Read Kishambala Ntuṅwa 9 Bible Online

Ntuṅwa 9 - Kishambala bible

Ntuṅwa 9

¹Sauli akahefeza wahina wa Zumbe na kuwaitisha na kuwakoma, azahita kwa mvikizi mkulu,

²azamhembeleza baluwa ya mavikilo uko Damasiko, ati aonela uko kuṅwe wetongela ija sila, ati ni waγoshi, ati ni wavyele, kangwe akawashunge, awalete Yelusalemu.

³Akihita, akibula hehi na Damasiko azashentushiγwa akimulikilwa ni langaila jilawilejo mwe lwingu.

⁴Ne ahokina na shi, azaiva kanwa chikiγamba: Sauli, Sauli, mini ukiniγulusha?

⁵Angwe: Zumbe, u ndai? Angwe: Imi ni Yesu, uyeγulusha. Ntoγo yako ni ukishampa vyetunga.

⁶Miya inuka, uingile muja kaya, ne ndimo uγambilwe ndivyo, uγoshole!

⁷Waja waγoshi wetamba naye wazaγoloka, nkawadahile kulonga hata, wazaiva ka nwa, miya nkawaene muntu.

⁸Sauli azainuka haja shi, mesho yakwe, akiyainula, nkayaona; wazamtoza mkono, wazamwingiza Damasiko.

⁹Azaikala mishi mitatu, nkaona, kangi nkajile, nkanywele.

¹⁰Kuja Damasiko kuna mhina, zina jakwe ndiye Ananiya, uyu Zumbe azamlawila, azamuti: Ananiya! Angwe ndiye: Shimi, Zumbe!

¹¹Angwe ni Zumbe: Inuka, uhite kwe ija sila ya muzi yeitangwa Yeγolokela! Haja umwuzize muntu mweitangwa Sauli ywa Taliso mwe nyumba ya Yuda! Hambu avika.

¹²Azaona mwe sozi muntu mweitangwa Ananiya, akiingila alimo na kumubadikila mikono, kangwe aone.

¹³Ananiya azalandula angwe: Zumbe, mbuli ya uyu mγoshi nizaiiva kwa wantu wangi, aγoshwelwevyo waṅazingwa uko Yelusalemu vibada vingi.

¹⁴Kangi kunu azashungulwa ni wavikizi wakulu kushunga woshe wekemela zina jako.

¹⁵Miya Zumbe azamuti: Hita du! Hambu uyu ni kiumbo, nishaγulecho kuiγala zina jangu kwa wamzimu na kwa wazumbe na kwa wana Isilayeli.

¹⁶Kangi imi nenimwonyeshe vyoshe, ndivyo alumiziγwe kwa mbuli ya zina jangu.

¹⁷Ananiya azahita, azaingila mwe ija nyumbangwa azamubadikila mikono, azamuti: Sauli, mnduγu ywangu, Zumbe Yesu akulawileye silai, ukiiza, azanituma, kangwe uone, kangi umemeziγwe mpeho ṅazi.

¹⁸Viya du lushe hazaγoboka he mesho yakwe, viya ni maγobele, ne ahoona, azainuka, azabatizwa.

¹⁹Akibinda azaja nkande, azatintimala.

²⁰Mishi kuṅwe azaikala na wahina kuja Damasiko; haho azabilikila mwe mavikilo mbuli ya Yesu kuti: Uyu ni ṅwanangwa ywa Mulungu.

²¹Miya woshe wemwiva wazashentuka angwe: Uyu so yuja achakuleye kuja Yelusalemu woshe wekemela iji zina? Kunu kohe aizile iyo mbuli, awaiγale kwa wavikizi wakulu, waishungiγwe.

²²Miya Sauli azaisiiza kutenda nguvu, azaleka, Wayuda weikala Damasiko wakiaγilwa, azaonyesha kuti: Yuja Yesu ne Kilisito.

²³Mishi ikizinka mingi, Wayuda wazaivana kumkoma.

²⁴Miya inu mbuli yawe Sauli azaidonyelwa; wazaγoja nkili kilo na mushi, kangwe wamkome.

²⁵Ne wahinawakwe wahomγuwa na kilo, wazamsheleza na ngahu mwe boma.

²⁶Akibula Yelusalemu azaγeza kuangilana na wahina, miya woshe wazamwogoha, nkawatozeshe, kuti ni mhina.

²⁷Balinaba azamhokela, azamwiγala kwa ntuṅwa, azawashimwela, amwenevyo Zumbe silai, na alongilevyo naye, na abikilevyo chasale zina ja Yesu uko Damasiko.

²⁸Azaangilana nawo akikaingila, kangi akikalawa nawo Yelusalemu, azabilikila chasale zina ja Zumbe.

²⁹Hata Wayuda weanduka Giliki azatamwilana nawo na kuuzanya, miya awa wazapisha, ndivyo wamkome.

³⁰Wanduγu wakitaila inu mbuli, wazamsheleza na Kesaliya, wazamtuma na uko Taliso.

³¹Mwe shi ngima ya Yudeya na ya Galileya na ya Samaliya bumbangwa jizaja mpolele, wazaanga na kumwogoha Zumbe, wazagisa kishangalazo cha Mpeho mṅazi.

³²Petelo akianga koshe koshe azasheela hata kwa waṅazi weikala Lida.

³³Uko azaona muntu mweitangwa Eneya aleleye mavuli mnane mwe lusazi, hambu ana pengene.

³⁴Petelo azamuti: Eneya, Yesu Kilisito akuhonya; inuka, utandike lusazi lwako! Ne ahoinuka viya du lushe.

³⁵Woshe weikala Lida na Saloni wahitukewo na kwa Zumbe wazamwona.

³⁶Yope ne kwina mvyele mweitangwa Tabita, ni mhina; bontokelo ja iji zina ni kuγamba Mpala; uyu azaγenyeza ndima ntana na kufila weyae mbazi.

³⁷Mishi ija azahuma, azafa. Wakibinda kumhaka wazamwika talai.

³⁸Kwa kuti Lida ni hehi na Yope, wahina wazaiva, kuti Petelo a γuko, wazatuma waγoshi waili na kwakwe wakimhembeleza kuγamba: Ushekawe kuiza kwetu!

³⁹Petelo azainuka, azahita nawo, akibula, wazamkweza na kuja talai; kuja wavyelengwa wafilwewo ni waγoshi wawe wazamγolokela na kuliia, wazamwonyesha shuke na nkazu, yuja Mpala ashumilezo, wakena naye.

⁴⁰Petelo azawalavya woshe na chengoi, azaginta mazwi, azavika, azahituka na kwe kimba chakwe angwe: Tabita, inuka! Ne ahoinula mesho yakwe, azamwolela Petelo, azaikala.

⁴¹Uyu azamunka mkono, azamwinula; vikibinda azaitanga waja waṅazi na waja wavyelengwa wafilwewo ni waγoshi wawe, azamuwaonyesha, kuti a moyo.

⁴²Inu mbuli izatailikana mwe muzi mgima wa Yope, ne wangi wahomtozesha Zumbe,

⁴³Azaikala mishi mingi kuja Yope kwa mnyukula mababu mweitangwa Simoni.