Read Kishambala Ntuṅwa 6 Bible Online

Ntuṅwa 6 - Kishambala bible

Ntuṅwa 6

¹Mishi ija wahina wakiγenela, Wagiliki wazaṅuna Waebuleyo, kwa kuti wavyele wawe wafilwewo ni waγoshi nkawaolelwa vyedi na kupangilwa kila mushi vyewatala.

²Waja kumi na waili wazaitanga bumba joshe ja wahina, wazawati: Nkavitama, ishwi tikiasha ndima ya mbulingwa ya Mulungu, tikitumikila he ndala.

³Wanduγu, olelai waγoshi wa kwenyu mfungate wetailikana, kuti waigisize mpehongwa na viyuγo, tiwagimbike, wamanye viya vyemiagiza!

⁴Ishwi tibashe ndima ya kuvika na kutumikila mbulingwa!

⁵Inu mbuli izawatamila woshe, wazamshaγula Sitefano, ni muntu mweisiiza kutozesha, agisizeye mpeho ṅazi, na Filipo na Pulokolo na Nikanolo na Timoni na Palimena na Nikolawo aangileye na Wayuda uko Antiyokiya;

⁶wazawaleta kwa ntuṅwa, awa wazawahembelezeza, wazawabadikila mikono.

⁷Miya mbulingwa ya Mulungu izaγenda, kangi kuja Yelusalemu wahina wazafikaisiiza kuγenela, hata bumba kulu ja wavikizi jizatozesha na kuitika.

⁸Sitefano kwa viya, avyogisa mbazingwa na kutenda nguvu, azaγoshola vimaka na vilozo vikulu kwa wantu.

⁹Kuzalawila kuṅwe, ni wa bumba jeitangwa ja Walibelitini na Wakilene na Waalekisando na wa Kilikiya na wa Asiya, wauzanye na Sitefano.

¹⁰Miya nkawadahile kuikila nkani viyuγo vyakwe na mpehongwa, ayolonga nayo.

¹¹Ne wahotunya wantu, walonge kuti: Tizamwiva, akilonga mbuli za kumkanka Mose, hata Mulungu.

¹²Hata mbalingwa na waγolokezi na watabaluwangwa wazawavota woshe, wazahita, wazamhuna, wazamwingiza kitala.

¹³Wazalavya waona wa lulimi weγamba: Uyu muntu nkadila kulonga mbuli za kubela haṅazi na mulomongwa.

¹⁴Hambu tizamwiva, akilonga kuti: Yesu ywa Nazaleti nezeachakule aha hantu, ahitule ija misimo, Mose atinkileyo.

¹⁵Woshe waikalewo mwe kitala wazamdulila, wazaona cheni chakwe, kuti viya ni cha mlau.