Read Kishambala Waloma 14 Bible Online

Waloma 14 - Kishambala bible

Waloma 14

¹Muntu mwena kutozesha kunyonge mumanyei!

²Mshelahe mitongonyezeze ya muntu! Hambu muṅwe atoza kuti: Vyoshe vyaliγwa, miya mnyonge aja mboγa du; yuja mweja ashemubele ṅwiyae ashijaye!

³Kangi yuja ashijaye ashemubele yuja mweja, kwa kuti Mulungu azamhokela!

⁴Iwe u ndai ukimlaha muntungwa? Ati aγoloka, ati akina, vyoshe avimγoshwela Zumbe ywakwe ṅwenye; miya inga atoγe, hambu Zumbe ana nguvu ya kumwitika.

⁵Muṅwe agimbika mishi kuṅwe kuzinka mituhu, muṅwe agimbika mishi yoshe; komo kila muntu avyoona ṅwenye, avikihime!

⁶Mwegimbika mishi kuṅwe aigimbikila Mulungu, mweja amjila Zumbe, hambu amtogola Mulungu; ashijaye ashamjila Zumbe, yohena amtogola Mulungu.

⁷Hambu nkahana mwekiikaila ṅwenye, kangi nkahana mwekifila ṅwenye.

⁸Tikiikala timwikaila Zumbe, Ukifa timfila Zumbe; lushe ati taikala, ati tafa, ti wantu wa Zumbe.

⁹Hambu ne Kilisito afilevyo, kangi ne afufukevyo, kangwe aγaluke zumbe ywa wafilewo na ywa we moyo.

¹⁰Miya iwe, umlahilai ṅwiyawo? Ao du umubeelai ṅwiyawo? Hambu ishwi toshe nezetifose he kiti cha Mulungu, hambu kuigondiγwe:

¹¹Angwe ni Zumbe: Ni miyo, woshe nezewanigintile mazwi, woshe nezewamtogole Mulungu na vyanwa vyawe. Ivyoho

¹²ishwi toshe kila muntu atazalonga kwa Mulungu mbuli zakwe ṅwenye.

¹³Kwa inu mbuli tishezalahana wenye, miya tikaalile iyo mbuli ṅwenga, muntu ashemwikile ṅwiyae ha kikwiila, ahoihilwa ndiho!

¹⁴Nataila, kangi natoza, kwa kuti nina Zumbe Yesu, kuti: Nkahana chena ṅwiko ivyo chilivyo, miya muntu akichifanyanya kuti: China ṅwiko, hasi ana ṅwiko nacho.

¹⁵Nwiyawo akiihilwa ni viya, uvyoja, iwe nkuanga na kumkundisha. Miya ushehose muntungwa na viya, uvyoja, ndiye Kilisito akifa kwa mbuli yakwe!

¹⁶Msheleke, vitana vyenyu vikibelwa!

¹⁷Hambu uzumbe wa Mulungu so kuja na kunywa, miya ni utanda na mwivano ua uyemi vina mpeho ṅazi;

¹⁸hambu mwemtumikila Kilisito na mbuli izi amtumikila Mulungu, kangi atakundwa ni wantu.

¹⁹Kwa inu mbuli tikihime na viya vya mwivano, ne viya vyeleka, tikishikizanya!

²⁰Ushechakule ndimangwa ya Mulungu kwa mbuli ya nkande! Kweli vyoshe ni vitana, kangi vyamγalukila vibada muntu mwevija na katali ka moyo.

²¹Vyaagiza kusheja nyama na kushenywa mpombe na kusheγoshola vituhutuhu, ṅwiyao avyoihilwa ndivyo.

²²Ukitozesha, umanye utozeshe vivyoho na kumwolela Mulungu! Mwe nyemi ni muntu ashiyekilaha ṅwenye na viya avyofanyanya,

²³miya mimtu mweganyaganya akija azabinda kukola masa, kwa kuti nkajile na kutozesha, hambu vyoshe, uvyoγoshola na kushetozesha, ni uhuza.