ṅwenye, ya kuγamba: kuinkila ni nyemi kuzinka kuinkwa.

³⁶Akibinda kulonga ivyoho azaginta mazwi haṅwe na waja woshe, azavika.

³⁷Woshe wazalilisha, wazamkinila Paulo kwe shingo, wazafyosana naye milomo.

³⁸Hambu wazaisa kuona ukiwa kwa ija mbuli, alongileyo, kuti nkezewaonane kwa vyeni. Wazamwelekeza na kwe chombo.