Read Kishambala Waloma 15 Bible Online

Waloma 15 - Kishambala bible

Waloma 15

¹Ishwi wanguvu vyatiagiza kuzizimiziza manyonge ya waja weshowa nguvu, tishekitamile wenye.

²Ishwi kila muntu shuti amtamile ṅwiyae, kangwe tiambizanye naye vitana.

³Hambu hata Kilisito nkakitamile ṅwenye, sa vivyogondwa: Lukanko lwa waja wekukanka nizalubadikwa imi.

⁴Hambu viya vyagondwavyo kale vyagondwa, vitihinye, kangwe titozeshe kialilo chetu na kuzizimiza na kubembuliziγwa na viya vyagondwavyo.

⁵Mulungu mwezizimiza, mwehembuliza amife mbazi, kangwe nyoshe mtende moyo muṅwe, kwa viya mu wa Kilisito Yesu,

⁶kangwe mumtogole Mulungu, ishe ja Zumbe ywetu Yesu Kilisito, luṅwe na kanwa kiṅwe. Kwa inu mbuli hokelanai,

⁷sa Kilisito avyomihokela, mumgimbike Mulungu!

⁸Hambu naγamba kuti: Kilisito azatumikila washengiγwewo kwa mbuli ya ukweli wa Mulungu, kangwe agele misuhi, wababa wainkiγweyo, nguvu.

⁹Wamzimu wamtogole Mulungu kwa mbuli ya mbazi zakwe, sa vivyogondwa: Kwa inu mbuli nezenikutogole kwa wamzimu,

¹⁰nezeniimbile zina jako. Kangi hatuhu halongwa: Tamilwai, inywi wamzimu, haṅwe na mbali yakwe!

¹¹Kangi hatuhu halongwa: Wamzimu nyosheni, mtogolei Zumbe! Hambu mbali zoshe zitazamlaviliza ntogolo.

¹²Kangi Yesaya alonga kuti: Mwe nkolo ya Isai mtazalawila ndiye atoze uzumbe wa wamzimu, ne ndiye wamzimu wamwalile.

¹³Mulungu, muyemwalila, aisiize kumiγenyezeza nyemi na mwivano, kwa kuti mwatozesha, kangwe kialilo chenyu chilendeshe nguvu chiina mpeho ṅazi!

¹⁴Weyangu, hata imi ṅwenye natailisha, kuti vitana vyenyu ni vingi, kuti mwataila mbuli zoshe, kuti mwadaha wenye kushundana,

¹⁵kangi nizaminyinyiliaza na kumigondela mbuli kuṅwe kuṅwe, viya nitazimikumbusha kwa ziya mbazi, nifilwezo imi ni Mulungu,

¹⁶kangwe nimtumikile Kilisito Yesu ndima ya wamzimu nikibilikila kiṅazi ulaungwa wedi wa Mulungu, kangwe tulo, wamzimu wajomwiγaila, jimtamile Mulungu jikiṅazwa ni mpeho ṅazi.

¹⁷Kwa inu mbuli viya vya Mulungu nakitogola navyo mwe Kilisito Yesu.

¹⁸Hambu ati ni vya longa, ati ni vya γoshola, sikunda kuvilonga, viya so Kilisito aviγosholeye na imi akileka,

¹⁹wamzimu waitike kwa nguvu ya vilozo na ya vimaka na kwa nguvu ya mpeho ṅazi. Kwa inu mbuli nizaandiila kubilikila ulau wedi wa Kilisito uko Yelusalemu, nizaugisa shi zoshe mpaka Ililiko,

²⁰kangi nalonda iyo ntogolo, kuti sibilikile hantu, zina ja Kilisito jiholangwa, kangwe nishezazenga mwe shikamilongwa,

²¹miya nibontole vyegondwa kuγamba: Nezewaone washabilikilwawo mbuli yakwe, washaivawo nezewataile.

²²Ivi vizanifingiza kangi muno kuiza na kwenyu.

²³Miya Iushe mwe izi shi zoshe sina nishiγazeho, kangi luja luzwi lwa mavuli mangi lwa kuiza na kwenyu, nikizahita mwe shi ya Sipaniya, nina nalo vivyoho;

²⁴hambu nikealila, nimione aho nikizazinka, nielekeziγwe ni nywiyo na γuko, tiibindile kunalavyana luzwi hadodo.

²⁵Miya ivi lushe nahita Yelusalemu, nitumikile waṅazingwa.

²⁶Hambu Wamakedoniya na Waakeya wazakunda kuwapangila wakiwa wa bumbangwa je uko Yelusalemu;

²⁷wazakunda wenye, kangi ni wadeni wawe, hambu wamzimu wakipangilwa ndiwo viya vyawe vya kimpeho vyaagiza, wakiwatumikila na viya vyawe vya kiinushi.

²⁸Nikibinda inu mbuli na kuwalongela ijo kuwo jawe uwona, nezenizinke kwenyu nikihita Sipaniya.

²⁹Miya nataila kuti: Aho ndiho nezeniizile kwenyu, nitaiza na uja ungi wa vitana vya Kilisito, awokatiṅaziza mesho nawo.

³⁰Namihimila, inywi weyangu, kwa mbuli ya Zumbe ywetu Yesu Kilisito, kwa kuti takundishana kimpeho, muniambize nkondo yangu mkinihembelezeza kwa Mulimgu,

³¹kangwe nivunilwe kwa waja washiwoitika kuja Yudeya, kangwe waja waṅazingwa watamilwe ni kunu kutumikila kwangu na Yelusalemu,

³²kangwe niize kwenyu na nyemi, ati Mulungu akunda, tishangalazanye na inywi.

³³Mulungu mwetiikaza mpeho, aikale na inywi nyoshe! Amini.