Read Kishambala Waloma 10 Bible Online

Waloma 10 - Kishambala bible

Waloma 10

¹Wanduγu, nivyokundisha kwa moyo, nivyomhembeleza Mulungu, ni kuγamba: Waisilayeli wavunilwe.

²Hambu nawalongela uwona kuti: Wakihima kwa mbuli ya Mulungu, miya wakihima kishiviyuγo,

³hambu nkawataila utandawa Mulungu, wakunda kushimika utanda wawe wenye, kwa inu mbuli nkawaitika utanda wa Mulungu.

⁴Kangi bontokelo ja mulomongwa ni Kilisito, amγalukile kila mtakutozesha utanda.

⁵Hambu Mose agonda kuti: Uja utanda wa mulomongwa muntu akiuγoshola atatenda nkalamo nawo.

⁶Miya uja utanda weanduka mwe kutozesha walonga: Ushefanyanye mwe moyo wako kuγamba: Ndiye akwele na mwe lwingu, ni ndai? Ni haṅwe haṅwe na kumsheleza Kilisito;

⁷ao kuγamba: Ndiye asheele kuzimu, ni ndai? Ni haṅwe haṅwe na kumkweza Kilisito kwa wafilewo.

⁸Lushe vya kweli ni vihi? Ni kuja kuγamba: Mbulingwa i hehi na iwe, i mwe kanwa chako, kangi i mwe moyo wako, inu ni mbuli ya kutozesha, tiyobilikila.

⁹Lushe ukilaviliza na kanwa chako kuti: Zumbe ni Yesu, kangi ukitozesha mwe moyo wako kuti: Mulungu azamwinula kwa wafilewo, ne ndivyo uhone.

¹⁰Ukimtozesha mwe moyo, akuγalubila utanda, ukimlaviliza na kanwa, akuγalukila uhonya.

¹¹Hambu ugondengwa waγamba: Ndiye amtozeshe, nkezeabunkuke.

¹²Hambu sho nkahashaγulwa Wayuda na Wagiliki, hambu Zumbe ywa woshe ni uyu muṅwe, uyu ni mzuli kwa woshe wemkemela;

¹³hambu ndiye akemele zina ja Zumbe atahona.

¹⁴Lushe wamkemele zeze, ati nkawamtozesha? Wamtozeshe zeze, ati nkawaivile mbuli yakwe? Wamwive zeze, ati nkawabilikilwa?

¹⁵Wabilikile zeze washitetuṅwa? Sa vivyogondwa: Milundi ya waja webilikila ubilikizi wedi yatamila.

¹⁶Miya nkawaitike woshe uja ulaungwa wedi, hambu Yesaya azaγamba: Mwetozesha ulau wetu ni ndai?

¹⁷Lushe kutozesha kuanduka kwe ubilikizi, kangi ubilikizi uletiγwa ni mbuli ya Kilisito.

¹⁸Miya niγambe: Nkawaivile? Kuiva wazaiva, nguma yawe izagisa ngulu ngima, mbuli zawe zizabula he mihelo ya shi.

¹⁹Miya niγambe: Waisilayeli nkawavitaile? Bosi Mose alonga: Nenimigele wizu na wantu washiwo mbalingwa, nenileke, mkwelwe ni maya na mbali ya wantu wababashi.

²⁰Yesaya alonga na kulaviliza: Nitazaoniγwa ni waja washinilondilewo, nitazawalawila waja washiniuzizewo.

²¹Miya Waisilayeli awalonga kuγamba: Mushi mgima nizawakuswila mikono yangu wantu wenipapalika, weniikila nkani.