Read Kishambala Ntuṅwa 28 Bible Online

Ntuṅwa 28 - Kishambala bible

Ntuṅwa 28

¹Tikibinda kubula kuja mpwai, tii wagima, tizaiva, kuti chiya kisiwa chiitangwa Melite.

²Waja wantungwa we kuja wazaisiiza kutifa mbazi: Wazaasha moto, wazatihokela toshe na kwawe kwa mbuli ya fula ikigwa, na kwa mbuli ya mpeho.

³Paulo akiunganyanya viγala kuṅwe, akivibadika mwe moto, kuzalawa nyoka kwa mbuli ya kiluke, izamuluma Paulo mkono.

⁴Waja wantungwa wakiona, ija nyama ivyoholela mwe mkono wakwe, wazaγambilana: Minga uyu muntu ni mkoma weyae, hambu akihona mwe iyo nkondo ya bahali, kangi mlahizo nkaumleka, aikale.

⁵Yuja azatambika ija nyama na mwe moto, kangi nkaifiγwe.

⁶Miya waja wazaafiza, atengeziγwe, ao akine nguzu, afe. Miya wakiafiza vivyoho, wakisheona, akiifiγwa, wazaγuwa ntongonyezi ntuhu, wazaγamba: Uyu ni mulungu.

⁷Hehi ni haja hantu hana kilambo cha mkulu ywa chiya kisiwa mweitangwa Populiyo, uyu azatihokela, azatifikiza mishi mitatu na kishe.

⁸Ne ishe ja Populiyo ahohuma mbu haṅwe na ifu, Paulo azamtimila uyu na mwakwe, azavika, azamubadikila mikono, ne amhonyizevyo.

⁹Inu mbuli ikibontoka, hata watuhu we mwe chiya kisiwa wena manyonge wazaiza na kwakwe, wazahonyiγwa.

¹⁰Awa wazatishimila vikulu, hata tikihalawa, wazatiinuza vyoshe vyetiagiza.

¹¹Myezi mitatu ikizinka, tizahita na chombo cha Alekisandiliya chibindilecho mishi ya kau haja he chiya kisiwa, zinge yakwe ina wana mpasha.

¹²Tizafikila Silakusa, tizakuikala mishi mitatu.

¹³Tikilawa kuja na chombo tizafikila Legiyo; mushi muṅwe ukizinka, kuzalawila mpeho yelawa luja lwazu lwegwila zuwa mishi ya vuli, ne tihobula mushi wa mbili Puteyoli.

¹⁴Kuja tizaona wanduγu, tizahembeleziγwa ndiwo, tiikale kwawe mishi mfungate. Ne tibuzilevyo Loma.

¹⁵Kuja wanduγu wakiiva mbuli zetu wazatiγendela singili mpaka Apiyofolo na Tilitabelene; Paulo akiwaona azamlaviliza Mulungu ntogolo, azatoγwa ni moyo.

¹⁶Tikiingiia Loma, yuja mkulu ywa washilikali azainkila waja washungiγwewo kwa ṅwiyae mkulu, miya Paulo azashungulwa kuikala akokunda ṅwenye haṅwe na yuja mshilikali mwemγoja.

¹⁷Mishi mitatu ikizinka, azaunganyanya wakulu wa Wayuda; wakiliγanila, azawati: Wanduγu wangu, imi siγoshole mbuli ishiyoivana na mbali yetu ao du na misimo ya watate zeshu; uko Yelusalemu nizashungwa, nizainkilwa mwe niikono ya Waloma;

¹⁸waja wakilaha masa yangu wazakunda kunishungula, kwa kuti nkahana mbuli, nibanileyo, yeagiza kufa.

¹⁹Miya Wayuda wakiviikila nkani, siene sila ntuhu, nizaγamba: Masa yangu shuti yabontokele kwa Kaiza, so kwa kuγamba: Nifyalime mbali yangu.

²⁰Kwa inu mbuli nizamiitanga, nimione, nilonge na inywi. Hambu kwa mbuli ya kialilo cha Waisilayeli niishungiγwe na aya mazolo.

²¹Waja wazamlandula: Ishwi kwa mbuli ya iwe nkatiinkiγwe baluwa yelawa Yudeya, hata mnduγu nkaizile akitiukwila na kulaviliza

²²mbuli, ubanileyo. Miya takunda kuiva kwako ṅwenye, uvyona navyo mwe moyo wako. Hambu kwa mbuli ya iji bumba hata kwetu vyatailikana, kuti koshe koshe jaikilwa nkani.

²³Wakibinda kulaγana naye mushi, wangi wazaiza na kwakwe akofikila, waja azawalaviliza mbuli ya uzumbe wa Mulungu na kuulongela uwona, azaγeza kuwavota kwa mbuli ya Yesu na kuwafumbwila mbuli za mulomongwa na za wateγanyi, kuandiila makelo mpaka ushwelo.

²⁴Kuṅwe wazaitikila mbuli zakwe, kuṅwe wazalemela kutozesha.

²⁵Wakisheivana wenye na wenye wazashailana, aho Paulo azawaγambila inu mbuli ṅwenga kuti: Mpeho mṅazi azalonga vitana kwa watate zenyu na kanwa cha mteγanyi Yesaya akiγamba:

²⁶Hita kwe inu mbali, uiγambe: Kuiva nezemwive vivyoho, miya nkezemvifumbule! Kuona nezemwone vivyoho, miya nkezemuvitaile.

²⁷Hambu myoyo ya inu mbali ni mibada, mashikilo yawe yana ntoγo za kuiva, mesho yawe waiyasisize, kangwe washezaona na mesho yawe, kangwe washezaiva na mashikilo yawe, washezataila mwe myoyo yawe wakihituka na kwangu, nikiwahonya.

²⁸Lushe inu mbuli itailei kuti: Unu uvunizi wa Mulungu uzatuṅwa na kwa wamzimu, ne ndiwo nezewaive!

²⁹Akilonga ivyoho, Wayuda wazahita waina nkanani nyingi wenye na wenye.

³⁰Miya Paulo azaikala mavuli maili mwe nyumba yakwe, azahokela woshe waingilewo na kwakwe akiwabilikila uzumbe wa Mulungu,

³¹akiwafuza mbuli ya Zumbe Yesu Kilisito na kuona nyemi, kangi nkakuna amfingizeye.