Read Kishambala Ntuṅwa 21 Bible Online

Ntuṅwa 21 - Kishambala bible

Ntuṅwa 21

¹Tikikunda kulagana nawo, chombo chizahita, tizachigwiza sawasawa na Ko, tikibula keloi jakwe tizahita Lodo, tikikulawa tizahita Patala.

²Kuja tizaona chombo chehita Fonike, ne tihoingila mumo, tikihita.

³Tikiona kuja Kipulo tizakuasha kumosho, tizagwiza chombo chetu na Siliya, tizafikila Tilo, hambu ne miziγo ya chiya chombo ilaγiliziγweko nako.

⁴Tikiona wahina kuja, tizakuikala mishi mfungate. Waja wazamlonga Paulo kwa nguvu ya mpehongwa, ashehite Yelusalemu.

⁵Tikibinda ija mishi tizakulawa, tizahita, woshe wazatielekeza haṅwe na wavyele na wana wawe mpaka kuja tanga kwe muzi; tikibula mpwai, wazaginta mazwi, wazavika.

⁶Tikilagana nawo, tikibinda tizaingila mwe chombo, miya waja wazaγotoka na kwawe.

⁷Tikilawa kuja Tilo, ne tibindileho lushe kutamba mwe bahali, tizabula Putolemaye, tizaluγushana na wanduγu kuja, tizadila mushi muṅwe.

⁸Mhitu wakwe tizakulawa, tizabula Kesaliya, tizabula mwe nyumba ya mubilikizi Filipo, waja mfungate uyu ni ṅwiyae ywawe muṅwe, tizaikala kwakwe.

⁹Uyu ana wana wa kindele wane, ni wateγanyi.

¹⁰Tikiikalaikala γuko, kuzaiza mteγanyi, alawa Yudeya, zina jakwe ndiye Agabo.

¹¹Azaiza na kuja kwetu, azaγuwa kowa ja Paulo, azakishunga milundi na mikono angwe: Kangwe ni Mpeho mṅazi: Yuja ṅwenye iji kowa Wayuda newamshunge uko Yelusalemu sa iviho, wamwinkile mwe mikono ya wamzimu.

¹²Tikiiva izi mbuli, ishwi haṅwe na waja wakaya tizamhembeleza, ashehite Yelusalemu.

¹³Ne Paulo aholandula: Muγosholai mkilila, mkinilumiza moyo? Hambu imi niikiteγile, so kushungwa du, hata kufa kuja Yelusalemu kwa mbuli ya zina ja Yesu.

¹⁴Akisheitikila, tizaleka lwashu tikiγamba: Zumbe avyokunda, nevibontoke!

¹⁵Mishi ija ikizinka, tizashunga ntambo, tizakwela Yelusalemu.

¹⁶Hata wahina kuṅwe wa Kesaliya wazahita haṅwe na ishwi, wazatiiγala kwa ndiye timfikiile, ni mγoshi ywa Kipulo mweitangwa Munasoni, ni mhina ywa kale.

¹⁷Ishwi tikibula Yelusalemu, wanduγu wazatihokela na nyemi.

¹⁸Mhitu wakwe Paulo azaingila na ishwi kwa Yakobo, hata waγolokezi woshe wazaiza na haho.

¹⁹Akibinda kuluγushana nawo azawashimwela mbuli zoshe, Mulungu aγosholezo kwa wamzimu na ija ndima, atumikileyo.

²⁰Wakiviiva wazamtogola Mulungu, miya wazamuti: Mnduγu, waona, kuti makulija mangi na mangi yazaandiila kutozesha kunu kwa Wayuda, miya woshe wakihima kuitika mulomongwa.

²¹Kwa mbuli ya iwe wazaγambilwa kuti: Wafuza Wayuda woshe weikala kwa wamzimu kumtowa Mose hulu, ukiwaγamba, washeshenge wana wawe, washetongele misimo du.

²²Lushe inu mbuli i zeze? Taγamba: Shuti bumba gima jiunganane, hambu newaive, kuti uzaiza.

²³Γoshola lushe, ndivyo tikuγambile! Ishwi tina waγoshi wane wajilewo malape;

²⁴awa uwaγuwe, ulapulwe haṅwe nawo, kangi uwalihile, wadaheleγulwa mavunga yawe! Ne ndivyo woshe wataile, kuti viya waγambilwevyo kwa mbuli ya iwe ni bule du, kangi hata ṅwenye waanga na kuitika mulomongwa.

²⁵Kwa mbuli ya wamzimu waingilewo mwe kutozesha ishwi tizagonda baluwa tikiwalaγiliza, wazile fika na mpome na kibudu na kilanga.

²⁶Ne Paulo ahoγuwa waja waγoshi, azalapulwa haṅwe nawo keloi jakwe, akibinda azaingila mwe vikilongwa, azaukula, mishi ya kulapulwa kwakwe ndiho nezeibontokele, ni aho kila ṅwiyae ywawe muṅwe akibinda kulaviliziγwa jiya tulo jeagiza kuja kulapulwa.

²⁷Ija mishi mfungate ikiunga kumambuka, Wayuda walawilewo Asiya wakimwona muja mwe vikilongwa wazatunya bumba joshe jiungananejo, wazamgwila na mikono yawe wakikema: Waγoshi wa Kiisilayeli, tiambizei!

²⁸Uyu ni yuja muntu mwefuza wantu woshe wa ngulu ngima kubela mbali yetu na mulomongwa na aha hantu, kangi Wagiliki wohena azawaingiza na mumo mwe vikilongwa, azagela hantu aha haṅazi kisitama.

²⁹Kwa kuti ne wakimwona mwe muzi, akianga na Tilofimo ywa Efeso, uyu wazaγamba: Paulo azamwingiza mwe vikilongwa.

³⁰Muzi woshe uzainuka, wantu wangi wazahaγulukila, wazamgwila Paulo, wazamlavya mwe vikilongwa na kumhuna; vikibinda nyuvi zizazuγalwa viya du lushe.

³¹Wakiunga kumkoma, mbuli izahita kwa mfuṅwa mkulu ywa washilikali kuγamba: Muzi woshe wa Yelusalemu uzagwa nkondo.

³²Uyu azafikaγuwa washilikali na wakulu wawe, azawaγulukila. Waja wakimwona yuja zumbe na washilikali wazaleka kumtowa Paulo.

³³Yuja mfuṅwa mkulu ywa washilikali akiwabwila, azamγuwa, azalaγiliza, ashungwe na mazolo maili, azauza,

³⁴ati ndiye ndai, kangi ati abanile mbwai. Waja wangi waungananewo woshe wazalonga vituhutuhu; lushe akishedaha kutaila, mbuli ṅwenye iγendilevyo, kwa kuti vuzo jaisiiza, azalaγihza, aiγalwe bomani.

³⁵Miya wakibula ha kukwela, azainulwa ni washilikali kwa mbuli ya wantu, wakiisiiza kumshindika.

³⁶Hambu bumba kulu jizatongela na kukema: Mkatamkoma!

³⁷Akiunga kuingiziγwa bomani, Paulo azamuti yuja mfuṅwa mkulu ywa washilikali: Wanikundiza kulonga na iwe?

³⁸Angwe: Wataila Kigiliki? Iwe nku yuja Muegiputa agwishizeye kiva mishi inu akiwatunya wampoko makulija mane akiwaiγala mwe nyika?

³⁹Paulo azamlandula angwe: Imi ni muntu ywa Kiyuda, nianduka Taliso mwe shi ya Kilikiya, ni ṅwenyezi mwe uja muzi wena kilango. Nakuhembeleza, unikundize kulonga na awawantu.

⁴⁰Akimkundiza, Paulo azaγoloka haja ha kukwela na ulanga, azawakonyezawajawantu na mkono, lushe vuzo joshe jikilekwa, azalonga nawo Kiebuleyo, azawati.