Read Kishambala Ntuṅwa 25 Bible Online

Ntuṅwa 25 - Kishambala bible

Ntuṅwa 25

¹Fesito akibinda kuγuwa uzumbe, mishi mitatu ikizinka, azalawa Kesaliya, azakwela Yelusalemu.

²Wavikizi wakulu na wakulu wa Wayuda wazamlawila na kumfyalima Paulo;

³wazamhimila na kumhembeleza, awafe mbazi, akamtumize na Yelusalemu, hambu waimhetele leba, wamkome silai.

⁴Fesito azawalandula angwe: Paulo a mwe chumba uko Kesaliya, kangi ṅwenye nenikuhite nguzu mishi inu.

⁵Vituhu azawati: Ati kuna wenyu kuṅwe wekombaγana kusheela na imi, newamfyalimile γuko, ati kuna mbuli mbada, yuja mγoshi abanileyo!

⁶Akihumula kuja kwawe mishi mnane ao kumi, azasheela na Kesaliya, mhitu wakwe azaikala mwe kiti cha lahila masa, azalaγiliza, Paulo aletiγwe.

⁷Akiiza, Wayuda walawilewo Yelusalemu wazamdenganila, wazamshinga mbuli nyingi ndala, washidahilezo kuonyesha, kuti ni za kweli.

⁸Hambu Paulo azakikanila angwe: Sitendile uhuza wa kubela mulomongwa wa Wayuda na vikilongwa jawe na mbuli ya Kaiza.

⁹Miya Fesito azakunda kufila Wayuda mbazi, ne ahomlandula Paulo angwe: Wakunda kukwela Yelusalemu, ukalahiγwe γuko kwa izi mbuli zoshe, nii haho?

¹⁰Angwe ni Paulo: Niiγoloke he lahilo ja masa ja Kaiza, ne heniagiza, nilahiγwe. Wayuda sina niwabanilevyo, sa iwe ṅwenye uvyotailisha.

¹¹Ati niibanile, ati niiγoshole mbuli yeagiza kufa, sina nkani na kukoṅwa; miya ati viya vyoshe wavyonifyalima, ni vya bule du, nkakuna mwedaha kuniinkila kwawe. Nakunda, nikalahwe kwa Kaiza.

¹²Ne Fesito aholonga njama na wafuṅwa, akibinda azamwitikila angwe: Uzakunda masa kwa Kaiza, neuhite kwa Kaiza.

¹³Mishi ikizinka, zumbe Agilipa na Belenike wazaiza Kesaliya kwa mluγusha Fesito.

¹⁴Wakiikala mishi mingi kuja, Fesito azamwukwila zumbe yaja masa ya Paulo, azamuti: Kuna mγoshi, azaashiγwa ni Feliki mwe chumba.

¹⁵Nikibula Yelusalemu, wavikizi wakulu na waγolokezi wa Wayuda wazanilawila kwa mbuli yakwe, wazanihembeleza, alahiγwe.

¹⁶Waja nizawalandula kuti: So msimo wa Kiloma kuhainkila muntu mwefyaliṅwa, ashizati akintanyiγwe na weyae wemfyalima, kangwe aone lukanile kwa ziya mbuli, azofyaliṅwa.

¹⁷Wakiunganana kunu, siwazunganye, viya du lushe nizaikala mwe lahilo ja masa, nizalaγiliza, yuja muntu aletiγwe.

¹⁸Waja wemfyalima wakimγolokela, viya vibada vyoshe, nifanyanyevyo, nkawavilavilize hata mbuli ṅwenga,

¹⁹wazakanana du naye mbuli kuṅwe za mivikile yawe wenye na za mbuli ya muntu afileye mweitangwa Yesu, Paulo ayelonga kuti: A moyo.

²⁰Lushe izi nkanani zawe nikishezionela sila, nizamwuza, ati akunda kuhita Yelusalemu, akalahiγwe izi mbuli γuko.

²¹Miγa Paulo akilonga, kuti akunda kuikwa, mpaka masa yakwe yabontolwe ni Kaiza ṅwenye, nizalaγiliza, aikale mwe chumba, mpaka ndiho nezenimtume kwa Kaiza.

²²Agilipa azamuti Fesito: Hata imi ṅwenye nakundisha kumwiva uyu muntu. Angwe: Keloi neumwive.

²³Keloi jakwe Agilipa azaiza na Beleniko, waikihambile kizumbe, wazaingila mwe nyumba ya masa haṅwe na wakulu wa washilikali na wafuṅwa wa muzi; lushe Fesito akilavya mulomo, Paulo azaletiγwa.

²⁴Fesito azaγamba: Zumbe Agilipa na mywi waγoshi nyoshe mwe haha, mwolelei uyu muntu! Kwa mbuli yakwe bumba joshe ja Wayuda jizanilawila kuja Yelusalemu, hata kunu, wakikema: Nkaviagiza, uyu akiikala vivyoho.

²⁵Miya imi siene mbuli, abanileyo, yeagiza kufa, kangi ṅwenye azaγamba: Shuti masa yangu yabontoke kwa zumbe mkulu ṅwenye, ne nikundilevyo kumtuma.

²⁶Miya mbuli yakwe ya mkombaγano, ndiyo nimgondele zumbe, sina. Ne vyeleka, nikimleta na kunu kwenyu, miya bosi kwa iwe, zumbe Agilipa, kangwe mkibinda kuuzanya naye, nione vya kugonda.

²⁷Hambu naγamba: Ni ubabashi ukulu kuhatuma muntu ashungiγweye na kushelaviliza masa yakwe, abanileyo.