Read Kishambala Waloma 1 Bible Online

Waloma 1 - Kishambala bible

Waloma 1

¹Imi Paulo ni mutuṅwa ywa Kilisito Yesu, niitangwe, niγaluke ntuṅwa, nishaγulwe, nihilikile ulau wa Mulungu,

²alongilewo kale na vyanwa vya wateγanyi wakwe mwe vitabu viṅazi; ni mbuli ya ṅwanae Yesu Kilisito, Zumbe ywetu,

³azavyalwa kimuntu mwe mbeleko ya Dawidi,

⁴azalesiγwa na nguvu kimpeho mṅazi kuti: Ni ṅwana Mulungu, aho akifufuka mwe wafilewo.

⁵Uyu ne atifileye mbazi, akitigimbika ntuṅwa, kuunga tihinye wamzimu wosheni kuitika na kutozesha, kangwe zina jakwe jigimbikwe.

⁶Ne muvyoitangwa hata inywi ni Yesu Kilisito.

⁷Nyoshe mwe uko Loma, mwekundishiγwa ni Mulungu, mweitangilwa, mγaluke waṅazi: Mbazi imiikaile na mpeho yeanduka kwa Mulungu Tate na kwa Zumbe Yesu Kilisito!

⁸Bosi namtogola Mulungu ywangu na Yesu Kilisito kwa mbuli ya inywi nyosheni, kuti mitozesheze yenyu yatogolwa mwe ngulu ngima.

⁹Mulungu, niyemγoshwela ndima mwe moyo wangu nikibilikila ulau wa ṅwanae, uyu Mulungu ni mwona ywangu kuti:

¹⁰Mishi yoshe nihokavikila namikumbuka nikihembeleza, ati nazashungulwa iyo ntambo ntana, nikundiziγwe ni Mulungu kuiza kwenyu.

¹¹Hambu nina luzwi lwa kumiona, nidahe kumipangila kwa mbazi viya vya kimpeho, mtoγeshiγwe vitana,

¹²ni kuγamba: Tishangalazanye inywi na imi na mitozesheze yetu, tiyotozesha nayo!

¹³Nakunda, mtaile, inywi wanduγu, kuti: Nizafanyanya kangi kuiza kwenyu, kangwe nitende kuwo kwenyu kohe sa kwe mbali ntuhu, miya nitefingiziγwa mpaka ivi lushe.

¹⁴Hambu imi ni mdeniywa Wagilikinaywa waja washiwo Wagiliki, ywa wanyanyi na ywa wababashi.

¹⁵Kwa ivyoho imi niikiteγile kumibilikila hata inywi mwe uko Loma; hambu sina shoni na ulaungwa,

¹⁶kwa kuti una nguvu ya Kimulungu kuhonya kila muntu, ndiye atozeshe, bosi Wayuda, vikibinda Wagiliki wohena.

¹⁷Hambu utanda wa Kimulungu wafumbwilwa mumo waja weiva mbuli za mtozesho, kangwe wazitozeshe sa vyagondwavyo: Mtanda nezeatende nkalamo na kutozesha.

¹⁸Hambu maya ya Mulungu yasheela mwe lwingu, yalawila wemubela Mulungu na wapapala woshe wefingiza mbuli zoshe za kweli na upapalishi wawe,

¹⁹kwa kuti viya vya Mulungu vyetailikana, viifumbuke kwawe, hambu Mulungu azaviwafumbwila;

²⁰hambu vyakwe vishivyooniγwa ni mesho, kuγamba nguvu yakwe ya kale hoshe na umulungu wakwe, ivi vyatailikana, kangi vyaoniγwa, ukiolela aumbilevyo atuzileho shi, kangwe washedahe kuzakikanila;

²¹hambu wazamtaila Mulungu, kangi nkawamgimbike, nkawamtogole viya ni Mulungu, ne ntongonyezi zawe zihoγaluka za bule, ne myoyo yawe ishiyotaila vya kweli ihogweelwa ni lwiza.

²²Wekifanyanyiza, kuti ni wanyanyi,

²³wazaγaluka wadashi wakihitula utana wa Mulungu ashiyebanika na mwe fanyanyi ya shula ya muntu mwebanika, hata ni shula ya madeγe ao ya mazama ao ya vizongolo.

²⁴Kwa inu mbuli Mulungu azawainkila, watongele kihelehele cha myoyo yawe, waγoshole usaba wa kubanilana mili wenye na wenye;

²⁵ni wawo, ndiwo wakiγalusha kweli ya Mulungu ulongo, wakiitika na kuvika kiumbo kuzinka kiumbe mweagiza kutogolwa kale na kale. Amini.

²⁶Kwa inu mbuli Mulungu azawainkila kwe milumilwe yegwiza shoni; hambu wavyele wawe wazaleka miγwilwe yeagiza, waje misimo ishiyoagiza hata;

²⁷vivyoho hata waγoshi wazaasha miγwile ya wavyele yeagiza, miya kwa kuhemba kwawe wazaingilanilana luzisho wenye na wenye, wazagona mγoshi na mγoshi; wakiγoshola viya viwiwi wazaona mwe mili yawe kitumulo cheagiza uja uhambanyi wawe.

²⁸Sa walemelavyo kumtozesha Mulungu na kumtaila, vivyoho Mulungu azawainkila na kwe udashi,

²⁹waγoshole mbuli zishizoagiza, wakiγenyeza uhuza woshe ubada na mumelo na uwiwi, wakiinema wizu na ukoma wantu na nkumbizi na luteγo

³⁰na mambeza na lushonganyo na lushingo na lukanko na uhambanyi na utili na mahiku na mbifya

³¹na upapala na nkani na lwufyo na ukali na ushowa mbazi.

³²Waitaile utanda wa Mulungu kuti: Weγoshola ivi wakola masa ya kufa, kangi nkawataviγoshola wenye du, hata watuhu wakiviγoshola watatamilwa ndiwo.